Zenezi 35

Bétéu u, apâ Zaco te te sina isirizé wasu'u

1Tawamhã 'Re ihâimana u'âsi mono, Zacoho ma, te ãne tinha:

— Ma'ãpé asima rob'ubumro na, Bétéu u apâ aimorĩ da, tame 're aihâimana mono da. Tame te za ẽtẽ za'ra ĩma danhoprubzé zata zéb da hã ĩma i'manha, wa hã 'Re ihâimana u'âsi mono, adub'rada Ezauhu wi aimani wa, aima ĩsihâi'ré ma.

2Tawamhã Zaco te uburé isõrõwa 're, 're ihâimana za'ra mono norĩ ma nharĩ za'ra, ãne:

— Wasiré a'uwẽ'õ norĩ te, ihâiba'õ norĩ ma, romhâibarĩ na ãma 're idawata za'ra mono hã aima ihâimana za'ra wa'wa hã, te za asiwi isãmra 'wa. Ma'ãpé asipese za'ra wa'aba. Duré da'uza ihâi uptob'õ na te za asi'uza za'ra wa'wa. 3Ma'ãpé asima rob'ubumro za'ra wa'aba, Bétéu u wasi'aba'ré da. Tame wa za 'Re ihâimana u'âsi mono, te robzépata ré, te te 're ĩpawapto mono ma hã, duré uburé daro mono bâ 're ĩmorĩ ré, ĩsiré 're ihâimana mono ma 'manha, ẽtẽ za'ra hã.

4Tawamhã Zacoho ma, ma tô isiré a'uwẽ'õ norĩ te romhâibarĩ hã duré dapo're za'ruzé tãma sõmri za'ra. Tahawa, Siquẽ 'rata rowede iwazéb zahi 're isa mono zahâpâ ma tô uburé ãma ti'a za'ra. 5Tawamhã duré oto si'aba'réi wamhã, 'Re ihâimana u'âsi mono, Zaco norĩ waptoma 'ri nho'õmo norĩ 're, 're idahâimana za'ra mono ma hã, ma tô dapahi uptabi sina dahâimana za'ra da hã dama 'manha. Tahawa Zacoho zarina dasi'aba'réi õ di, da te ãma dasiwi ro'wa'rutu da hã.

6Ãne ma tô Zaco, uburé tite a'uwẽ norĩ ré hã wi, Rowa'a na 'ri nho'õmo nhisi u, Bétéu na isisi amoi u, Cana'ã ti'ai 'remhã. 7Tawamhã tame ma tô ẽtẽ za'ra hã 'manha, 'Re ihâimana u'âsi mono ma. Ta hã ma tô sisi, “Bétéu te, 'Re ihâimana u'âsi mono” na. E marĩ wa. Tame tãma sihâi'ré wa, tidub'rata ma, simani wamhã. 8Ta rob ãma Débora, Rebeca te te iwarahu hã ma tô dârâ. Dâ'â wamhã, wede iwazéb zahi, 're isa mono zahâpâ ma tô siwi tisẽ, Bétéu hâiwa nhimire niwĩ 're ihâimana mono ãma. Tahawa isisi hã ãne: “Wede iwazéb zahi ãma datõmo'u dawi 're ipraba mono” na.

9Tawamhã Zaco, Mezopotãmia hawi apâ te te sina siri wamhã, ma tô 'Re ihâimana u'âsi mono hã tãma isihâi'ré na ãma tãma sahu. Tahawa, iwẽ te te tãma 're i'apisutu mono zéb na hã 10te ãne tãma tinha:

“A hã Zaco na asisi tô. Tane nherẽ, ãne hã oto asisi õ di za.

Asisi hã za oto Izaraéu na.”

Ãne 'Re ihâimana u'âsi mono, ma tô Izaraéu na sisi. 11Tawamhã ãne na zama te duré sina tãma tinha:

“Wa hã 'Re ihâimana u'âsi mono, danhipai u pese ĩwaihu'u pese uptabi.

Ma'ãpé atébré za, ai'ra ahâ da, duré asihudu ahâ da.

Aihawimhã te za a'uwẽ misi ãma isitom na dasipu'u pese na daro mono bâ 're dasitébré.

Duré asihudu norĩ 'remhã te za dama 're si'apito za'ra za.

12Tawamhã Abra'ãhã ma, duré Izaquihi ma, ti'a te isõmri hã, ta hã aima zama wa za oto tisõ.

Taha parimhã wa za asihudu norĩ ma tãma sõmri za'ra, ai'uirĩ na.”

