TIKO VOLI MAI NA LEKUTU 32
32
Mataqali ena Tokalau ni Joritani
(Vrua 3.12-22)
1O ira na luve i Rupeni kei na luve i Kata, era taukena e dua na i wiliwili ni manumanu yava i va vakaitamera; era sa raica na vanua o Jaseri kei na vanua o Kiliati, ni sa vanua vinaka ni susu manumanu yava i va. 2Era sa qai lako yani na luve i Kata kei na luve i Rupeni, ka tukuna vei rau o Mosese, kei Iliesa na bete, kei ira na turaga ena lewenivanua, ka kaya,
3O Ataroci, Tiponi, Jaseri, Nimira, Esiponi, Elale, Sipami, Nepo, kei Pioni, 4na veivanua ka samuta ko Jiova ena matadra na lewenivanua ni Isireli, sa vanua vinaka dina ni susu manumanu yava i va, ia oi keimami na nomuni tamata, sa tu na neimami manumanu.
5Era sa kaya tale, Kevaka o ni lomani keimami, ni solia na veivanua oqo vei keimami me neimami i votavota; mo ni kakua ni kauti keimami ki na tai kadua ni Joritani. 6Sa qai kaya o Mosese vei ira na luve i Kata kei na luve i Rupeni, Me ra lako li ki na i valu o ira na wekamuni, ia o kemuni mo ni qai dabe tikoga eke? 7A cava o ni sa vakayalolailaitaki ira kina na Isireli me ra kakua ni lako yani ki na vanua ka sa solia vei ira ko Jiova? 8Era sa kitaka vakaoqo o ira na nomuni qase, ena gauna ka'u a talai ira kina mai Katesi Banea me ra la'ki raica na vanua.#Tiko 13.17-33 9Ia ni ra sa lako yani ki na buca o Esikoli, ka raica na vanua, era sa qai vakayalolailaitaki ira na Isireli, me ra kakua ni lako ki na vanua sa solia vei ira ko Jiova.
10Sa waqa na cudru i Jiova ena siga o ya, ka sa bubului o koya, ka kaya,#Tiko 14.26-35 11‘O ira kecega na tamata ka lako tani mai Ijipita, me vakatekivu mai vei ira sa yabaki ruasagavulu na nodra bula ka lako cake, era na sega sara ni raica na vanua au sa bubuluitaka me'u solia vei Epara-ama, vei Aisake, kei Jekope, baleta ni ra sa sega ni muri au ena yalodra taucoko; 12e sega sara, ka qai vakavo ga o rau o Kelevi na luve i Jifune na Kenisaiti, kei Josua na luve i Nuni, ni rau sa muri Jiova ena lomadrau taucoko.’ 13Sa qai waqa mai na cudru i Jiova vei ira na Isireli, ka vakavuna me ra veilakoyaki voli ena vanua lala me yabaki vasagavulu, ka yacova ni ra sa mate kece na i tabatamata o ya ka ra caka cala ena mata i Jiova. 14Raica, o ni sa tubu cake mo ni tautauvata kei ira na nomuni qase, na kawa ni tamata ca, ka sa vakatubura me levu cake tikoga na cudru katakata i Jiova vei ira na Isireli.
15Ia kevaka o ni vuki tani mo ni kakua ni muri koya, ena laivi kemuni talega o koya ena vanua lala; ia oi kemuni ga, o ni na vakawabokotaki ira kece na kawa tamata oqo.
16Era sa qai toro voleka vua, ka kaya, Keimami na tara eke eso na bai me nodra na neimami qele ni manumanu yava i va, kei na so na veikoro me nodra na neimami lalai; 17ia oi keimami, keimami na vakaiyaragi, ka tu vakarau me keimami liutaki ira yani na Isireli, me yacova sara ni keimami sa la'ki vakatikori ira ki na nodra yasana; ia o ira na neimami lalai me ra tiko ga mai ena veikoro vakabai, ena vukudra na lewenivanua oqo. 18Keimami na sega mada ni lesu ki na neimami veitikotiko, me yacova sara ni ra sa taukena na Isireli, na nodra i votavota na tamata yadua. 19Keimami sa na sega ni vakaivotavota vata kei ira ena tai kadua ni Joritani, ka lako yani; baleta keimami sa mai vakaivotavota ena tai ni Joritani oqo, vaka ki na tokalau.
