TIKO VOLI MAI NA LEKUTU 7
7
Na Nodra i Soro na Veiliutaki
1Ena siga sa vakaduria oti kina na vale tabu o Mosese, sa qai lumuta ka vakatabuya na vale tabu kei na kena i yaya kecega, ka vakakina na i cabocabonisoro kei na kena i yaya. 2Era sa qai lako mai ki na vale tabu o ira na turaga ni veimataqali ka ra veiliutaki ena veivuvale ni nodra qase na Isireli, o ira talega oqo era a liutaka na wili lewenivanua, 3ka ra kauta mai na nodra i solisoli me vakacabori ena mata i Jiova: oqori e ono na qiqi vakavale kei na tinikarua na bulumakau tagane. E dua na qiqi vakavale me rau wasea vata e lewe rua na turaga veiliutaki, ka ra tau yadua na i solisoli bulumakau tagane. Ni ra sa cabora oti na nodra i solisoli ena mata ni vale tabu, 4sa qai vosa vei Mosese ko Jiova, ka kaya: 5“Mo ciqoma na nodra i solisoli oqo me yaga ki na veiqaravi ena Vale ni Veitavaki; mo qai solia vei ira na Livai ena vuku ni nodra cakacaka.” 6A sa kauta na qiqi vakavale kei na bulumakau tagane o Mosese ka solia vei ira na Livai. 7A sa solia o koya e rua na qiqi vakavale kei na va na bulumakau tagane vei ira na luve i Kerisoni ena vuku ni nodra cakacaka. 8A sa solia o koya e va na qiqi vakavale kei na walu na bulumakau tagane vei ira na luve i Mirari ena vuku ni nodra cakacaka. Ia na nodra cakacaka kece me vakayacori ena ruku ni veiliutaki nei Icama, na luve i Eroni na bete. 9A sa sega ni solia o Mosese e dua na ka vei ira na luve i Koaca, baleta ni veiyaya tabu ka sa tataunaki tu vei ira e dodonu me ra na dau colata ga e tabadra.
10Era sa kauta talega mai na turaga ni veimataqali na nodra i solisoli ni kena soqovi na vakacabori ni cabocabonisoro ena gauna sa lumuti kina. Ni ra sa vakarau cabora na nodra i solisoli ena mata ni cabocabonisoro, 11sa qai kaya vei Mosese ko Jiova, “Era na mai cabora na nodra i solisoli me baleta na lumuti ni i cabocabonisoro, ka me ra gole yadudua mai na turaga ni veitokatoka ena veisiga yadua ena loma ni tinikarua na siga.”
12O koya ka la'ki vakacabora na nona i solisoli ena i matai ni siga o Nasoni na luve i Amenatave, mai vei ira na mataqali Juta, 13ka nona i solisoli e dua na veleti siliva ka kena bibi e 1.5 na kilokaramu, e dua na beseni siliva ka kena bibi e 800 na karamu; ia e rau sinai ruarua na veleti kei na beseni ena valawa matailalai sa veiwaki vata kei na waiwai, me i madrali laukana; 14e dua na disi koula na kena bibi e 110 na karamu, sa sinai tu ena ka boi vinaka; 15e dua na luve ni bulumakau tagane, e dua na sipi tagane, e dua na lami tagane sa yabaki dua, me i soro kama; 16e dua na me tagane me i soro ni valavala ca; 17ia me i soro ni veivinakati e rua na bulumakau, e lima na sipi tagane, e lima na me tagane, ka lima na lami tagane ka sa yabaki dua. Oqo na i solisoli nei Nasoni na luve i Amenatave.
