SAME 146
146
Me Laveti ka Rokovi na Kalou na i Vakabula
1Me vakacaucautaki ko Jiova!
Me vakacaucautaki Jiova, na yaloqu!
2Au na vakacaucautaki Jiova ga ni se tiko na i cegu ni bula;
Au na sere vua na noqu Kalou ena noqu bula taucoko.
3Ni kakua ni vakararavi vei ira na luvenitui,
Se vua tale e dua sa sega ni rawata me veivakabulai.
4Ni ra sa mate, era sa suka lesu tale ki na qele,
Ka sa cava ena siga o ya na nodra i naki kecega.
5Sa kalougata na tamata sa nona i vukevuke na Kalou i Jekope,
Ka vakararavi vei Jiova na nona Kalou,
6O koya sa bulia na lomalagi, na vuravura kei na wasawasa
kei na veika kecega sa tu kina.
Sa dau vakayacora ga o koya na veika sa yalataka; #Caka 4.24; 14.15
7Sa dau lewa vakadodonu ena vukudra era vakararawataki,
Ka solia na kedra era viakana.
Sa sereki ira era vesu tu ko Jiova,
8Ka dolava na matadra era mataboko.
Sa vueti ira cake era tabaki sobu;
Sa lomani ira na nona tamata yalododonu.
9Sa taqomaki ira na kai tani ko Jiova
Sa vukei ira na yada kei na luveniyali,
Ia sa vakarusa na nodra i naki na tamata ca.
10Ena Tui ko Jiova ka na sega ni mudu!
Na nomu Kalou, i Saioni, ena veiliutaki ena veigauna kecega.
Me vakacaucautaki ga ko Jiova!
Currently Selected:
SAME 146: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
