SAME 145
145
A Sere ni Vakacaucau
A Sere ni vakavinavinaka. A nei Tevita.
1Au na tusanaka na nomuni cecere,
oi kemuni na noqu Kalou ka noqu Tui;
Au na vakavinavinaka vei kemuni ka sega ni mudu.
2Au na vakavinavinaka vei kemuni ena veisiga kecega;
Au na vakacaucautaki kemuni ka sega ni mudu.
3Sa cecere ko Jiova ka sa dodonu me vakacaucautaki vakalevu sara;
Sa sega ni yacova rawa na noda vakasama na nona cecere.
4Na nomuni cakacaka ena vakacaucautaki ena dua na i tabatamata
ki na i tabatamata ka tarava;
Era na tusanaka voli na cakacaka ni ligamuni kaukauwa.
5Era na tukuna voli na tamata na nomuni lagilagi
kei na nomuni ukuuku vakaturaga,
Ka'u na dau vakananuma na nomuni veicakacaka veivakurabuitaki.
6Era na tukuna voli na tamata na nomuni veicakacaka kaukauwa,
Ka'u na tusanaka na nomuni cecere.
7Era na dau tukuna voli na nomuni vinaka kecega
Ka seretaka na nomuni yalovinaka.
8Sa yalovinaka ka dau mataloloma ko Jiova;
Sa dau berabera ni cudru ka sa sinai ena loloma tudei.
9Sa yalovinaka ga ko Jiova vei ira na tamata kecega,
Ka sa yalololoma ki na ka kecega sa bulia.
10Ena vakacaucautaki kemuni Jiova na veika kece o ni sa bulia,
Ka ra na vakacaucautaki kemuni na nomuni tamata.
11Ena tukuna voli na lagilagi ni nomuni matanitu,
Ka veivosakitaka na nomuni qaqa;
12Me ra na kila kina na nomuni cakacaka mana na tamata kecega,
Kei na lagilagi vakaturaga ni nomuni matanitu,
13Sa sega ni yalani na nomuni matanitu,
Ka o ni na tui tikoga ka sega ni mudu.
14Sa vukei ira kecega era leqa,
Ka vueti ira cake era tabaki sobu.
15Era sa rai vei Jiova ena vakanuinui ena ka kecega
Ka sa solia vei ira na kedra ena gauna era gadreva kina.
16Sa dodoka yani na ligana,
Ka vakamamautaka na ka bula kecega ena ka era gadreva.
17Sa dodonu ko Jiova ena ka kecega e cakava,
Ka yalololoma ena nona cakacaka kecega.
18Sa dau voleka ko Jiova vei ira kece era dau masu vua,
O ira sa dau masuti koya ena yalodina.
19Sa dau solia na ka era gadreva na tamata era rerevaki koya,
Sa dau rogoca na nodra masu ka vakabulai ira.
20Sa taqomaki ira kecega era lomani koya,
Ia, era na vakarusai ga o ira kece na tamata ca.
21Au na dau vakacaucautaki Jiova tikoga;
Me ra vakacaucautaka na yacana na ka buli kecega
ka sega ni mudu.
Currently Selected:
SAME 145: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
