TIKO VOLI MAI NA LEKUTU 31
31
Valuti Mitiani o Ira na Isireli
1A sa vosa vei Mosese ko Jiova, ka kaya, 2Mo sauma lesu na ka era cakava vei Isireli o ira na kai Mitiani; ia ni sa oti o ya, mo ni qai soqoni vata yani vei ira na nomuni tamata.
3Sa qai vosa vei ira na tamata o Mosese, ka kaya, Me vakaiyaragi eso vei kemuni me ra la'ki valuti ira na kai Mitiani, ka vakayacora vei ira na cudru i Jiova. 4Mo ni tala mai ki na i valu e tau yadua na udolu, mai na veimataqali yadua e Isireli.
5Era sa lewe 12,000 sa vakaiyaragi ki na i valu, ia mai na udolu vakaudolu na lewe i Isireli, e tau yadua na udolu mai na veimataqali yadua. 6A qai vakatalai ira ki na i valu o Mosese, sa dua na udolu na tamata mai na veimataqali yadua, o ira vata kei Piniase na luve i Iliesa na bete, vata kei na i yaya mai na Tikina Tabu, ka taura tu e ligana na davui ni vakaro ki na i valu. 7Era sa valuti ira na kai Mitiani, me vaka sa vakarota vei Mosese ko Jiova ka ra vakamatei ira kecega na tagane. 8Era a vakamatei iratou talega na tui Mitiani vata kei ira na moku; o iratou o Evi, o Rekemi, o Suri, o Uri kei Repa, na tui e lima mai Mitiani; sa vakamatei talega o Balami na luve i Piori, ena i seleiwau.
9Ia era sa tauri ira vakabobula na yalewa ni Mitiani kei ira na nodra lalai o ira na Isireli; ka ra sa taura vakaitoki na nodra bulumakau kecega, vata kei na nodra manumanu, kei na nodra i yau kecega. 10Era sa vakama na nodra veikoro ena veivanua era tiko kina, kei na nodra i tikotiko kecega vakaivalu, 11ka taura na i yau kecega me i toki, na tamata kei na manumanu. 12Era sa qai kauti ira yani na bobula, na i tokinivalu kei na i yau, vei rau o Mosese, kei Iliesa na bete, vei ira talega na lewenivanua ni Isireli, na i tikotiko ena bucabuca o Moapi, voleka ki na Joritani ka donui Jeriko.
Era Suka Lesu Mai na Mataivalu
13A sa qai lako yani o Mosese, o Iliesa na bete, kei ira kece na i liuliu ni lewenivanua me ra la'ki tavaki ira ki na i bili ni koro. 14Sa qai cudru o Mosese vei ira na turaganivalu, kei ira na turaga ni yayaudolu, kei ira na turaga ni yayadrau, ka ra qai lesu tiko mai ena i valu. 15A sa tarogi ira o Mosese, O ni sa vakabulai ira li na yalewa? 16Raica, sai ira sara ga oqo ka ra vakauqeti ira na Isireli, ena i vakasala i Balami, me ra cakava na i valavala ca vei Jiova, ena ka sa yaco mai Piori, ka sa mani yaco kina na matetaka levu ena kedra maliwa na lewenivanua i Jiova.#Tiko 25.1-9 17Ia oqo, mo ni vakamatei ira kecega na tagane era maliwai ira na lalai ka vakamatei ira kecega era sa veiyacovi kei na tagane. 18Ia mo ni qai vakabulai ira me nomuni o ira kece sara na goneyalewa ka ra sega ni veiyacovi kei na tagane. 19Mo ni vakaitikotiko mada ena i bili ni koro me bogi vitu; oi kemuni yadua ka sa vakamatea e dua na tamata, kei koya sa tara e dua sa mate, mo ni vakasavasavataki kemuni kei ira na nomuni bobula ena i katolu kei na i kavitu ni siga. 20Mo ni vakasavasavataka na i sulu kecega, na veika kecega sa caka ena kuli-ni-manumanu, na ka kecega sa caka ena vuti ni me, kei na ka kecega sa caka ena kau.
21Sa qai kaya o Iliesa na bete vei ira na sotia ka ra a lako ki na i valu: Oqo na lewa sa virikotori ena i vunau sa vakarota ko Jiova vei Mosese: 22na koula ga, na siliva, na parasa, na kaukamea, na tini, kei na uma, 23na ka kecega sa sega ni kama yavu rawa ena bukawaqa, ni raraga e yameyame ni buka ena qai savasava kina. Ia me vakasavasavataki talega ena wai me savasava kina; ia na ka kecega sa kama yavu rawa ena bukawaqa mo ni tonia ena wai. 24Mo ni savata sara na nomuni i sulu, ena kavitu ni siga, o ni na qai savasava, ia ni oti o ya mo ni qai curu mai ki na i tikotiko.
