VOSA VAKAIBALEBALE 7
7
Na i Veivakacalai ni Veibutakoci
1Na luvequ mo muria noqu vosa ka kakua ni guilecava na noqu i vakavuvuli. 2Mo vakayacora na veika au sa vakavulica vei iko mo bula kina. Qarauna vinaka mo muria na noqu i vakavuvuli me vaka na nomu taqomaka na yaloka ni matamu. 3Mo vakayacora na noqu i vakavuvuli ena veigauna kecega, ka mo vola sara ki na vu ni yalomu. 4Mo okata na yalomatua me ganemu, ka okata na lomavuku me nomu i tokani voleka sara. 5E rau na taqomaki iko mai na watidra na tagane tani, mai vei ira na yalewa dauveitemaki ena nodra vosa.
Na Yalewa Dautagane
6Au a vakararai toka mai na katubaleka ni noqu vale ena dua na gauna, 7ka'u raica sara e vuqa na cauravou era sa sega ni yalomatua, ia au a vakaraica toka e dua vei ira ka sa rui yalowai sara vakalevu. 8A lako voli yani na cauravou oqo ena gaunisala, ka muria yani na sala sa volekata na i tikotiko ni dua na yalewa 9ni sa karobo sobu na vanua, ka sa ologi vuravura na butobuto ni bogi. 10A qai lako mai na yalewa o ya me rau sota; a sa vakaisulu tu me vaka na yalewa dauvolitaki koya ka sa qaseqase na yalona. 11Sa yalo doudou na yalewa oqo ka sega ni madua; sa sega ni dau tiko vakamalua e vale 12ni sa dauwawa voli ga ena i gole ni sala, kei na gauna eso ena bati ni sala, vata kei na gauna tale eso ena veivanua ni veivoli. 13A sa mokoti cauravou ka reguca; ka rai vakadodonu ki na yaloka ni matana, ka tukuna vei cauravou, 14Au sa cabora oti na noqu i madrali ni veivinakati, ka'u sa ia oti na noqu bubului ena siga edaidai. 15Ia au sa lako mai kina oqo me'u vakasaqarai iko, ni'u sa gadreva dina me'u sotavi iko, ka'u sa kunei iko! 16Au sa ukutaka oti tu na noqu i davodavo ena i sulu, ena siti lineni totoka duiroka ni Ijipita. 17Au sa kaburaka oti kina na i vakaboi vinaka, oqori na mura, na yasi kei na sinamoni. 18Lako mai! Me daru moce vata mada me yacova na kida ni mataka, ka vakacegui kedaru ena marau ni dodomo. 19E sega ni tu oqo e vale na watiqu. E se lako tu vakayawa sara o koya. 20E dua na i lavo levu e kauta tu, ka na qai lesu mai ni oti e rua na macawa. 21Mai na veivosa kamikamica, a sa temaki cauravou kina, ka sa rawai koya mai na vosa veicavilaki ni gusuna. 22E sega ni bera ni sa muri yalewa yani o cauravou, me vaka na bulumakau sa kau yani me la'ki vakamatei, se vaka na dia sa ciciva yani na dai, 23me yacova ni sa coba ki yatena na gasau. A sa vaka na manumanu vuka sa vakusakusa yani ki na i cori, ka sega ni kila ni na vakaleqai kina na nona bula.
24Ia oqo, kemudou na luvequ, mo dou vakarorogo mada vei au. Dou rogoca vinaka na vosa ni gusuqu. 25Dou kakua ni vakatara me rawai na yalomudou mai vua na yalewa vakaoqo; kakua ni lako sese voli ena nomu vakasaqarai koya. 26Ni sa vakaleqai ira oti e vuqa na tagane o koya ka sa vakavuna na nodra mate e lewe vuqa. 27Kevaka o na lako ki na nona vale, o sa muria tiko na sala ki na vuravura ni mate. Oqo na gaunisala lekaleka ki na mate.
Currently Selected:
VOSA VAKAIBALEBALE 7: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
