SAME 143
143
A Masu ni Kere Veivuke
A Same i Tevita.
1I Jiova, mo ni vakarorogo ki na noqu masu,
Ka rogoca na noqu kerekere!
Mo ni rogoci au ena nomuni yalododonu kei na lomadina.
2Ni kakua ni veilewaitaki au;
Sa sega sara ni dua me sega ni cala e matamuni. #Roma 3.20; Kala 2.16
3Sa vakararawataki au na kequ meca
Ka vakadrukai au sara vakadua.
Sa biuti au o koya ena vale ni veivesu butobuto,
Ka'u sa vakataki ira era sa mate makawa sara.
4Sa vakarau sara ga me'u sa soro
Ka'u sa domobula sara vakalevu.
5Au sa qai nanuma na veisiga sa oti yani;
Au mani vakasamataka na veika kece o ni a cakava;
Ka'u sa nanuma na nomuni cakacaka kecega.
6Au a qai laveta cake na ligaqu vei kemuni ena masu;
Me vaka na kena gadreva na wai na qele mamaca,
sa viagunu vakakina vei kemuni na yaloqu.
7I Jiiova, mo ni sauma mai oqo na noqu masu!
Sa oti vakadua kece sara na noqu i nuinui!
Ni kakua ni vunitaki kemuni vei au,
De'u na qai kune ena kedra maliwa era sa lako sobu ki bulu,
Io, ki na nodra vuravura na mate.
8Au sa vakanuinui vei kemuni,
Ni vakadeitaka vei au ena veimataka lailai
ena nomuni loloma tudei.
Sa lako cake yani vei kemuni na noqu masu;
Ni qai vakaraitaka vei au na sala me'u muria.
9Au sa lako mai ki na nomuni veitaqomaki, Jiova;
Ni vakabulai au mai vei ira kece na kequ meca.
10Sa i kemuni ga na noqu Kalou;
Ni vakavulici au me'u vakayacora na lomamuni.
Mo ni yalovinaka ga vei au, ka tuberi au ena sala dodonu.
11Ni vakabulai au Jiova me vaka na nomuni vosa ni yalayala;
Ni vakabulai au mai na noqu leqa ena nomuni vinaka.
12Ni qai vakamatei ira na kequ meca ena vuku ni nomuni lomani au,
Ka vakarusai ira kece era vakararawataki au,
baleta ni'u sa nomuni tamata.
Currently Selected:
SAME 143: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
