Zenezi 29
29
Zaco, Raqueu te te isõpẽtẽzé wasu'u
1Tawamhã Zaco, timorĩ na ma te oto ãma uzusi. Tahawa bâtâ pusizém niwĩ ro 're ihâimana mono u ma tô wi. 2Wisi wamhã, nimahã bâtâ na ma tô â zô ab're a'ubuni wi ihâiba hã tãma waihu'u õ nherẽ, sõpẽtẽ. Pone'ẽrebâ norĩ, si'ubdatõ si ihâiba na iwa'õno, ma tô 'râwi i'rata isimi'wara hã siwi uirĩ. Tame â zô ab're ãma ma tô danhimizama te te 're âhuri. Â zô ab're ẽtẽ tõmo wawẽ na isitobzé hã, isa'ẽtẽ uptabi. 3Tame pone'ẽrebâ 'madâ'â'wa norĩ, uburé tinhimizama na 're sito mono wamhã, te za ab're nhidâzé hã te te siwi 're sa'ré, tinhimizama ma, te te 're amrami za'ra mono da hã. Taha pari te za duré apâ te te ãma siwi 're sidâ. 4Tawamhã Zaco te pone'ẽrebâ 'madâ'â'wa norĩ sadanharĩ za'ra ãne:
— Ĩsiwaihu'u norĩ, e ma hã asa'ru za'ra wa'wa.
— Wa norĩ hã Harã ãma 're iwarob za'ra mono. — Ãne ma tô asa sada'âbâ za'ra.
5Tawamhã te duré Zaco sadanharĩ za'ra ãne:
— E aima waihu'u pese za'ra wa'aba di, Labã, Naoho 'ra hã.
— Ĩhe, wama waihu'u pese za'ra di. — Ãne ma tô duré asa sada'âbâ za'ra.
6Te duré tawamhã ihâiba na, Zaco ãma sadanharĩ za'ra ãne:
— E rowẽ na te 're hâimana.
— Ĩhe, rowẽ na te 're hâimana. Õhõta i'ra Raqueu te we pone'ẽrebâ hã te te simro.
7Tawamhã Zaco te tinha ãne:
— Zahadu aré bâtâ hâ di. Ãhã wa, pone'ẽrebâ we i'ubumroi wa'aba mono hã zahadu sadai õ di. Tahawa e aré bété wẽ õ di, a'â tô â hã tãma õb za'ra wa'aba da, taha pari duré apâ ate mono bâ a'ubuni u isimroi wa'aba mono da hã, du te te 're huri mono da.
8Tawamhã asa ma te ãma sada'âbâ za'ra ãne:
— Mare di. Waihu'u õ di. Wa za a'â wasisô mapari za'ra ni, pibu pese na, aihĩni pese we ãwa a'â pone'ẽrebâ norĩ hã sihutu da. Tawapsi ab're nhidâzé ẽne hã wa za wasiwi sa'ré ni. Tawamhã â wa za oto tãma õb za'ra ni, wanhimizama norĩ ma hã.
9Tawamhã Zaco zahadu, te te tãma nharĩ za'ra ré, Raqueu pone'ẽrebâ 'madâ'â'wa ma tô itẽmemhã tiwisi za'ra, timama nhimizama ré hã. 10Tawamhã Zaco, timama wapté Labãhã te, pone'ẽrebâ norĩ siré Raqueu we imorĩ hã te te 'madâ'â wi, ma tô ab're nhidâzé ẽne te te sa'ré da hã sô ai'ré. Te te sa'réi wamhã, ma tô tãma õb za'ra, timama waptép te ma hã. 11Taha pari, ma tô duré Raqueu hã oto tob'rata hârâ na sawi. Tawamhã wawa 'rãihâ na te duré ãma aiwa'õ. 12Tawamhã te tãma siwasu'u ãne:
— Wa hã aimama 'ra waptéb uptabi, Rebecaha 'ra.
Tawamhã ãne tãma siwasu'u wa, ma tô Raqueu wara, timama ma, te te tãma wasu'u da. 13Tawamhã ti'ra wapté wasu'u wẽ te te wapari wi, ma tô si'aba'ré na itẽme watobro, te te sõpẽtẽ da. Tawamhã Labã, Zaco te te sina uzusi wi, ma tô tinho'utu ti'â. Ma tô duré tob'rata hârâ na sawi. Ãhã wa, ma tô saprõ, tinhorõwa u. Tawamhã Zaco uburé tãma iromhâimanazé te te tãma wasu'u wa, 14ma tô Labã hã tãma tinha ãne:
— Ĩhe, tô sena tô, a hã ĩsiwapru uptabi.
Zaco, Léia norĩ ãma, Raqueu me ãma imro zahuré zé wasu'u
Tawamhã Zaco, misi a'amo na ma tô timama wapté nhorõwa ãma hã nhamra. 15Tawamhã Labã te Zacoho ma tinha ãne:
— Ĩma hã ibâi õ di, ĩsiwapru na aihâimana nherẽ, wa'âbâ ãna ĩma 're iromhuri mono da hã. Tahawa e niha te asima iwẽ, asimiromhuri wa'â 're imrami mono da hã.
16Labãhã 'ra sipi'õ te maparane 're hâimana zahuré. Idub'rata nhisi hã Léia na, duré ino nhisi hã Raqueu na. 17Léia hã simirob'madâ'â warõire di. Raqueu si i'ubu wẽ, duré ihâiba wẽ. 18Tawamhã Zacoho ma, Raqueu tãma iwẽ uptabi zarina, ma ãne asa ãma sada'â:
— 7 wahum na wa za tô aima romhu, Raqueu ãma ĩmro da hã.
