VOSA VAKAIBALEBALE 5
5
Ai Vakasala me Kakua na Veibutakoci
1Na luvequ mo vakarorogo mada, ka rogoca vakavinaka na noqu yalomatua kei na lomavuku. 2O na qai kila kina na sala mo i tovo vinaka kina, ka na vakaraitaka talega na nomu vosa kei na nomu kila-ka. 3Sa kamica me vaka na oni na tebe ni gusuna na watina na tamata tani, ka sa yagoyago vinaka me vaka na waiwai olive na nona i regu, 4ia ni sa oti na ka kecega, sa qai biuta tu mai vei iko o koya na gaga kei na mosi ni lomamu. 5Ena kauti iko sobu o koya ki na nodra vuravura na mate; na sala sa muria sa sala ga ki na mate. 6Sa sega ni kabita o koya na sala ni bula; ia sa lako tani ga mai kina ka sa sega ni kila na veika sa yaco.
7Ia oqo mo vakarogoci au mada na luvequ, ka kakua sara ni guilecava na noqu vosa. 8Mo yawa tani mai na yalewa vaka o ya! Kakua sara mada ga ni lako volekata na nona katuba. 9Kevaka o na cakava oqori, o sa solia kina na nomu dokai vei ira na tani, o na mate talega ena ligadra na tamata sega ni dauloloma. 10Era na qai kauta na kai tani na nomu i yau ka ra na taukena na tani na ka o a ocataka. 11O na qai davo vutugu voli ena nomu i davodavo, ka na yavu yani na lewemu kei na yagomu. 12O na qai kaya, Na cava mada au a sega ni vulica rawa kina? Na cava au a sega kina ni vinakata me dua me vakadodonutaki au? 13Au a sega ni via vakarorogo vei ira na noqu qase ni vuli. Au a sega ni bau kauwaitaki ira. 14Au sa qai raica ni'u sa vakamaduataki vakasauri ena matadra na lewe vuqa.
15Mo yalodina tikoga vua na watimu ka vagolea duadua ga vua na nomu dodomo. 16Na nomu vakaluveni mai vei ira na yalewa tale eso ena sega ni kauta mai vei iko na ka vinaka. 17O ira na luvemu e dodonu me ra tubu cake me ra vukei iko, ka sega ni vukei ira na tani. 18O koya oqo mo rekitaka kina na watimu ka kunea na nomu marau mai vua na yalewa o sa vakamautaka 19sa rairai totoka ka vakaciriloloma me vaka na dia. Laiva ga na nona i vakarau kamikamica me vakamarautaka na yalomu; ka laiva na nona loloma me tu vakavolivoliti iko. 20Na luvequ, na cava mada na vuna mo vagolea kina na nomu dodomo vua e dua tale na yalewa? Na cava na vuna mo vinakata kina na nona i tovo kamikamica na watina e dua tale na tagane? 21Sa raica ko Jiova na veika kecega o vakayacora. Ena vanua kecega o sa lako kina, sa dau wanonovi iko o koya. 22Na nodra i valavala ca na tamata ca sa vaka e dua na dai. Era sa coko ga ena nodra dui i valavala ca. 23Era sa mate ga baleta ni ra sa sega ni lewai ira rawa vakai ira. Na nona lialia ga ena vakauti ira tale ki na kedra i bulubulu.
Currently Selected:
VOSA VAKAIBALEBALE 5: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.