TIKO VOLI MAI NA LEKUTU 8
8
Sa Tuvana na Cina o Eroni
1A sa vosa vei Mosese ko Jiova ka kaya,#Lako 25.31-40; 37.17-24 2“Mo tukuna vei Eroni oqo, ‘Ni o sa vakatikora na cina ena kedra i tutu, mo tuvana vinaka me rawa kina ni cina yani ki liu na kena rarama.” 3A sa talairawarawa kina o Eroni ni sa tuvana na veicina ena muana e liu ni tutu ni cina, me cila yani kina ki liu na kena rarama, me vaka sa vakarota vei Mosese ko Jiova.” 4Me tekivu mai na muana e cake me yaco ki ra, a sa caka na i tutu ni cina ena koula sa tukilaki, me vaka na kena i vakaraitaki sa solia ko Jiova vei Mosese.
5Sa tukuna vei Mosese ko Jiova, 6“Mo tawasei ira na Livai mai vei ira na Isireli, ka vakasavasavataki ira. 7Ia mo cakava vakaoqo me ra savasava kina: Mo kureitaka vei ira na wai ni veivakasavasavataki, ia me ra qai toroya na yagodra taucoko ena i toro, me ra savata na nodra i sulu, ka me ra vakasilimi ira. 8Ia me ra qai kauta e dua na luve ni bulumakau tagane, kei na kena i madrali laukana, o ya na valawa matailalai sa veiwaki vata kei na waiwai; ia mo na kauta talega o iko e dua na luve ni bulumakau tagane me i soro ni valavala ca. 9Mo kauti ira na Livai ki na mata ni Vale ni Veitavaki, ka vakasoqoni ira vata na lewenivanua taucoko ni Isireli. 10Ia ni o sa soli ira na Livai ena mata i Jiova, me ra qai tabaki ira na Livai ena ligadra o ira na Isireli. 11Me qai cabori ira na Livai o Eroni me nodra i soro yalovaki na Isireli, ena mata i Jiova, ka me ra qarava kina na cakacaka vei Jiova. 12O ira na Livai me ra qai dodoka na ligadra ka tabaka na uludrau na bulumakau tagane; ka mo qai cabora e dua me i soro ni valavala ca, kei na kena i karua me i soro kama vei Jiova, me qaravi kina na cakacaka tabu ni nodra vakasavasavataki na Livai.
13Ia mo qai vakaroti ira na Livai me ra vakarorogo vei Eroni kei rau na luvena, ka cabori ira, me vaka na i soro yalovaki vei Jiova.
14“Mo tawasei ira vakaoqo na Livai mai vei ira na Isireli, me ra wiliki kina me noqu. 15Ia me ra qai curu yani ka veiqaravi ena Vale ni Veitavaki ni o sa vakasavasavataki ira oti, ka cabori ira me vaka na i soro yalovaki. 16Au sa tauri ira na Livai me noqu, ni ra sa soli vakatabakidua vei au mai vei ira na Isireli me kedra i sosomi na ulumatua kecega e Isireli. 17Ena siga ka'u a vakamatei ira kecega kina na ulumatua ni vanua o Ijipita, au sa vakatabui ira kece na ulumatua tagane ni Isireli kei na ulumatua ni nodra manumanu me noqu,#Lako 13.2 18ia oqo au sa kauti ira na Livai me kedra i sosomi na ulumatua kecega ni Isireli. 19Au sa soli ira na Livai mai vei ira na Isireli me noqu ka ni loloma vei iratou o Eroni kei rau na luvena, ka me ra veiqaravi ena vukudra na Isireli, ena Vale ni Veitavaki, ka sorovaki ira kina na Isireli, me kakua kina ni ra cudruvi na Isireli de dua vei ira e mani toro volekata yani na Tikina Tabu.”
Na Nodra Vakatabui na Livai
20Era sa cakava vakaoqo o Mosese, o Eroni, kei ira na lewenivanua taucoko ni Isireli vei ira na Livai, me vaka na ka kecega sa vakarota ko Jiova vei Mosese me baleti ira na Livai, era sa cakava vakakina vei ira na Isireli. 21Era a vakasavasavataki ira mai na i valavala ca o ira na Livai, ka savata na nodra i sulu; a sa cabori ira o Eroni me vaka na i soro yalovaki ena mata i Jiova; a sa sorovaki ira o Eroni me vakasavasavataki ira. 22Ni oti o ya, era a qai curu yani na Livai me ra cakava na nodra cakacaka ena Vale ni Veitavaki e mata i Eroni, e matadrau talega na luvena. Ia me vaka sa vakarota ko Jiova vei Mosese ena vukudra na Livai, eratou sa kitaka vakakina vei ira.
23A sa kaya vei Mosese ko Jiova, 24“Oqo na ka sa baleti ira na Livai: ni ra sa yabaki 25 na nodra bula ka lako cake, era na qai vakatekivu cakacaka ena Vale ni Veitavaki. 25Me ra cegu mai na cakacaka ni veiqaravi oqo ni ra sa yacova na yabaki 50 ni nodra bula. 26Ni oti o ya, e rawa vua e dua me veivuke vua na i tokani Livai ena nona veiqaravi ena Vale ni Veitavaki, ia me kakua ga ni cakava vakaikoya na cakacaka. Sai koya oqo na i lesilesi ni ka mo qarava ena vukudra na Livai.”
Currently Selected:
TIKO VOLI MAI NA LEKUTU 8: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