19Tawamhã Labã ãne ma te ãma sada'â:
— Wẽ di ĩma hã, aibâ aimawi upana ĩ'ra te aima isõmri da hã. Tahawa, ãme ĩ'rata 're aihâimana mono.
20Tawamhã Zaco, Raqueu zô 7 wahum na ma tô te te 're romhuri. Tane nherẽ, te te 're sawi pese mono wa, ma tô bâtâ umro ne wa'a ãna te te sô 're romhuri pese. 21Tawamhã Zaco, 7 wahu oto iwa waptã'ã wamhã, ma tô timama wapté Labãhã ma tinha ãne:
— Ĩma sõmri oto pi'õ, ãma ĩmro da hã. 7 wahu wa te wasima itizé hã ma tô oto sa're. Tahawa wa oto ĩsima wẽ, ãma ĩmro da.
22Tawamhã Labã, dasa isa'ẽne ma tô 'manha. Tahawa, ma tô irob 're uburé 're idahâimana za'ra mono norĩ zô hã hâ. 23Tane nherẽ, tô taha mara na Labã, ti'ra Léia Raqueu upana ma tô tãma saprõ. Tahawa, Zaco iré hâimana mono wamhã, ma tô oto ãma panomro. 24(Labã, tite romhuri'wa Ziupa na isisi hã, ma tô ti'ra Léiaha ma tisõ, tãma iromhuri'wa da hã.) 25Tawamhã Zaco awẽm na si, Léiaha ré isõtõ na hã ma tô oto upsibi me. Tahawa timama wapté na timaprebaba ma, ma tô tãma aiwapsa. Tahawa te tãma tinha ãne:
— E marĩ da, ma ãne hã ĩma i'manha. Raqueu ĩma 're hâimana mono da wa tô aima te 're romhuri. E marĩ da, ma bété ĩma asadawa nhipe.
26Tawamhã Labã ma te asa ãma sada'â ãne:
— Ãhã ti'ai 're, 're iwahâimana za'ra mono zé hã, dano uimrehẽne dadub'rata wana, 're mro za'ra mono da, aibâ ma hã da te tãma 're sõmri za'ra mono õ di. 27Tahawa, dasa isa'ẽne asina aimro wa'aba saiwĩrĩzé te i'manharĩzém na hã a'â ã hã romhuri hã ãma si'utõrĩ. Tawamhã duré 7 wahum na ĩma 're romhuri mono da, a hã ropisutu da wapsi hã, wa za Raqueu ino hã oto aima tisõ za, aimro da.
28Tawamhã Zaco ma tô ãma saze. Tahawa Léia imrozém na dasa isa'ẽne ihâimana na misi romhuri si'utõrĩ pari, ma tô duré Labã ti'ra, Raqueu ãma mro da hã oto tãma tisõ. 29(Labã, tite romhuri'wa Bira na isisi hã, ma tô ti'ra Raqueu ma tisõ, tãma iromhuri'wa da hã.) 30Tawamhã Zaco, te oto duré Raqueu ãma hã hâimana. Léiaha nhipai u te õhõ si te te 're sawi pese. Tawamhã 7 wahum na, ma tô duré a'â te te tãma 're romhuri, Labãhã ma hã.
Zacoho 'ra norĩ wasu'u
31Tawamhã Uburé Danhib'apito, Zaco, Léia te te siwi iwẽ'õ na te te 'madâ'â wa, ma tô 'ra da hã tãma 'manha, wasã da. Tane nherẽ, Raqueu te zahadu 'ra waihu'u ãna 're hâimana. 32Tawamhã Léia oto wasã wamhã, ma tô i'ra hã tãma podo. Ta hã ma tô sisi, Rubẽ#29.32 Rubẽ hã hebreu norĩ mreme na “'Madâ'â, ĩ'ra hã!” aiwa prã na ne iwapari na hã, duré “Ta hã ma tô ĩwi irobzei'õzé 'madâ.” aiwa prã na ne iwapari na hã. na. Tawamhã ãne ma tô ãma rowasu'u:
— Uburé Danhib'apito robzei ãna ĩhâimanazé hã ma tô 'madâ. Tahawa ãhã na hã ĩmro te za oto ĩzawi â.
33Tawamhã duré Léia apâ wasã zahu wamhã, ma tô i'ra hã tãma podo. Ta hã ma tô duré sisi, Simiã#29.33 Simiã hã hebreu norĩ mreme na “dawapari” aiwa prã na ne iwapari na hã. na. Tahawa te ãne duré tinha:
— Uburé Danhib'apito, ĩmro te te ĩzawi'õzém na hã ma tô mapa. Tahawa ma tô duré ã hã ĩ'ra ĩma tisõ.
34Tawamhã Léia duré apâ wasã wamhã, ma tô i'ra tãma podo. Ta hã ma tô duré sisi, Levi#29.34 Levi hã hebreu norĩ mreme na “dahâiba sito” aiwa prã na ne iwapari na hã. na. Tahawa te duré ãne tinha:
— Ĩmro hã te za oto sina ĩhâibato pese, si'ubdatõ ĩzé're hawimhã i'ra hâimana za'ra wa oto.
35Taha pari duré apâ wasã wamhã, ma tô duré i'ra tãma podo. Tawamhã ta hã ma tô sisi, Zuda#29.35 Zuda hã hebreu norĩ mreme na “dawatazé” aiwa prã na ne iwapari na hã. na. Ãhã wa, te duré tinha ãne:
— Uburé Danhib'apito ãma wa za tô oto 're ĩwata.
Taha parimhã oto 'ra zahu õ di a'â, Léia hã.
Currently Selected:
Zenezi 29: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.
