SAME 144
144
A Masu ni Vakavinavinaka Vua na Kalou
A nei Tevita.
1Me vakacaucautaki ko Jiova,
o koya sa dautaqomaki au;
Sa vakavulici au ena vuku ni veivaluvaluti,
Ka vakarautaki au vinaka me'u ia na i valu.
2Sa noqu i sasabai ka dauveimaroroi o koya,
Sa i koya na noqu i vakaruru ka noqu i vakabula,
Ka'u sa vakararavi kina me'u taqomaki.
Sa vakamalumalumutaki ira na veimatanitu vei au.
3Kemuni Jiova,
A cava na tamata mo ni kauwaitaki koya kina;
Na tamata ka sa vakaicavacava ga na nona bula,
mo ni qai nanumi koya kina? #Jope 7.17,18; Same 8.4
4Sa vaka wale ga e dua na i cegu cagi o koya;
Na nona veisiga sa vaka na takali yani ni yaloyalo ni dua na ka.
5Ni biliga sobu na lomalagi, i Jiova, ka lako sobu mai;
Ni tara na veiulunivanua, ka ra na qai kubou yani.
6Ni tala mai na yameyame ni livaliva
me vakasavi ira na meca;
Ni vanataka na nomuni dakaititi, ka vakacicivi ira tani yani.
7Ni dodoka sobu mai na ligamuni mai lomalagi,
Ka vueti au mai na wai titobu, ka vakabulai au;
Ni vakabulai au mai na ligadra na kai tani,
8O ira era sega ni bau dau tukuna na ka dina,
Ka ra dau lasu sara mada ga ni ra bubului.
9Au na seretaka vei kemuni na Kalou e dua na sere vou;
Au na qiria na api ka sere vei kemuni.
10O ni sa solia na qaqa vei ira na tui eso
Ka vakabula na nomuni dauveiqaravi o Tevita.
11Ni vakabulai au mai vei ira na kai tani
Era sega ni dau tukuna na ka dina,
Ka dau lasu sara mada ga ni ra bubului.
12Me ra na kau tubu kaukauwa cake
Na luve i keimami tagane ena nodra gauna ni cauravou.
Me ra vaka na vatu ni vakananumi ena veivale ni tui
Na neimami goneyalewa.
13Me sinai na neimami lololo
Ena veimataqali vua ni qele kecega.
Me udolu vakaudolu na luve ni sipi
Ena neimami vanua.
14Me vakaluveni vakalevu sara na neimami bulumakau
Ka me ra kakua ni vakalutu se mate.
Me kakua ni dua na tagi ni rarawa me rogo
ena neimami veigaunisala.
15Sa kalougata na matatamata sa yaco dina kina na ka oqo;
Sa kalougata na matatamata sa nodra Kalou ga ko Jiova.
Currently Selected:
SAME 144: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
