VUNAU NI SORO 23
23
Na Solevu Vakalotu
1A vosa vei Mosese ko Jiova ka tukuna, 2“Mo vosa vei ira na Isireli, ka kaya vei ira, Oqo na solevu vakalotu eso au sa digitaka me noqu, ka mo ni kacivaka me sa solevu tabu ka rokovi. 3E ono na siga me caka kina na cakacaka; ia ena i kavitu ni Siga, na Siga ni Vakacecegu, mo ni kakua ni kitaka kina e dua na cakacaka; oqo na Siga ni Vakacecegu vei Jiova ena nomuni veitikotiko kecega.#Lako 20.8-10; 23.12; 31.15; 35.2; Vrua 5.12-14 4Oqo na solevu vakalotu sa digitaka ko Jiova, na solevu tabu mo ni vakayacora ena kedra gauna dodonu.
Na Lakosivia kei na Madrai sa Sega ni Vakatubu
(Tiko 28.16-25)
5Ena yakavi ni katinikava ni siga ni matai ni vula, sa na ia kina na Solevu ni Lakosivia i Jiova.#Lako 12.1-13; Vrua 16.1-2 6Ia ena i katini kalima ni siga ni vula vata ga o ya, sa tekivu kina na Solevu ni Madrai Sega ni Vakatubu; e vitu na siga mo ni kania kina na madrai sa sega ni vakatubu.#Lako 12.14-20; 23.15; 34.18; Vrua 16.3-8 7Ena i matai ni siga ni solevu, mo ni vakasoqoni vata mai ka sokalou; mo ni kakua ni cakava kina e dua na cakacaka. 8Mo ni vakacabora tiko na i soro sa cabo vei Jiova ena bukawaqa me vitu na siga. Ena i kavitu ni siga mo dou vakasoqoni vata tale mai kina ka sokalou, ia mo ni kakua ni cakava kina e dua na cakacaka bibi.”
Na Vakacabori ni i Sevu
9A sa vosa talega vei Mosese ko Jiova, ka kaya, 10“Mo vosa vei ira na Isireli, ka tukuna vei ira: Ni o ni sa yaco ki na vanua au sa solia vei kemuni, ka tamusuka kina na kena vuata, mo ni kauta na i vau sila ni nomuni i sevu vua na bete; 11ia me qai vakacabora o koya na i vau sila ena mata i Jiova mo ni ciqomi kina; ia me vakacabora na bete ena siga ka tarava yani na Siga ni Vakacecegu. 12Ena siga sa vakacabori kina na i vau sila, ni cabora talega kina e dua na lami tagane sa yabaki dua ka sega na ka e ca kina, me i soro kama vei Jiova. 13Oqo me qai cabori vata kei na kena i madrali laukana, e rua na bibi na valawa digitaki sa veiwaki vata kei na waiwai, na i soro sa vakacabori ena bukawaqa sa vakayagataki vakarua vei Jiova me ka boi vinaka ia na i madrali sa liviraki me waini, me dua na i ka va na kena i vakarau. 14Dou kakua ni kania na madrai se na sila tavu, se na sola drokadroka ka me yacova na siga dou sa kauta kina na i madrali vua na nomudou Kalou, oqo sa nomudou i lesilesi me tawa mudu ena nomudou i tikotiko kei na nomudou veitabatamata kecega.
Na Solevu ni Tatamusuki
(Tiko 28.26-31)
15“Mo ni wilika me vitu na macawa mai na siga ka tarava na Siga ni Vakacecegu, o ya na siga ka cabori kina na i vau sila me i soro yalovaki.#Lako 23.16; 34.22; Vrua 16.9-12 16Dou wilika me yacova ni sa oti e vitu na Siga ni Vakacecegu, o ya na i ka limasagavulu ni siga, mo dou na qai vakacabora kina na i madrali sila vou vei Jiova. 17Dou na kauta mai na nomudou i tikotiko e rua na i buli madrai me i soro yalovaki me rau buli mai na rua na kilokaramu na valawa vakatubutaki me i sevu ni vuanikau sa tamusuki ki vei Jiova. 18Mo ni cabora vata kei na madrai e vitu na lami ka ra yabaki yadua, kei na dua na luve ni bulumakau tagane, kei na rua na sipi tagane, ka me kakua ni dua na tiki ni yagodra na manumanu oqo me ca; ka me i soro kama ni veivinakati vei Jiova. 19Dou vakacabora talega e dua na me tagane me baleta na i soro ni valavala ca kei na rua na luve ni sipi tagane yabaki yadua me i soro ni veivinakati. 20Ia na bete me laveta vata na madrai sai sevu ni vuata kei na lami ruarua ni sa vakacacabo, me i soro yalovaki ena mata i Jiova; ni sai madrali tabu vei Jiova oqo. 21Me kakua ni dua na tamata me cakava e dua na cakacaka bibi ena siga vata ga o ya, ia dou vakasoqoni vata ga mai ka sokalou. Mera na rokova ka vakamuria tiko na i lesilesi oqo o ira kece na nomudou kawa ena veitabagauna kecega, ena vanua kecega o ni bula kina.
