Zenezi 30

1Tawamhã Raqueu, 'ra waihu'u õ na siwaihu'u wamhã, ma tô tidub'rada Léia hã 'ruiwapa, õhõ si 'ra siwapto wa. Tahawa te timro ma tãma tinha ãne:

— Ma'ãpé ĩ'ra da, ĩma sô romhuri. Ãnei õ wamhã, wa za dârâ.

2Tawamhã Zaco, Raqueu zada ma tô tizahi. Tahawa te ãne tãma tinha:

— E wa hã 'Re ihâimana u'âsi mono bâ ma tô ĩ'ãma irosa'ra. Ta hã te te tô aima sa'réi õ di, i'ai'ra da hã.

3Tahawa te Raqueu ãne duré tãma tinha:

— Ãhãta te ĩma romhuri'wa Bira hã tihâiba. Ma'ãpé õhõ ãma si pé aihâimana mono. Ta hã 'ra wapsi, te za tô ĩ'ra ne ĩma 're hâimana. Taha u'âbâ, wa za tawamhã ina na tãma 're ĩhâimana, wa hã.#30.3 Pawa'âbâ ãna dama romhuri'wai 'ra hã te za isib'ihâ'a 'ra ne tãma 're hâimana.

4Tahawa Raqueu, Zacoho ma, tite romhuri'wa Bira na isisi hã ma tô tãma hâiba nho, imro prã na tãma 're hâimana mono da. Tawamhã õhõ ré si ma tô oto nomro. 5Tahawa, Bira oto wasã wamhã, ma tô i'ra hã tãma podo. 6Tawamhã Raqueu te tinha ãne:

— 'Re ihâimana u'âsi mono, ma tô i'uwaibaba na ĩma 'manha. Te tiwi iwaptẽrẽzém na hã ma tô ĩwapa. Tahawa 'watébrémi ma tô ĩma tisõ.

Ãne wa, ma tô 'watébrémi hã sisi, Dã#30.6 Dã hã hebreu norĩ mreme na “i'uwaibaba na si rowairébézé” aiwa prã na ne iwapari na hã. na.

7Tawamhã Bira, ma tô duré apâ tiwasã. Tahawa, Zacoho 'ra isõsi ma tô duré tãma podo, 'watébrémi na. 8Tawamhã Raqueu te duré tinha ãne:

— Ã hã 'watébrémi nhisi hã za, Naftali#30.8 Naftali hã hebreu norĩ mreme na “dasina ro'wapé” aiwa prã na ne iwapari na hã. na. E tihai wa. Ĩdub'rata na ĩsina ĩnhimirosa'rata na te iro'wapé na hã te ãma ai'uté wa.

9Tawamhã Léia, 'ra zahu õ na siwaihu'u wamhã, ma tô tite romhuri'wa Ziupa na isisi hã tãma hâiba nho Zacoho ma, imro prã na tãma 're hâimana mono da. 10Ãhã wamhã Ziupa zé're hawimhã, ma tô Zacoho 'ra hã tãma podo. 11Tawamhã Léia te tinha ãne:

— E niha ma tô iwẽ hã ĩma watobro.

Tahawa 'watébrémi hã ma tô sisi, Gadi#30.11 Gadi hã hebreu norĩ mreme na “iwẽ hã dama iwatobrozé” aiwa prã na ne iwapari na hã. na.

12Tawamhã nimahã na ma tô duré Ziupaha zé're hawi, Zacoho 'ra hã tãma 'maipodo. 13Ãhã wamhã, te Léia duré tinha ãne:

— E niha ĩtoi uptabi, ãhã na hã. Tahawa te za oto pi'õ norĩ, ĩtoi uptabi na ĩhâimanazém na hã te te sima 're ĩwasu'u za'ra.

Tahawa ma tô 'watébrémi hã sisi, Asé#30.13 Asé hã hebreu norĩ mreme na “datoi uptabi” aiwa prã na ne iwapari na hã. na.

14Tawamhã nimahã bâtâ na amnho trigu, da te 're itehâri za'ra mono ré, ma tô Rubẽ roptehutu na daburu u hã mo. Tame ma tô mandragora#30.14 Mandragora na rob'rã nhisi hã, ai'utézé 'ridawa'wa na hã dama i'umnhasi za'ẽne, duréihã. na rob'rã nhisi hã sãmri za'ra. Ta hã te te isãmri za'ra hã ma tô tina Léiaha ma hã tãma tidu. Tawamhã ã hã Raqueu te te 'madâ'â wamhã, ma tô Léiaha ma tinha ãne:

— Ĩzawi na hã, ai'ra mandragora we te te aima i'ãwisi za'ra hã, ma'ãpé ĩma 'manhomri.

15Tawamhã Léia ma te ãma sada'â ãne:

— E niha ĩmro na ãma ĩwi ate nherẽ, te za duré niha hã ĩma irob'manha. E te duré asima iwẽ, rob'rã ĩ'ra te te ĩma isõmri zama, ĩwi âri da hã.