20Sa qai kaya vei ira o Mosese, Kevaka o ni na kitaka na ka oqo, mo ni vakaiyaragi ka lako ena mata i Jiova ki na i valu, 21O ira kecega vei kemudou sa vakaiyaragi, me takosova na Joritani ena mata i Jiova, me yacova sara ni sa vakasavi ira tani na nona meca kecega, 22a sa vakamalumalumutaki na vanua ena mata i Jiova; ni oti o ya, o ni na qai lesu, o ni na qai galala mai na nomuni yalayala vei Jiova, kei ira na Isireli; ia o ni na taukena na vanua oqo ena mata i Jiova. 23Ia kevaka o ni na sega ni kitaka vakakina, raica, o ni sai valavala ca ena mata i Jiova; ia mo ni kila vakavinaka tiko ni na talevi kemuni tale mai na nomuni i valavala ca. 24Mo ni tara eso na nodra koro na nomuni lalai, ka viria talega na kedra bai na nomuni sipi; ka vakayacora na ka o ni sa yalataka.
25Era sa vosa vei Mosese o ira na luve i Kata kei na luve i Rupeni, ka kaya, Oi keimami na nomuni tamata, keimami na cakava ga na ka o ni sa vakarota. 26Era na tiko ga mai na veikoro e Kiliati o ira na neimami lalai kei na wati keimami, ka vakakina na neimami sipi kei na qele ni bulumakau; 27ia oi keimami na nomuni tamata keimami na lako yani ki na tai kadua ena mata i Jiova, ka vakaiyaragi ki na i valu me vaka o ni sa vakarota.
28Sa qai vakarota vei Iliesa na bete kei Josua na luve i Nuni, o Mosese kei ira na turaga ni veivuvale ena nodra veimataqali na Isireli ena vukudra na luve i Rupeni kei na luve i Kata.#Josua 1.12-15 29A sa kaya vei ira o Mosese, “Kevaka era lako vata kei kemuni ki na tai kadua ni Joritani o ira na luve i Kata, kei ira na luve i Rupeni, ka vakaiyaragi ena mata i Jiova, ka o ni sa vakamalumalumutaka na vanua, ia mo ni qai solia vei ira na vanua o Kiliati me nodra i votavota; 30ia kevaka era sega ni lako vata kei kemuni ki tai kadua, ka vakaiyaragi, me ra qai votai vata kei kemuni mai na vanua o Kenani.”
31Era sa qai sauma na luve i Kata kei na luve i Rupeni, ka kaya, “Me vaka sa kaya ko Jiova vei keimami na nomuni tamata, keimami na kitaka vakakina. 32Keimami na lako ki tai kadua ki na vanua o Kenani, ka vakaiyaragi tu ena mata i Jiova, me keimami taukena kina na neimami votavota ena tai oqo ni Joritani.”
33Sa qai solia o Mosese vei ira na luve i Kata kei na luve i Rupeni, kei na dua na veimama ni mataqali nei Manasa, na luve i Josefa, na matanitu i Sioni na nodra tui na Amoraiti, kei na matanitu i Oki na tui Pasani, na vanua kei na kena veikoro vata kei na kedra vanua, io na veikoro ena vanua taucoko. 34Ia o ira na luve i Kata era tarai Tiponi, Ataroci, Aroeri, 35Ataroci, Sofani, Jaseri, Jokipa, 36Peci Nimira, kei Peci Arani, na veikoro vakabai, kei na so talega na bai ni sipi.
37Ia o ira na luve i Rupeni, era vakaduri Esiponi, o Elale, o Kiriaceimi, 38O Nepo kei Peali Mioni (ena vukici na yacadra), kei Sipima, ka ra vakayacana vou koto era tara.
39Era qai lako yani ki Kiliati o ira na luve i Mekiri, na luve i Manasa, ka valuta ka vakasavi ira tani na Amoraiti era tiko kina. 40Ia sa qai soli Kiliati o Mosese vei Mekiri na luve i Manasa; ka sa la'ki vakaitikotiko kina o koya. 41Sa lako o Jairi na luve i Manasa, ka valuta na veikoro lalai, ka vakayacani ira me o Avoci Jairi.#32.41 A kena i balebale a veikorokoro i Jairi 42A sa lako o Nopa ka valuti Kinaci kei na kena veikoro lalai, ka vakatoka me o Nopa, me vakayacani ga vua.
Currently Selected:
TIKO VOLI MAI NA LEKUTU 32: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.