22Ni o ni sa tatamusuki ena nomuni vanua, me kakua sara ni yaco ki na bati ni nomuni i teitei na tatamusuki, ka mo ni kakua talega ni tomika na sila sa lutu tu ena i teitei ni sa oti na tatamusuki; mo ni biuta tu ga oqo me kedra na dravudravua kei ira na vulagi. Ni sai au ko Jiova na nomuni Kalou.#Vsoro 19.9-10; Vrua 24.19-22
Na Solevu ni Yabaki Vou
(Tiko 29.1-6)
23Sa vosa tale vei Mosese ko Jiova, ka kaya: 24Mo vosa vei ira na Isireli, ka kaya: Ena i matai ni siga ni kavitu ni vula, mo ni lesia oqo me siga ni vakacegu, ka vakasoqoni vata mai kina ka sokalou ena gauna e uvu kina na davui. 25Mo ni kakua ni kitaka kina e dua na nomuni cakacaka; ia mo ni cabora ga na i soro ena bukawaqa vei Jiova.
Na Siga ni Veisorovaki
(Tiko 29.7-11)
26 #
Vsoro 16.29-34
E a kaya ko Jiova vei Mosese: 27Na i katini ni siga ni kavitu ni vula sa Siga ni Veisorovaki, oqo na vakacaboisoro bibi ni kena sorovaki na i valavala ca ni tamata kecega ka dau qaravi ga vakadua ena loma ni dua na yabaki. Ena siga oqo mo ni lolo kina, ka vakasoqoni vata mai ka sokalou, ka cabora vei Jiova na i soro sa cabo ena bukawaqa. 28Mo ni kakua ni kitaka e dua na cakacaka ena siga oqo baleta ni sa siga e vakacabori kina na i soro me kau laivi se buluti kina na i valavala ca. 29Ia o koya sa sega ni lolo ena siga oqo ena sega tale ni qai wili me nona na Kalou. 30Na tamata kecega sa kitaka e dua na cakacaka ena siga vata o ya, au na vakarusai koya tani mai vei ira na kai nona. 31Ni kakua ni kitaka kina e dua na cakacaka ni sai lesilesi tawa mudu oqo vei ira na nomuni kawa kecega ena veivanua kecega o ni bula kina. 32Mai na dromu ni siga ena i kaciwa ni siga ni vula ki na dromu ni siga ena i katini ni siga, mo ni vakarokorokotaka na siga oqo me dua na siga ni vakatatabu, ka mo ni kakua ni kania kina e dua na kakana.
Na Solevu ni Valetabanikau
(Tiko 29.12-40)
33 #
Vrua 16.13-15
Sa vosa tale vei Mosese ko Jiova 34me tukuna vei ira na Isireli, ka kaya: Ena i katinikalima ni siga ni kavitu ni vula, me tekivu kina na Solevu ni Valetabanikau ka me vitu na siga na kena dede. 35Ena i matai ni siga ni solevu, mo ni vakasoqoni vata mai ka sokalou, ka mo ni kakua ni kitaka kina e dua na cakacaka. 36Ena siga yadudua ena loma ni vitu na siga oqori mo ni vakacabora kina na i soro ena bukawaqa vei Jiova. Mo ni vakasoqoni vata tale mai ena i kawalu ni siga ka sokalou, ka vakacabora e dua na i soro ena bukawaqa vei Jiova. Oqo e siga ni sokalou, ka mo ni kakua ni cakava kina e dua na cakacaka. 37Oqo na veisolevu digitaki mo ni dau solevutaka ka vakarokorokotaki kina ko Jiova ena gauna o ni vakasoqoni vata kina, ka sokalou kina, ka vakacaboisoro kama kina, ka vakacabo i madrali laukana kina, ka vakacabo i madrali liviraki kina, me vaka na kena i vakarau ena kena siga lokuci. 38Na solevu kece oqo era i kuri ga ni soqoni ni Siga ni Vakacecegu, kei na nomuni madrali era i kuri ni veimadrali eso o ni sa dau cabora wasoma, kei na i madrali sa bubuluitaki, kei na nomuni i madrali sa cabori ena lomasoli vei Jiova.
39Ni sa oti na nomuni tatamusuki mai na nomuni i teitei, mo ni qai marautaka na solevu oqo vei Jiova me vitu na siga, ka me tekivu ena i katinikalima ni siga ni kavitu ni vula. Ia me kakua ni vakayacori e dua na cakacaka ena i matai ni siga ni solevu kei na kena i kawalu. 40Ena i matai ni siga mo ni kauta kina na vua ni nomuni i tei digitaki, na taba ni niusawa kei na tabanikau e sobi na drauna, na kau e dau se ena bati ni uciwai, ka solevutaka ena reki kei na marau me rokovi kina ko Jiova na nomuni Kalou. 41Ia mo ni marautaka na solevu oqo vei Jiova me siga vitu ena veiyabaki. Oqo na kena i lesilesi ka tawa mudu ena nomuni veitabatamata; ia mo ni dau kitaka ena kena i kavitu ni vula. 42Na lewenivanua kece e Isireli me ra tiko e loma ni vale tabanikau me siga vitu, 43ka me ra kila kina na nomuni kawa ni a vakavuna ko Jiova me ra bula voli ga na Isireli ena veivale tabanikau ena gauna au a kauti ira tani mai kina e Ijipita: Ni sai au ko Jiova na nomuni Kalou.
44Sa qai vakaraitaka vei ira na Isireli o Mosese na veisolevu sa digitaka ko Jiova.
Currently Selected:
VUNAU NI SORO 23: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