Tawamhã Raqueu te asa tãma tinha ãne:

— Tane wamhã, wa te ãma wasiwi saprĩ na pé. A hã te za rob'rã mandragora hã ĩma isõmri za'ra. Tawamhã taha wa'rãmi wa za Zacoho ré, ã mara na anomro da hã aima sa'ré.

16Tawamhã Zaco, roptehutu na daburu hawi hâiwahâ pesere wisi wamhã, ma tô Léia hã watobro, te te sina uzusi da. Tahawa te ãne tãma tinha:

— Ã mara na hã te za oto ĩré ano, taha da, rob'rã, ĩ'ra te te ĩma isõmri na te aiwa'âbâ siromo wa.

Tawamhã tô taha mara na iré nomro wamhã, ma tô ãma tihâiba. 17Tawamhã 'Re ihâimana u'âsi mono te te irowaptẽrẽzém na te te wapari wa, ma tô duré oto tiwasã Léia hã. Tawamhã Zacoho 'ra, 5 ãma hã ma tô duré oto tãma podo, isé're hawimhã. 18Tawamhã Léia te tinha ãne:

— 'Re ihâimana u'âsi mono, ma tô iwẽ na ãma ĩma wa'rã, ĩte aibâ ma, ĩma romhuri'wa te tãma sõmri wa.

Tahawa, 'watébrémi hã ma tô sisi, Isaca#30.18 Isaca hã hebreu norĩ mreme na “marĩ wa'rãmi dama danhoprubzé” aiwa prã na ne iwapari na hã. na.

19Tawamhã 6 na i'ra ãmab da hã ma tô duré tiwasã. Tawamhã i'ra 'watébrémi ma tô duré oto tãma podo. 20Tawamhã te tinha ãne:

— 'Re ihâimana u'âsi mono, iwẽ uptabi na hã ma tô ĩma tinhopru. Tahawa te za oto ĩmro hã te te 're ĩ'madâ'â wẽ u'âsi, 6 na i'ra hã ĩhawimhã oto hâimana za'ra wa.

Tahawa, ta hã ma tô duré sisi, Zébulõ#30.20 Zébulõ hã hebreu norĩ mreme na “danhoprubzé” aiwa prã na ne iwapari na hã. na.

21Tawamhã da'rãirẽme hã, ma tô duré i'ra ba'õtõ na hã tãma podo. Ta hã ma tô sisi, Dina na.

22Tawamhã 'Re ihâimana u'âsi mono, Raqueu ãma ma tô oto po're puru. Tahawa te te tiwi irowaptẽrẽzém na te te wapari wa, ma tô oto tãma rowairébé, 'ra da. 23Tawamhã ma tô tiwasã. Tahawa, ma tô i'ra 'watébrémi na tãma podo. Tahawa te tinha ãne:

— 'Re ihâimana u'âsi mono, ĩma irowazébzé hã ma tô oto ĩma tipa. 24Uburé Danhib'apito, ĩ'ra si'aibâ te te duré ĩma sõmri neza, 'watébrémi hã.

Tahawa, Zuzé#30.24 Zuzé hã hebreu norĩ mreme na “ĩma sõmri zahu na” aiwa prã na ne iwapari na hã. na ma tô sisi.

Zaco norĩ, Labãhã me roti na isisaze zahuré zé wasu'u

25Tawamhã Zuzé poto pari, Zaco te Labãhã ma tãma tinha ãne:

— Ma'ãpé ĩma rowairébé, apâ ĩnhipti'ai u ĩmorĩ da hã. 26Tahawa ma'ãpé duré ĩ'ra norĩ, duré ĩmro norĩ hã ĩma hâiba za'ré za'ra na, te aima 're iromhuri mono zarina ĩma 're ihâimana za'ra mono hã. Ĩmorĩ da oto. Aima waihu'u pese di, sa'ẽtẽ na te aima 're iromhuri mono zém na hã.

27Tawamhã Labã, ma te ãma sada'â ãne:

— Ĩzawi na hã ma'ãpé ĩ'rata 're aihâimana u'âsi mono. E marĩ wa. Wa hã marĩ te i'manharĩ nhipese na, wa tô waihu'u, aihâiba u'âbâmhã Uburé Danhib'apito iwẽ na te te 're ĩpawapto mono zéb zarina hã. 28Tahawa ma'ãpé asima iwẽzém na ĩma waihu'u, za nasi te aima iwa'âbâzéb da hã.

29Tawamhã Zaco, asa ma te ãne ãma tãma wa'rã:

— Te aima 're iromhuri mono zé hã aima waihu'u pese di. Duré asimizama te aima 're i'ab'madâ'â mono zé hã aima waihu'u pese di. 30We ãwa ĩwisi wana ré hã asimarĩ hã aré umrore di. Tane nherẽ, ma tô oto sina hâ. Duré 'Re ihâimana u'âsi mono, nimomo 're ĩne mono sidâpâsi ma tô iwẽ hã te te aima 're apisutu. Tane nherẽ, oto wa hã ãhã na hã ĩhawi a'uwẽ norĩ si te oto 're i'a'madâ'â mono da si, wa tô oto ĩsima wẽ zahi.

