Zenezi 34

Dina, aibâ te te ihâiba wamnarĩzé wasu'u

1Tawamhã nimahã bâtâ na Dina, Zacoho 'ra, Léiaha zé'remhã ma tô mo, taha ti'ai 're, tisiré pi'õ norĩ hã te te sabu za'ra da. 2Tamemhã te heveu norĩ siré 're hâimana, Hamo na isisi hã, taha ti'ai 're, danhib'ihâ'a na 're ihâimana mono hã. Taha 'ra, Siquẽ na isisi te duré 're hâimana. Tawamhã ta hã Dina we imorĩ na te te 'madâ'â wamhã, ma tô siptete sina te te sima âri wa, tãma rob'manha. 3Tipẽ'ẽ na ma tô sima 'madâ'â ze pese. Tahawa, te pi'õ zô ro'wapé, te te sawi âri da apâ. 4Taha pari te timama ma tãma tinha ãne:

— Azarudu ma'ãpé imama wi ĩma waptẽrẽ, ãma ĩmro da.

5Tawamhã Zaco, i'ra Dina, aibâ te te tãma irob'manharĩzé hã ma tô waihu'u. Tane nherẽ, te a'â ari'iwi tihâiba, i'ra si'aibâ norĩ a'ubuni ãma powawẽ te te 're i'madâ'â za'ra mono zém hawi isihutuzéb u. 6Taha ré, te Siquẽhẽ mama Hamo hã Zacoho u mo, te te tãma robzanhamri da. 7Tawamhã Zacoho 'ra norĩ, a'ubuni hawi oto sihutu wamhã, duré ãne na te te waihu'u za'ra wamhã, ma tô romhâimanazé iwasété uptabi na hã titob'uzu za'ra. Ma tô duré tizahi pese za'ra. E marĩ wa. Siquẽ hã, Izaraéu nhihudu norĩ ma rowazé te te tãma wazere za'ra wa, Zacoho 'ra hâiba te te iwamnarĩ u'âbâmhã. 8Tane nherẽ, te Hamo tãma nharĩ za'ra ãne:

— Ĩ'ra Siquẽ hã ma tô ai'ra za'ra wa'wa sawi'â. Tahawa wa aiwi tãma waptẽrẽ za'ra wa'wa, tãma hâiba nhomri za'ra wa'aba da, ãma mro da. 9Ãhã zarina wasiwadi na wasima 're iwahâimana za'ra mono da hã e wẽ õ di za bété. Ãne wamhã, te aré wa'ra sipi'õ norĩ hã ai'ra za'ra wa'aba norĩ na hã 're mro za'ra. Duré ai'ra wa'aba sipi'õ norĩ te aré duré wa'ra norĩ na 're mro za'ra. 10Ãme wanhipti'ai 're, wasiré 're aihâimana za'ra wa'aba mono. Asima iwẽ na duré ti'ai wa'õtõre norĩ hã uipra za'ra wa'aba mono. Duré asima iwẽ na marĩ wede na duré marĩ uipra na hã 're romhuri za'ra wa'aba mono.

11Tawamhã Siquẽ te ãne timama ma tinha, duré Dinaha hitébré norĩ ma hã:

— Ma'ãpé ãne na ãma ĩzaze za'ra wa'aba. Tawamhã wa hã asima iwẽ za'ra wa'aba zéb zarina wa za marĩ aima sõmri za'ra wa'wa iwa'rãmimhã. 12Asima iwẽ na damro wa'rãmi danhoprubzé hã ĩwi waptẽrẽ za'ra wa'aba. Duré ma'ãpé damro wa'â, te aima iwa'âbâ za'ra wa'aba da hã, niha hã ĩma pisutu za'ra wa'aba. Tô ĩma hâiba za'ré za'ra wa'aba, ãma ĩmro hâ.

13Tawamhã Zacoho 'ra norĩ 'rãnhipese sina ma tô Siquẽ, imama me hã ãma siwi sada'â, ihidiba za'ra Dina te te tiwi ihâiba wamnarĩ zarina. 14Tahawa te ãne tãma nharĩ za'ra:

— Wahidiba, wa te wasiwi ihâiba za'ré da hã mare di, aibâ isihâiwata nhizâri õ, ãma imro da hã, ãne hã wama 're irowazéb za'ra mono zé wa. 15Ãne wapsi wa za ãma wasiwi asaze ni za: Wasine za'ra, uburé asiré norĩ wa'wa aibâ norĩ sihâiwata nhihâri na hâimana za'ra wapsi. 16Ãne wapsi te za wa'ra norĩ na 're aimro za'ra wa'aba mo. Duré taha wapsi wa za wa norĩ hã ai'ra norĩ na asa 're wamro za'ra. Tawamhã duré aiwa'wa za'ra wa'aba 're wahâimana za'ra mono wamhã, wa za misi wawamri a'uwẽ ne hã wasiré 're wahâimana za'ra. 17Tane nherẽ, asihâiwata nhihâri na 're i'aihâimana za'ra wa'aba mono na ãma wazaze za'ra wa'aba õ wamhã, wa za õne haré oto ai'aba'ré ni, wahidiba ré.

18Tawamhã Hamo, ti'ra Siquẽhẽ me ma tô Zacoho 'ra norĩ, tinhimirosa'rada te te tãma ipibu za'ra zém na hã oto ãma saze za'ra. 19Tawamhã iprédupté Siquẽ hã imama nhorõwa 'remhã dama iwazéb za'ẽne hã ma tô bâdâ te te simini tõ da, õne haré sihâiwata nhizâri ni, Zacoho 'ra hã tãma sawi uptabi wa.