Veivotayaki na i Toki ni Valu
25A sa vosa vei Mosese ko Jiova, ka kaya, 26“O iko kei Iliesa na bete, kei ira kece era veiliutaki ena kemuni maliwa, mo ni wilika na i tokinivalu kece sara sa rawati mai, ka okati kina o ira na tamata era vesu mai vata kei na manumanu. 27Mo ni wasea rua vakavinaka na i tokinivalu, me dua e nodra na sotia, ka me nodra na lewenivanua e dua tale. 28Mai na nodra i wasewase na sotia, mo taura lesu mai me i vakacavacava e tau yadua mai na tau ya 500 na tamata vesu, ka tautauvata na kena oqori vei ira na bulumakau, kei na asa, kei na qele ni sipi, kei na me. 29Mo qai solia yani oqo vei Iliesa na bete, me i madrali vei Jiova. 30Mai na nodra i wasewase na Isireli, mo taura lesu e tau yadua mai na tau ya 50 na nodra i votavota na Isireli e yadua, mai na veiyalimasagavulu, se tamata, bulumakau, asa, sipi se me na manumanu kecega ka solia vei ira na Livai era sa dau qarava na cakacaka ni Vale i Jiova.” 31E rau a qai kitaka vakakina o Mosese, kei Iliesa na bete, me vaka a vakaroti rau kina ko Jiova.
32Oqo na i tokinivalu, na i vovo ni ka a vakacacani ena i valu ka ra kauta mai na sotia: e 675,000 na sipi, 33e 72,000 na bulumakau, 34e 61,000 na asa, 35era sa lewe 32,000 na yalewa era se sega ni mocera na tagane.
36Ia na veimama ni nodra i votavota na lako ki na i valu sa 337,500 na sipi kei na me: 37ia na i solisoli loloma ni sipi kei na me vei Jiova sa 675. 38Na bulumakau e 36,000 ka i solisoli loloma vei Jiova e 72. 39Na levu ni asa e 30,500, ka i solisoli loloma vei Jiova e 61. 40O ira na goneyalewa era sa lewe 16,000 ka i solisoli loloma vei Jiova e 32. 41Ia na i vakacavacava kece, ka i solisoli loloma vei Jiova, sa solia o Mosese vei Iliesa na bete me vaka na veika sa vakaroti Mosese kina ko Jiova.
42Mai na kena veimama ka nodra na Isireli, a wasea tani o Mosese mai na nodra na sotia ka ra lako ki na i valu, 43ia na kena veimama ka nodra na lewenivanua sa 337,500 na sipi kei na me, 4436,000 na bulumakau, 45kei na 30,500 na asa, 46kei na 16,000 na goneyalewa. 47Mai na kena veimama ka nodra na Isireli, sa qai taura tani mai o Mosese e yadua mai na veiyalimasagavulu na tamata kei na manumanu, ka solia vei ira na Livai ni ra sa dau qarava na cakacaka ni Vale i Jiova; me vaka sa vakaroti Mosese kina ko Jiova.
48Era sa lako kece mai na turaganivalu vei Mosese 49ka kaya vua, “Oi keimami saka oqo na nomuni tamata, keimami sa wiliki ira oti na sotia ka ra tiko ena ruku ni neimami lewa, ka sega ni dua e yali. 50Ia keimami sa kauta mai oqo na i madrali vei Jiova, na ka kecega sa kunea na tamata yadua, na veiyaya koula, na sinucodo, na qato, na mama, na sau ni daliga, kei na i taube me keimami sorovaki kina ena mata i Jiova.” 51E rau sa qai ciqoma o Mosese, kei Iliesa na bete, na koula, ka ra i yaya caka vakamatau kecega. 52Ia na koula kecega era sa vakacabora me i madrali vei Jiova, o ira na turaganivalu, sa rua na drau na kilokaramu na kena bibi. 53Era sa vunia na i tokinivalu na sotia me nodra. 54E rau a qai taura na koula o Mosese kei Iliesa na bete mai vei ira na turaganivalu ka kauta ki na loma ni Vale ni Veitavaki, me kedra i vakananumi na Isireli ena matai i Jiova.
Currently Selected:
TIKO VOLI MAI NA LEKUTU 31: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
