VOSA VAKAIBALEBALE 6
6
Ai Vakasala Eso
1Na luvequ, o sa yalataka li mo sauma na nona dinau e duatani tale na tamata? 2O sa coko beka ena nomu vosa ka tacori ena nomu vosa ni yalayala? 3Ia oqo na luvequ, o sa tu ena ligana na tamata o ya, ia sai koya ga oqo na sala mo sereki iko kina: Mo lako vakatotolo sara vua ka vakamasuti koya me sereki iko. 4Kakua mada ni o vakusakusa mo la'ki moce se mo cegu vakalekaleka. 5Mo lako tani rawa vakatotolo mai na dai, me vaka na manumanu vuka se na dia sa dro mai na ligana na dauvakasasa manumanu.
6O ira na tamata vucesa e dodonu me ra vuli mai na nodra bula na qasikalolo. 7Sa sega ni dua na nodra i liuliu, se turaga, se tui, 8ia era sa kumuna na kedra kakana ena vula i katakata me baleta na vula i batabata. 9Ena vakaevei na dede ni nona davo voli na tamata vucesa? Ena qai duri cake li ena gauna cava? 10#Vbale 24.33,34Sa kaya ga na tamata vucesa, Au se davo mada ga vakalailai; au se roqo liga mada ka vakacegu vakalailai. 11Ia ni sa moce koto ga, ena qai ravuti koya o dravudravua me vaka e dua na daubutako vakaiyaragi.
12Era sa veilakoyaki voli ka tukuna wavoki na i tukutuku lasu o ira na tamata tawayaga ka vucesa. 13Sa sauriva na matadra ka ra sa vakatabataba me ra vakacalai iko, 14ka ra sa bosea tikoga na veika ca e yalodra ka ia na vakatubu ca ena veiyasana kecega. 15Ena vuku ni ka oqo, ena yacovi ira kina vakasauri na leqa ka ra na mavoa vakaca sara.
16E ono na ka sa cata ko Jiova; io, e vitu sa ka vakasisila vua: 17na rai vakaviavialevu, na yame lasulasu, na liga sa vakamatea na tamata sa sega ni cala, 18na yalo sa nakita na veika ca, na yava sa totolo yani ki na caka ca, 19na i vakadinadina lasu sa cala na nona i tukutuku, kei na tamata sa vakavuna na veivala vei ira na wekana.
Na i Vakasala me Kakua na Veibutakoci
20Na luvequ, mo muria na i vakaro i tamamu ka kakua ni guilecava na i vakavuvuli i tinamu. 21Mo vauca tikoga oqo ki lomamu, ka vakaisalusalutaka e domomu. 22Era na dautuberi iko ni o sa lako voli, ena taqomaki iko ena bogi, ena vakasalataki iko ena siga. 23Sa cina serau na nodrau i vakaro ka sa sala ni bula na nodrau veivakadodonutaki. 24Ena maroroi iko mai vei ira na yalewa ca kei na nodra vosa veicavilaki na watidra na tagane tale eso. 25Kakua ni rawai ena kedra rairai totoka; kakua talega ni tacori mai na rai ni gagano e matadra. 26Sa rawa vua e dua na tagane me sauma na yalewa dauvolitaki koya ena i sau ni buli madrai, ia na i sau ni veibutakoci ena kania na veika kece e taukena na tagane oqo.
27O na rawa beka ni biuta ki lomaseremu na bukawaqa ka me qai sega ni kama na nomu i sulu? 28O na rawa li ni lako ena dela ni qilaiso waqa ka me qai sega ni kama na yavamu? 29Sa rerevaki vakakina o koya sa moce vata kei na watina e dua tale na tagane. O koya sa kitaka oqo ena sota kaya ga na kena i totogi. 30Era sa sega ni cudruvi koya na daubutako o ira na tamata kevaka e la'ki butako me vakacegui koya kina ena vuku ni nona viakana. 31Ia kevaka e mani vesu, e dodonu me na vakavitutaki na ka me sauma lesu, ka veitalia ga kevaka ena vakayalia kina na i yau kece e tu vua. 32Ia na tamata sa veibutakoci sa sega ni yalomatua; sa vakarusai koya ga vakataki koya. 33Na rogo ca kei na mavoa sa nona i votavota, ka na sega ni taqusi tani vakadua na nona madua. 34Sa daucudru katakata ga na tagane vakawati ena gauna sa tarai koya kina na yalovuvu, io ena sega tale ni qai yalololoma kina ena siga ni veisausaumi. 35Ena sega ni ciqoma e dua na i soro ni ca sa vakayacori vua; ena bese ga ni taura e dua na i solisoli se veivaqumi, ka veitalia na kena levu.
Currently Selected:
VOSA VAKAIBALEBALE 6: FNV
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.