31Tawamhã Labã te duré ãma sadanha ãne, tô õhõ na:

— E niha te asima iwẽ, za nasi te aima iwa'âbâzéb da hã.

Tawamhã Zaco, ma te ãma sada'â ãne:

— Te ĩsima wẽ õ di, dapawa'âbâzé hã. Wa za tô asimizama 'madâ'â na romhuri na ãma aima uzusi za, ãne na ĩnhimirosa'rada te aima ipibuzém na ãma ĩzaze da hã wamhã. 32Ãne na ĩnhimirosa'rada te aima ipibuzém na hã: Ã bâtâ na wa za uburé asimizama wa'waibaba hã 're mo, te ĩsima azani mono da, pone'ẽrebâ 'ra i'rãdâ'â norĩ hã, pone'ẽrebâ zéré mapure i'upto norĩ hã, duré pone'ẽrebâ zéré uzé i'upto norĩ hã. Ã norĩ na si ĩpawa'âbâ da hã, wa tô oto wa hã ĩsima wẽ zahi. 33Apto'o ré wamhã, sena na 're ĩhâimana mono zém na ĩwaihu'u da hã aima wapure di za. Nimahã na ãma ĩpawa'âbâ da, aza'rata wamhã, pone'ẽrebâ 'ra i'rãdâ'â'õ norĩ, pone'ẽrebâ zéré mapure i'upto'õ norĩ, duré pone'ẽrebâ zéré uzé i'upto'õ norĩ 'masãmri wamhã, te za iwaihu'u, wa hã te aiwi i'manhimi'uri na hã.

34Tawamhã Labã, Zaco te te sina tãma ipibuzém na te te ãma sazei wa, ma tô ãne tãma tinha:

— Wẽ di, ĩma ipibuzé hã. Wa te wasima 'manharĩ tô.

35Tane nherẽ, Labã, tô taha bâtâ na ma tô uburé pone'ẽrebâ zéré uzé si'aibâ i'upto norĩ hã, isipi'õ i'upto norĩ hã, duré uburé pone'ẽrebâ 'ra i'rãdâ'â norĩ me hã sima sani za'ra. Taha pari, ma tô ã norĩ hã ti'ra norĩ ma tãma sa'ré za'ra, te te siwi 'madâ'â da hã. 36Ãne pari, Zacoho nhiti si'ubdatõ bâdâ ãma ĩmorĩ na ma tô romhâ na hã tiwi tihâiba, tinhimizama norĩ i'upto ré. Taha ré te Zaco, timama waptém na timaprebaba ma, isimizama hâiba amo hã tãma 'madâ'â za'ra.

37Tawamhã Zaco, estoraqui na rowede nhisi panhipti hã, amedowera na rowede nhisi panhipti hã duré platano na rowede nhisi panhipti hã ma tô waibu. Tahawa, ma tô te te ahâiwazu, iwaihõ'a hã te te i'a'urĩrĩzéb u. 38Tawamhã duré ta hã timaprebaba nhimizama nho'remhã ma tô sa'ra, te te 're i'âhuri mono zéb ãma, tame danhimizama si'aibâ norĩ, pi'õ hã te te 're wasã u'âsi za'ra mono wa. 39Tawamhã rowede panhipti nho're te te 're wasã za'ra mono sidâpâsi, ma tô pone'ẽrebâ 'ra norĩ iwawi na hã duré i'upto na hã nasi tãma rere.

40Tawamhã Zaco, pone'ẽrebâ 'ra norĩ hã ma tô te te sima 're azani. Tahawa, ma tô Labãhã nhimizama norĩ iwawi na hã duré i'rãdâ'â na hã ãma atob za'ra. Ãne ma tô Zaco, tinhimizama uptabi da hã oto sima tébré, Labãhã nhimizama hawimhã.

41Tawamhã pone'ẽrebâ sipi'õ ihâiba nhiptete norĩ, aibâ te te 're wasã za'ra mono ré, ma tô wede panhipti isõ'reb za'ra hã nasi sa'ra, te te 're i'âhuri mono zéb 're. Taha zarina ma tô wede panhipti 'ratamhã 're wasã za'ra. 42Tane nherẽ, Zaco, pone'ẽrebâ ihâiba nhib'uware norĩ nho'remhã, wede panhipti te te nasi aza'ra õ di. Tahawa ihâiba nhib'uware norĩ, Labãhã ma si ma tô tãma 're hâimana za'ra. Duré Zacoho ma, ihâiba nhiptete norĩ si ma tô tãma 're hâimana za'ra. 43Tawamhã ãne wa, ma tô oto sisibro pese. Isimizama pone'ẽrebâ zéré mapure norĩ, pone'ẽrebâ zéré uzé norĩ, tãma iromhuri'wa si'aibâ norĩ, tãma iromhuri'wa sipi'õ norĩ zama, awaru ba'õmore norĩ hã, duré awaru po're pore norĩ hã ahâ uptabi di oto.

Currently Selected:

Zenezi 30: xavBP

Highlight

Copy