VOSA VAKAIBALEBALE 4
4
Na Kena Yaga Vakalevu o Yalomatua
1Dou rogoca mada na luvequ na noqu i vakavuvuli. Dou vakarorogo vakavinaka mo dou kila-ka kina. 2Au sa vakavulici kemudou ena i vakavuvuli vinaka, ia dou kakua sara ni biuta tani. 3Ni'u a se gonetagane lailai, ni'u sa luvedrau tagane e duabau ga na noqu i tubutubu, 4sa dau vakavulici au o tamaqu ka kaya vei au, Nanuma vinaka sara na ka au sa tukuna vei iko ka kakua sara ni guilecava. Mo vakayacora na veika au sa tukuna vei iko, ni o na bula kina. 5Mo rawata na vuku kei na yalomatua! Kakua sara ni guilecava se vakawaletaka na ka au sa tukuna vei iko. 6Kakua ni biuta na yalomatua, ena taqomaki iko o koya. Mo lomani koya, ni na maroroi iko o koya. 7Na rawata na yalomatua sai koya na ka cecere duadua mo cakava; ia ke dua tale na ka mo rawata, io na lomavuku. 8Mo taleitaka na yalomatua, ena qai vakacerecerei iko o koya. Mo mokoti koya matua sara,#4.8 mokoti koya matua sara; se Raici koya cake. ni na vakavuna na nomu dokai. 9Ena solia na yalomatua na i sala dokai vakaturaga sa vakaiukuuku mo tokara e ulumu.
10Mo rogoci au mada, na luvequ. Mo taura vakabibi na noqu vosa ka tugana ki lomamu, ena qai balavu kina na nomu bula. 11Au sa vakavulici iko ena sala mo yalomatua kina kei na sala dodonu mo bula voli kina. 12Ni o na lako kina o na sega ni bale, ni o na cici o na sega ni tarabe. 13Mo nanuma deivaki na ka o sa vulica. Na nomu vuli sai koya na nomu bula mo maroroya vinaka sara. 14Kakua ni lako ki na vanua era lako kina na tamata ca. Kakua ni muria na nodra i vakarau na i valavala ca. 15Kakua ni cakava! Gole tani mai na ca! Mo cata sara ka lako tani ga yani. 16Era na sega ni moce rawa na tamata ca me yacova ni ra sa cakava oti na ka tawa dodonu. Era na yadra koto ga me yacova ni ra sa vakacacana oti e dua na tamata. 17Na i tovo ca kei na i tovo kaukauwa sa vaka na kakana kei na waini vei ira.
18Na sala era sa muria na yalododonu sa vaka na cadra cake ni matanisiga, ena toro cake tikoga na kena rarama me yacova na sigalevu tutu. 19Ia na sala era lakova na i valavala ca sa vaka na butobuto loaloa ni bogi. Era sa bale sobu, ia era sa sega ga ni kila se na cava sa vakatarabetaki ira.
20Na luvequ, mo vakatudaliga vinaka ki na veika au sa tukuna. Rogoca matua na noqu vosa. 21Me ra kakua ni yali tani mai vei iko. Nanumi ira vinaka ka tugana ki na vu ni yalomu. 22Era na vunibula vei ira sa kunea ka vakabulabulataka na veitiki ni yagodra taucoko sara. 23Ia na ka bibi duadua oqo: Mo qarauna vinaka na yalomu, ni sa taka mai kina na i vurevure ni bula. 24Kakua sara ni tukuna e dua na ka e sega ni dina. Tarovi iko mai na vosa lasu sa dauveivakacalai. 25Rai vakadodonu ga ki liu ena vakanuinui sa savasava. Kakua ni vakacuva sobu na ulumu ena madua. 26#Ipe 12.13Mo tuvana vakamaqosa na veika o via cakava, ena qai vinaka kina na ka kecega o vakayacora. 27Tarovi iko mai na ca ka lako vakadodonu ga ki liu. Kakua ni gole tani mai na sala vinaka.
Currently Selected:
VOSA VAKAIBALEBALE 4: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.