18Ia ena i karua ni siga, sa la'ki vakacabora na nona i solisoli o Nacanieli na luve i Suari, mai vei ira na mataqali Isakari, 19ka nona i solisoli e dua na veleti siliva ka kena bibi e 1.5 na kilokaramu, e dua na beseni siliva ka kena bibi e 800 na karamu; ia e rau sinai ruarua na veleti kei na beseni ena valawa matailalai sa veiwaki vata kei na waiwai, me i madrali laukana; 20e dua na disi koula na kena bibi e 110 na karamu, sa sinai tu ena ka boi vinaka; 21e dua na luve ni bulumakau tagane, e dua na sipi tagane, e dua na lami tagane sa yabaki dua, me i soro kama; 22e dua na me tagane me i soro ni valavala ca; 23ia me i soro ni veivinakati e rua na bulumakau, e lima na sipi tagane, e lima na me tagane, ka lima na lami tagane ka sa yabaki dua. Oqo na i solisoli nei Nacanieli na luve i Suari.
24Ena i katolu ni siga sa la'ki vakacabora na nona i solisoli o Iliavi na luve i Eloni, mai vei ira na mataqali Sevuloni, 25ka nona i solisoli e dua na veleti siliva ka kena bibi e 1.5 na kilokaramu, e dua na beseni siliva ka kena bibi e 800 na karamu; ia e rau sinai ruarua na veleti kei na beseni ena valawa matailalai sa veiwaki vata kei na waiwai, me i madrali laukana; 26e dua na disi koula na kena bibi e 110 na karamu, sa sinai tu ena ka boi vinaka; 27e dua na luve ni bulumakau tagane, e dua na sipi tagane, e dua na lami tagane yabaki dua, me i soro kama; 28e dua na me tagane me i soro ni valavala ca; 29ia me i soro ni veivinakati e rua na bulumakau tagane, e lima na sipi tagane, e lima na me tagane, ka lima na lami tagane ka sa yabaki dua. Oqo na i solisoli nei Iliavi na luve i Eloni.
30Ena i kava ni siga sa la'ki vakacabora kina na nona i solisoli o Ilisuri na luve i Situeri, mai vei ira na mataqali Rupeni, 31ka nona i solisoli e dua na veleti siliva ka kena bibi e 1.5 na kilokaramu, e dua na beseni siliva ka kena bibi e 800 na karamu; ia e rau sinai ruarua na veleti kei na beseni ena valawa matailalai sa veiwaki vata kei na waiwai, me i madrali laukana; 32e dua na disi koula na kena bibi e 110 na karamu, sa sinai tu ena ka boi vinaka; 33e dua na luve ni bulumakau tagane, e dua na sipi tagane, e dua na lami tagane sa yabaki dua, me i soro kama; 34e dua na me tagane me i soro ni valavala ca; 35ia me i soro ni veivinakati e rua na bulumakau, e lima na sipi tagane, e lima na me tagane, ka lima na lami tagane ka sa yabaki dua. Oqo na i solisoli nei Ilisuri na luve i Situeri.
36Ena i kalima ni siga sa la'ki vakacabora na nona i solisoli o Silimueli na luve i Suresitai, mai vei ira na mataqali Simione, 37ka nona i solisoli e dua na veleti siliva ka kena bibi e 1.5 na kilokaramu, e dua na beseni siliva ka kena bibi e 800 na drau na karamu; ia e rau sinai ruarua na veleti kei na beseni ena valawa matailalai sa veiwaki vata kei na waiwai, me i madrali laukana; 38e dua na disi koula na kena bibi e 110 na karamu, sa sinai tu ena ka boi vinaka; 39e dua na luve ni bulumakau tagane, e dua na sipi tagane, e dua na lami tagane sa yabaki dua, me i soro kama; 40e dua na me tagane me i soro ni valavala ca; 41ia me i soro ni veivinakati e rua na bulumakau, e lima na sipi tagane, e lima na me tagane, ka lima na lami tagane ka sa yabaki dua. Oqo na i solisoli nei Silumieli na luve i Surisitai.