13Tawamhã 'Re ihâimana u'âsi mono, Zacoho ma, te te tãma nharĩ pari, ihawimhã ma tô hâimo oto mo. 14Tahawa Zaco, 'Re ihâimana u'âsi mono te te tãma inharĩzéb ãma, ma tô ẽne itõmo waré hã 'mai'â, hâiwi te te sãrĩ da. Ta hã 'Re ĩhâimana u'âsi mono te da, te te tãma pisutu wa, ma tô duré uwa 'rãi wa'u isé hã, duré azeitona 'rãi wa'u to hã isisiwimhã sa'wa. 15Tawamhã ta hã ro, ma tô duré sisi, Bétéu na.

Raqueu idâ'âzé wasu'u

16Tawamhã Zaco norĩ ma tô Bétéu hawimhã oto wairé. Duré Efrata na 'ri wa'õtõ nhisi u 'râwi te te oto sina rotété za'ra wamhã, ma tô oto Raqueu ãma iwasã hã sépu. Tahawa, te sépata hâ pese. 17Tawamhã oto sa'ẽtẽ iwasã ãma sépu'u wamhã, te isapari'wa hã tãma tinha ãne:

— Aipahi tõ. Aibâ na te za duré ai'ra hã aima podo.

18Tane nherẽ, tãma irob'rãsutuzéb u hã romhuture di oto. Tawamhã ipẽ'ẽzani tiwi watobro wana ré, ma tô sisõ'a ré ti'ra si'watébrémi sisi, Benoni#35.18 Benoni hã hebreu norĩ mreme na “Ĩwi irobzei'õzé siwaprã, ĩ'ra ĩma ipodo.” aiwa prã na ne iwapari na hã. na. Tane nherẽ, imama ma tô sisi, Bẽzami#35.18 Bẽzami hã hebreu norĩ mreme na “ĩ'ra, uburé marĩ iwẽ na tãma iwatobro” aiwa prã na ne iwapari na hã. na.

19Raqueu dâ'â wamhã, ma tô Efrata u bâdâdi zada'ré ãma dasiwi sẽrẽ ni, ãhã na 'ri wa'õtõ nhisi hã Belẽ na. 20Tahawa Zaco, i'ru ãma ma tô ẽne itõmo waré hã hâiwi tisã. Ta hã te zahadu ãhã na hã ipibui pese zéb da, i'ru ãma 're sa. 21Taha pari Zaco, ta hawi oto watobro wamhã, ma tô Éde na romnhisi ãma dasipapara rob'madâ'âzéb da, 'ri 'rãihâ 're isa mono zababa romhâ 'manharĩ na 'ri hã sima sõré.

Zacoho 'ra norĩ wasu'u

22Tawamhã taha rob ãma Zaco 're hâimana mono ré, ma tô i'ra Rubẽ, Zacoho mro prã na Bira tãma ihâiba hã tiwi upi wasété. Ãne hã imama te te waihu'u wamhã, ma tô ab'rui pese.

Zacoho 'ra uburé hã 12 na. 23Ã norĩ hã, Léiaha zé're hawi ipoto za'ra: Rubẽ, Zacoho 'ra dama ipoto'rada, Simiã, Levi, Zuda, Isaca, duré Zébulõ. 24Ã norĩ, Raqueu zé're hawi ipoto zahuré hã: Zuzé, duré Bẽzami. 25Bira, Raqueu ma romhuri'wa zé're hawi ipoto zahuré hã ã norĩ: Dã, duré Naftali. 26Ziupa, Léiaha ma romhuri'wa zé're hawi ipoto zahuré hã ã norĩ: Gadi, duré Asé. Ã norĩ hã Zacoho 'ra, Mezopotãmia na romnhisi ãma hã ma tô tipoto za'ra.

Izaqui idâ'âzé wasu'u

27Tawamhã Zaco, timama Izaquihi siré 're hâimana mono da hã ma tô mo Mare na 'ri nho'õmo nhisi u, Arba na isisi amoi u, Hebrõ na 'ri nho'õmo nhisi 'rata 're ihâimana mono u, Abra'ã, Izaquihi siré aré 're isãmra mono zéb u. 28Tawamhã Izaquihi ãma hã ma tô oto tiwahu, 180 na. 29Tawamhã si'ihi pese wamhã, Izaqui hã ma tô oto dârâ. Tahawa, i'ra Ezau norĩ, Zacoho me ma tô sẽrẽ zahuré.

Currently Selected:

Zenezi 35: xavBP

Highlight

Copy