VOSA VAKAIBALEBALE 8
8
Na Vakacerecerei ni Yalomatua
1 #
Vbale 1.20,21 Rogoca mada! Sa kacikaci tiko o Yalomatua.
Sa kaci mai me rogoci o lomavuku.
2Sa tucake tu o koya ena veidelana ena yasa ni sala
Kei na veibasoga ni gaunisala.
3Sa kaci mai ena yasa ni matamata ni koro,
Kei na mata ni katuba ni curucuru me vakaoqo:
4Au sa vakamasuti kemuni kece sara;
Au sa kacivi kemuni na tamata kecega e vuravura.
5O ni sa yalowai tiko beka? Ni vulica mo ni yalomatua.
O ni sa lecaika tiko beka? Ni vulica mo ni kila-ka.
6Ni rogoca na noqu veivosa momona oqo;
Sa dodonu na veika kece au tukuna vei kemuni.
7Sa vosataka ga na ka dina na gusuqu;
Ka'u sa cata sara na lasu.
8Sa dina na veika kece sara au sa kaya;
Sa sega na ka e lasu se veivakacalai.
9Sa macala vinaka vei ira sa yalomatua;
Ka sa matata vinaka vua sa sinai ena kila-ka.
10Digia ga na noqu i vakaro ka me kakua na siliva.
Digia ga na kila-ka ka me kakua na koula dina sara.
11Oi au o Yalomatua, ka'u sa uasivi cake mai na vatu talei;
Sa sega na ka o vinakata me vakatauvatani kei au.
12Oi au o Yalomatua, sa tu vei au na rai yawa;
Sa tu vei au na kila-ka kei na vakatulewa matau.
13Na rerevaki Jiova sai koya na cata na ca;
Au sa cata na dokadoka kei na viavialevu,
Na i tovo ca kei na vosa lasu.
14Au sa dau tuvatuva-ka, ka'u sa vakayacora na kena cakacaka.
Sa tu vei au na kila-ka, ka'u sa kaukauwa talega.
15Au sa vukei ira na tui ena nodra veiliutaki
Kei ira na i liuliu me ra buli lawa vakavinaka.
16Sa ia na veiliutaki na i liuliu kecega mai na noqu veivuke,
Sa vakakina o ira na vakalesilesi kei na kawa vakaturaga.
17Au sa lomani ira era sa lomani au;
O koya sa vakasaqarai au ena kunei au.
18Era bini tu vei au na i yau kei na ka dokai me'u solia,
Na bula sautu kei na rawa ka.
19Na ka o na rawata mai vei au sa uasivita na koula dina,
Sa ka vinaka cake sara mai na siliva digitaki.
20Au sa lako ena sala ni yalododonu;
Ka'u sa muria voli na sala ni lewa dodonu,
21au sa solia me ra vutuniyau o ira era sa lomani au,
Ka vakasinaita na nodra vale ena i yau talei.
22 #
Vtaki 3.14
A sa buli au taudua e liu ko Jiova,
Na i sevu ni nona cakacaka mai liu sara.
23Au a buli mai na i vakatekivu ni gauna,
Mai liu sara ni bera ni tauyavu o vuravura.
24Au a sucu ni bera ni buli na wasawasa,
Ni bera ni dua na mataniwai e basika.
25Au a sucu ni bera ni tauyavu na veiulunivanua,
Ni bera ni ra qai buli na veidelana,
26ni bera ni bulia na Kalou na vuravura kei na vanua
Se na i matai ni bulibuli qele.
27Au a tu e kea ni sa vakarautaka o koya na lomalagi,
Ni sa cakava na i yalayala ni wasawasa e dela ni wai titobu,
28ena gauna sa bulia kina na o ni lomalagi,
Ena gauna sa bulia kina na i vurevure ni wasawasa,
29ka sa vakarota kina na wai ni wasawasa
Me kakua tale ni tubu cake me vaka na nona vosa.
Au a tu e kea ena kena vakayavutaki o vuravura.
30Au a tu e tikina me vaka e dua na daudroini vale,#8.30 daudroini vale; se gone lailai.
Ka'u sa vu ni nona reki ena veisiga,
Ka'u sa marau tikoga e matana
31ka marau vata kei na vuravura
Ka sa taleitaki ira na kawa tamata.
32Ia oqo, mo ni vakarorogo mada vei au, ragone.
Ni muria na noqu vosa, mo ni na qai marau kina.
33Ni rogoca vinaka na ka o ni sa vakavulici kina.
Mo ni yalomatua; kakua sara ni vakawaletaka.
34O ira era na vakarorogo vei au era na kune kalougata
O ira sa tiko ga ena noqu mata ni katuba ena veisiga,
Ka wawa tiko ena matamata ki na noqu vale.
35O ira sa kunei au sa kunea na bula,
Ka sa taleitaki ira ko Jiova.
36O ira sa sega ni kunei au sa vakacacani ira ga vakai ira;
O koya sa cati au sa vinakata ga na mate.
Currently Selected:
VOSA VAKAIBALEBALE 8: FNV
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.