42Ena i kaono ni siga sa la'ki vakacabora na nona i solisoli o Eliasafi, na luve i Tiueli, mai vei ira na mataqali Kata, 43ka nona i solisoli e dua na veleti siliva ka kena bibi e 1.5 na kilokaramu, e dua na beseni siliva ka kena bibi e 800 na karamu; ia e rau sinai ruarua na veleti kei na beseni ena valawa matailalai sa veiwaki vata kei na waiwai, me i madrali laukana; 44e dua na disi koula na kena bibi e 110 na karamu, sa sinai tu ena ka boi vinaka; 45e dua na luve ni bulumakau tagane, e dua na sipi tagane, e dua na lami tagane sa yabaki dua, me i soro kama; 46e dua na me tagane me i soro ni valavala ca; 47ia me i soro ni veivinakati e rua na bulumakau, e lima na sipi tagane, e lima na me tagane, ka lima na lami tagane ka sa yabaki dua. Oqo na i solisoli nei Eliasafi na luve i Tiueli.
48Ena i kavitu ni siga sa la'ki vakacabora na nona i solisoli o Ilisama na luve i Amiute, mai vei ira na mataqali Ifereimi, 49ka nona i solisoli e dua na veleti siliva ka kena bibi e 1.5 na kilokaramu, e dua na beseni siliva ka kena bibi e 800 na karamu; ia e rau sinai ruarua na veleti kei na beseni ena valawa matailalai sa veiwaki vata kei na waiwai, me i madrali laukana; 50e dua na disi koula na kena bibi e 110 na karamu, sa sinai tu ena ka boi vinaka; 51e dua na luve ni bulumakau tagane, e dua na sipi tagane, e dua na lami tagane sa yabaki dua, me i soro kama; 52e dua na me tagane me i soro ni valavala ca; 53ia me i soro ni veivinakati e rua na bulumakau, e lima na sipi tagane, e lima na me tagane, ka lima na lami tagane ka sa yabaki dua. Oqo na i solisoli nei Ilisama na luve i Amiute.
54Ena i kawalu ni siga sa la'ki vakacabora na nona i solisoli o Kamelieli na luve i Pitasuri, mai vei ira na mataqali Manasa, 55ka nona i solisoli e dua na veleti siliva ka kena bibi e dua veimama na kilokaramu, e dua na beseni siliva ka kena bibi e 800 na karamu; ia e rau sinai ruarua na veleti kei na beseni ena valawa matailalai sa veiwaki vata kei na waiwai, me i madrali laukana; 56e dua na disi koula na kena bibi e dua na drau ka tini na karamu, sa sinai tu ena ka boi vinaka; 57e dua na luve ni bulumakau tagane, e dua na sipi tagane, e dua na lami tagane sa yabaki dua, me i soro kama; 58e dua na me tagane me i soro ni valavala ca; 59ia me i soro ni veivinakati e rua na bulumakau, e lima na sipi tagane, e lima na me tagane, ka lima na lami tagane ka sa yabaki dua. Oqo na i solisoli nei Kamelieli na luve i Pitasuri.
60Ena i kaciwa ni siga sa la'ki vakacabora na nona i solisoli Epitani na luve i Kitioni, mai vei ira na mataqali Penijamini, 61ka nona i solisoli e dua na veleti siliva ka kena bibi e dua veimama na kilokaramu, e dua na beseni siliva ka kena bibi e walu na drau na karamu; ia e rau sinai ruarua na veleti kei na beseni ena valawa matailalai sa veiwaki vata kei na waiwai, me i madrali laukana; 62e dua na disi koula na kena bibi e dua na drau ka tini na karamu, sa sinai tu ena ka boi vinaka; 63e dua na luve ni bulumakau tagane, e dua na sipi tagane, e dua na lami tagane sa yabaki dua, me i soro kama; 64e dua na me tagane me i soro ni valavala ca; 65ia me i soro ni veivinakati e rua na bulumakau, e lima na sipi tagane, e lima na me tagane, ka lima na lami tagane ka sa yabaki dua. Oqo na i solisoli nei Epitani na luve i Kitioni.