20Taha pari Hamo norĩ, ti'ra Siquẽhẽ me hã ma tô oto 'ri nho'õmo te, 'ridawa za'ẽtẽ na 're idanhisisi mono zéb u hã tineb zahuré, dasi'rã'õtõzéb u, 'ri nho'õmo wa, 're idahâimana za'ra mono norĩ ma, te te ãne dama anharĩ zahuré da:

21— Ã a'uwẽ norĩ hã isahi'õ, marĩ na isi'wapé da hã imare. Tahawa ma'ãpé wa te tãma waprosi za'ra wa'aba, wanhipti'ai 're, 're hâimana za'ra mono da, duré wawa'wab za'ra marĩ iwede na duré marĩ i'uipra na te te ãma 're romhuri za'ra mono da, sima duré wama za'ra. Ti'a hã sa'ẽtẽ uptabi di, tô iwab za'ra ite za'ra da hã. Ãhã wa, wa za i'ra na hã 're wamro za'ra. Duré õ norĩ hã te za wa'ra norĩ na 're mro za'ra. 22Taré oto wanhib'aibâ norĩ, isine za'ra sihâiwata nhihâri na 're hâimana za'ra mono da, wa te ãma saze za'ra wapsi, te za õ norĩ hã duré ãma wazaze za'ra, wawa'wa 're ihâimana za'ra mono da hã, misi a'uwẽ wamri ne wasiré 're wahâimana za'ra mono da. 23E ãne wamhã, uburé isipowawẽ norĩ hã, duré uburé isibrom norĩ hã duré uburé isimizama hâiba amo norĩ hã wama 're hâimana za'ra mono õ di za bété. Te za tô wama 're hâimana za'ra. Tinhimirosa'rada te te wama ipibu za'ra zém na wa te ãma saze za'ra wamhã, te za tô wawa'wamhã 're hâimana za'ra.

24Tawamhã uburé dasi'rã'õtõ u aibâ isi'aba'ré norĩ hã ma tô Hamo, duré i'ra Siquẽ hã ãma saze za'ra. Tahawa ma tô uburé 'ri nho'õmo 're aibâ norĩ hã sihâiwata nhihâri za'ra ni. 25Tawamhã duré si'ubdatõ bâdâ ãma ne pari, zahadu aibâ norĩ tinhihâiwata nhizârizé te te sépata za'ẽtẽ za'ra ré, ma tô Zacoho 'ra norĩ, Simiã norĩ, Levihi me, Dinaha hitébré norĩ hã tite sib'ézé 'wapa hã timra. Te te mrami zahuré wa, sa'rese ãna duré pi'uriwi 'ri nho'õmo u zasi zahuré wamhã, ma tô uburé aibâ norĩ hã a'mapãrĩ zahuré. 26Tahawa, ma tô duré Hamo norĩ zama Siquẽhẽ me dazu pãrĩ ni. Taha pari ma tô Simiã norĩ, Levihi me õne haré Siquẽhẽ nhorõwa hawimhã Dina hã wazere zahuré. Tawamhã ma tô duré oto iré tipusi zahuré. 27Tawamhã dapãrĩ hâimana pari, Zacoho 'ra hâiba amo norĩ, ma tô 'ri nho'õmo 're marĩ iwa'âbâ za'ẽne 're ihâimana za'ra mono hã siwi waibu, ihidiba za'ra, aibâ te te ihâiba wamnarĩ wa'rãmimhã.

28Tawamhã ma tô te te siwi simro pone'ẽrebâ norĩ hã, pone'ẽrebâ zéré uzé norĩ hã, powawẽ norĩ hã, duré awaru po're pore norĩ hã. Ma tô duré siwi 'wasa, uburé 'ri nho'õmo 're, duré a'ubuni wi marĩ 're ihâimana za'ra mono hã. 29'Ri 're, marĩ iwa'âbâ za'ẽne 're ihâimana za'ra mono te te siwi sani za'ra wamhã, ma tô uburé pi'õ norĩ hã, duré ai'uté norĩ hã te te siwi simro. 30Tahawa te Zaco, Simiã norĩ ma, Levihi me, tãma nharĩ zahuré ãne:

— A norĩ wa'wa ma tô ropire ĩzada iwazere 'wa. Tahawa te za a'uwẽ cananeu norĩ, perizeu norĩ, duré uburé ã hã ti'ai 're, 're idahâimana za'ra mono norĩ hã te te siwi 're ĩ'ruiwapari u'âsi. Duré ĩnhib'a'uwẽ si'aibâ norĩ ahâ õ di, wa hã. Tahawa ĩzada si'rã'õtõ wa, te te duré siwi ĩ'wapéi wamhã, te za uburé ĩsiwapru norĩ hã duré ĩ'ra norĩ hã ai'utõ.

31Tane nherẽ, ma te ãne asa hã ãma sada'âbâ za'ra:

— Wahidiba taré pi'õ, iwa'âbâ zô 're isisõmri mono ne, da te tãma rob'manharĩ nherẽ, marĩ wa te wasiwi 'manharĩ ãna iwahâimana za'ra da hã waihu'u õ di.

Currently Selected:

Zenezi 34: xavBP

Highlight

Copy