TIKO VOLI MAI NA LEKUTU 30
30
Na Nodra Vosa Bubului na Yalewa
1A sa vosa vakaoqo o Mosese vei ira na turaga ni nodra veimataqali na Isireli, ka kaya, Sa vakaoqo na ka sa vakarota ko Jiova. 2Kevaka sa yalayala e dua na tamata me na solia e dua na ka vei Jiova, se me vosa bubuluitaka me vakatabui koya ena dua na ka, ia me kakua sara ni voroka na nona vosa ka me vakayacora ga na ka kece sa cavuta na gusuna.#Vrua 23.21-23; Maciu 5.33
3Kevaka sa bubului vei Jiova e dua na goneyalewa ka se tiko ga ena vale i tamana o ya me na solia e dua na ka vei Jiova se yalataka vua me na vakatabui koya mai na dua na ka, 4e dodonu me vakayacora o koya na veika kece sara sa bubului kina, ka qai vakavo duadua ga kevaka e qai kauwai mai kina o tamana ni sa rogoca. 5Ia kevaka sa sega ni vakadonuya vua o tamana me kitaka vakakina, sa qai sega ni vauci o goneyalewa ki na nona vosa ni yalayala. Ena vosoti koya kina ko Jiova, baleta ni sega ni vakadonuya o tamana na nona bubului.
6Kevaka sa bubuluitaka e dua na ka na yalewa sega ni se vakawati, se yalataka me vakuai koya mai na dua na ka, ia sa qai mani vakawati, 7e dodonu me na vakayacora o koya na veika kece sara sa bubului kina, ka qai vakavo duadua ga kevaka e qai kauwai mai kina o watina ni sa rogoca. 8Ia kevaka sa sega ni vakadonuya vua o na watina me kitaka vakakina, sa qai sega ni vauci o goneyalewa ki na nona vosa ni yalayala. Ena vosoti koya kina ko Jiova.
9Ia sa veivauci na veika kece sa bubului kina na yada se na yalewa sa veibiu, o ya me na vakayacora vakakina.
10Kevaka sa yalataka e dua na yalewa vakawati me vakuai koya mai na dua na ka, 11e dodonu me na vakayacora o koya na veika kece sara sa bubului kina, ka qai vakavo duadua ga kevaka e qai kauwai mai kina o watina ni sa rogoca. 12Ia kevaka sa sega ni vakadonuya vua o na watina me kitaka vakakina, sa qai sega ni vauci na yalewa vakawati ki na nona vosa ni yalayala. Ena vosoti koya kina ko Jiova. 13Sa tu vua na turaga na watina na kaukauwa se na dodonu me vakadeitaka se vakadaroya na bubului se vosa ni yalayala sa vakayacora. 14Ia kevaka sa sega ni kauwai kina o watina tagane ni sa rogoca oti, sa qai dodonu kina me vakayacora na yalewa vakawati na nona bubului se vosa ni yalayala. A sa vakataudeitaka o koya na bubului kecega i watina mai na nona sega ni kauwai ena siga e rogoca kina. 15Ia kevaka sa qai sega ni vakadonuya e muri o na watina tagane na yalayala nei na watina me vaka ni a galu taumada ka sega ni vosa kina, ena qai colata ga o koya na caka cala nei watina yalewa.
16Oqo na i lesilesi ka vakarota vei Mosese ko Jiova ena vuku ni tagane kei na watina, na dua na tama kei na luvena goneyalewa ka sa tiko ga ena vale nei tamana.
Currently Selected:
TIKO VOLI MAI NA LEKUTU 30: FNV
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.