SAME 147
147
A Vakacaucau me Baleta na Kalou Kaukauwa
1Ni vakacaucautaki Jiova!
Sa ka vinaka me da laga sere ni vakacaucautaka na noda Kalou;
Sa ka talei ka kilikili me da vakacaucautaki koya.
2Sa tarai Jerusalemi vou tale ko Jiova;
Sa kauti ira lesu tale na tamata era a kau vakabobula.
3Sa vakabulai ira sa kavoro na utodra
Ka vauca na nodra mavoa.
4Sa lewa o koya na kedra i wiliwili na kalokalo,
Ka kacivi ira yadudua ena yacadra.
5Sa cecere ka qaqa na noda Turaga;
Sa sega ni kilai rawa na nona vuku.
6Sa vueti ira cake na yalo malumalumu ko Jiova;
Ia, sa vakabalei ira sobu ga na tamata ca ki na qele.
7Ni seretaka na sere ni vakavinavinaka vei Jiova,
Ni qiria na i vakatagi ena api vua na Kalou.
8Sa tabonaka na lomalagi ena o;
Sa vakatauca mai na uca ki na vuravura,
Ka sa vakatubura na co ena veidelana.
9Sa solia vei ira na manumanu na kedra kakana,
Ka vakani ira na reveni lalai ni ra sa tagi mai.
10Sa sega ni vu na nona marau ena kaukauwa ni ose;
Se rekitaka na nodra kaukauwa na sotia,
11Ia, sa marautaki ira ga sa rerevaki koya,
O ira era sa vakararavi ki na nona loloma tudei.
12I Jerusalemi, mo vakacaucautaki Jiova!
I Saioni, mo vakacaucautaka na nomu Kalou!
13Sa vakaukauwataka na nomuni i sogo lawalawa kaukamea
ni nomuni matamata o koya;
Ka sa vakalougatataki ira na nomuni tamata.
14Sa taqomaka vinaka na i yalayala ni nomuni vanua
Ka vakamamautaki kemuni ena witi vinaka sara.
15Sa tala yani na nona i vakaro
Ka sa yaco totolo sara mai ki vuravura.
16Sa solia mai na wai cevata me vaka na vavaku ni vutinisipi,
Ka kaburaka na uca cevata me vaka na soso.
17Sa vakatauca mai na uca cevata me vaka na qereqere,
Ka sa sega ni dua e vosota rawa na batabata, sa tala mai o koya!
18Ia sa qai vosa ga o koya ka sa waicala sara na wai cevata
Sa tala mai na cagi ka sa drodro sara na wai.
19Sa solia na nona i tukutuku vei Jekope;
Na nona i vakaro kei na lawa vei Isireli.
20Sa sega ni cakava na ka oqo o koya me baleti ira na veimatanitu tani;
Era sa sega ni kila na nona lawa.
Ni vakacaucautaki Jiova!
Currently Selected:
SAME 147: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
