TIKO VOLI MAI NA LEKUTU 9
9
Na Vakananumi ni Lako Sivia e Saineai
1A sa vosa ko Jiova vei Mosese ena loma ni vanua lala mai Saineai, ena i matai ni vula ena i karua ni yabaki ni nodra lako tani mai na vanua o Ijipita, ka kaya,#Lako 12.1-13 2“Me ra dau vakananuma na Solevu ni Lakosivia na Isireli ena kena gauna lokuci. 3Mo ni vakayacora ena i katinikava ni siga ni vula oqo, ena kena yakavi, ena kena gauna dodonu; mo ni kitaka sara me vaka na kena i lesilesi kecega kei na kena i vakaro kecega. 4A sa tukuna vei ira na Isireli o Mosese me ra na dau vakayacora na Solevu ni Lakosivia. 5Ia ena i katinikava ni siga ni matai ni vula, ena yakavi, ena loma ni vanua lala mai Saineai, era sa vakayacora oqo me vaka na ka kecega sa vakarota vei Mosese ko Jiova.
6Eso vei ira na tamata era sa sega ni savasava baleta ni ra sa tara na yagomate, era sa sega kina ni tiko rawa ena Solevu ni Lako Sivia ena siga o ya; era sa qai lako vei rau o Mosese kei Eroni; 7era sa kaya, “Keimami sa sega ni savasava ena vuku ni keimami sa tara na yagomate. A cava beka na vuna keimami tarovi kina, me keimami kakua ni cabora vata kei ira na Isireli, na i madrali vei Jiova, ena kena gauna lokuci?” 8A sa kaya vei ira o Mosese, “Mo ni wawa mada, me'u rogoca mada se cava e sa vakarota ko Jiova ena vukumuni.”
9A sa kaya vei Mosese ko Jiova, 10“Mo tukuna vei ira na Isireli ni kevaka e dua vei kemuni, se o ira na nomuni kawa, era sa sega ni savasava ena vuku ni nodra tara na yagomate, se ra lako ena dua na i lakolako yawa, ia e rawa tikoga me ra solevutaka na Lakosivia i Jiova. 11Ia me ra vakayacora oqo ni oti tale e vula dua, o ya ena i katinikava ni siga ni karua ni vula, ena yakavi; me ra solevutaka kei na co gaga kei na madrai sa sega ni vakatubu. 12Me ra kakua sara ni vakavoca me yacova yani na mataka kadua, se musuka e dua na suina; me ra muria sara na i vakaro kecega me baleta na Solevu ni Lako Sivia.#Lako 12.46; Joni 19.36 13Ia na tamata sa savasava, ka sega ni lako ena i lakolako yawa, ka qai bese ni vakananuma na Solevu ni Lako Sivia, me tawasei tani mai vei ira na kai nona na tamata o ya, baleta ni sa sega ni cabora na i soro vei Jiova ena kena gauna lokuci; na tamata o ya ena colata ga na i sau ni nona i valavala ca. 14Kevaka e tiko kei kemuni e dua na vulagi, ka donuya na Solevu ni Lako Sivia, ia me muria ga na vulagi o ya na i vakarau kei na i valavala kece sara ni Solevu ni Lako Sivia; me dua tu ga na kena i vakaro vei koya na vulagi kei koya na i taukei.”
Na O kei na Bukawaqa
(Lako 40.34-38)
15Ena gauna sa vakaduri cake kina na vale tabu, sa ubia na vale tabu na o ena siga; ka solega tu ena yakavi ka sigavaka, ka sa vaka na bukawaqa na i rairai ni o oqori ena bogi. 16A sa vaka tikoga kina; ni sa ubia na o ena siga, kei na ka sa vaka na i rairai ni bukawaqa ena bogi. 17Ia ni sa tubu cake na o mai na dela ni vale tabu, me ra qai cavutu na Isireli; ia ena vanua sa la'ki tu vakadua kina na o, era sa na biri valelaca kina na Isireli. 18Era sa cavutu na Isireli me ra tokia na nodra i tikotiko ena i vakaro i Jiova; me ra biri valelaca talega ena i vakaro i Jiova; ia ena gauna taucoko ga sa toka kina vakadua na o ena dela ni vale tabu, me ra tiko ga. 19Ke mani balavu sara na gauna ni kena tu ga vakadua na o ena dela ni vale tabu, era sa talairawarawa ga na Isireli vei Jiova, ka ra sega ni toso. 20Ena so na gauna, sa dau siga vica wale ga na o e dela ni vale tabu, ia me vaka na i vakaro i Jiova me ra tiko ga, se me ra cavutu ka toso yani. 21Ena so gauna, sa dau solega toka ga na o na dela ni vale tabu ena maliwa ni yakavi me la'ki yacova na mataka lailai, ka sa toso tale na i lakolako ena gauna ga e sa toso kina na o. Ni sa toso ga na o, era sa toso talega na Isireli. 22Kevaka e siga rua, se vula dua, se yabaki dua, se mani dua sara na gauna balavu, era na toka ga vakadua na Isireli baleta ni tu ga vakadua na o ena dela ni vale tabu; ia ni sa toso ga na o, era sa toso talega na Isireli. 23Era sa vakayacora na cakacaka ni vakaduri keba kei na tokitaki keba na Isireli mai na nodra talairawarawa ki na i vakaro i Jiova, me vaka sa vakaroti vei Mosese.
Currently Selected:
TIKO VOLI MAI NA LEKUTU 9: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