66Ena i katini ni siga sa la'ki vakacabora na nona i solisoli o Eieseri na luve i Amisatai, mai vei ira na mataqali Tani, 67ka nona i solisoli e dua na veleti siliva ka kena bibi e dua veimama na kilokaramu, e dua na beseni siliva ka kena bibi e walu na drau na karamu; ia e rau sinai ruarua na veleti kei na beseni ena valawa matailalai sa veiwaki vata kei na waiwai, me i madrali laukana; 68e dua na disi koula na kena bibi e dua na drau ka tini na karamu, sa sinai tu ena ka boi vinaka; 69e dua na luve ni bulumakau tagane, e dua na sipi tagane, e dua na lami tagane sa yabaki dua, me i soro kama; 70e dua na me tagane me i soro ni valavala ca; 71ia me i soro ni veivinakati e rua na bulumakau, e lima na sipi tagane, e lima na me tagane, ka lima na lami tagane ka sa yabaki dua. Oqo na i solisoli nei Eieseri na luve i Amisatai.
72Ena i katini kadua ni siga sa la'ki vakacabora na nona i solisoli o Pakieli na luve i Okirani, mai vei ira na mataqali Aseri, 73ka nona i solisoli e dua na veleti siliva ka kena bibi e dua veimama na kilokaramu, e dua na beseni siliva ka kena bibi e walu na drau na karamu; ia e rau sinai ruarua na veleti kei na beseni ena valawa matailalai sa veiwaki vata kei na waiwai, me i madrali laukana; 74e dua na disi koula na kena bibi e dua na drau ka tini na karamu, sa sinai tu ena ka boi vinaka; 75e dua na luve ni bulumakau tagane, e dua na sipi tagane, e dua na lami tagane sa yabaki dua, me i soro kama; 76e dua na me tagane me i soro ni valavala ca; 77ia me i soro ni veivinakati e rua na bulumakau, e lima na sipi tagane, e lima na me tagane, ka lima na lami tagane ka sa yabaki dua. Oqo na i solisoli nei Pakieli na luve i Okirani.
78Ena i katini karua ni siga sa la'ki vakacabora na nona i solisoli o Eira na luve i Enani, mai vei ira na mataqali Navitalai, 79ka nona i solisoli e dua na veleti siliva ka kena bibi e dua veimama na kilokaramu, e dua na beseni siliva ka kena bibi e walu na drau na karamu; ia e rau sinai ruarua na veleti kei na beseni ena valawa matailalai sa veiwaki vata kei na waiwai, me i madrali laukana; 80e dua na disi koula na kena bibi e dua na drau ka tini na karamu, sa sinai tu ena ka boi vinaka; 81e dua na luve ni bulumakau tagane, e dua na sipi tagane, e dua na lami tagane sa yabaki dua, me i soro kama; 82e dua na me tagane me i soro ni valavala ca; 83ia me i soro ni veivinakati e rua na bulumakau, e lima na sipi tagane, e lima na me tagane, ka lima na lami tagane ka sa yabaki dua. Oqo na i solisoli nei Eira na luve i Enani.
84Oqo na i wiliwili taucoko sara ni veisolisoli era kauta mai na turaga ni veitokatoka me cabori ena kena vakatabui na i cabocabonisoro ena siga e lumuti kina: e tinikarua na veleti siliva kei na tinikarua na beseni siliva ka kena bibi taucoko e 27.6 na kilokaramu; 85e tinikarua na disi koula sa sinai tu ena ka boi vinaka, ka kena bibi taucoko e 1.32 na kilokaramu; 86e tinikarua na bulumakau tagane, e tinikarua na lami tagane, e tinikarua na lami yabaki dua, kei na i madrali laukana, me ra i soro me vakamai; 87e tinikarua na me ka vakarautaki me i soro ni valavala ca; 88kei na manumanu kecega sa cabori me i soro ni veivinakati: e 24 na bulumakau tagane, e 60 na sipi tagane, e 60 na me, kei na 60 na lami tagane yabaki dua.
89Ia ni sa curu ki na Vale ni Veitavaki o Mosese me veivosaki kei Jiova, sa rogoca o koya na domo i Jiova ni sa vosa tiko vua mai na dela ni sogo ni Kato ni Veiyalayalati, ena kedrau maliwa na jerupi.
Currently Selected:
TIKO VOLI MAI NA LEKUTU 7: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
