VUNAU NI SORO 24

Na Kena Qarauni na Cina

(Lako 27.20-21)

1A sa vosa vei Mosese ko Jiova, ka kaya: 2Mo vakaroti ira na Isireli me ra kauta mai vei iko na waiwai olive dina sa caka mai na olive digitaki me waiwai ni cina ka me caudre tikoga kina. 3Me vakacaudreva na cina ena Vale ni Veitavaki ena veiyakavi o Eroni ka raica me caudre tikoga me yacova na mataka, oqori ena taudaku ni lati ni Kato ni Veiyalayalati, ena mata i Jiova. Oqo sai vakaro tudei me vakayacori ena veigauna kecega. 4O Eroni me na vakarautaka na cina taucoko ena kedra i tutu sa caka ena koula dina, ka me yadrava na kena waqa tiko na cina ena mata i Jiova ena kena gauna.

Na Madrai sa Vakacabori Vua na Kalou

5Mo ni kauta na valawa digitaki me 12 na kilokaramu, ka vavia kina e tinikarua na i buli madrai.#Lako 25.30 6Mo qai tuva me yatu rua, me yaono ena i yatu yadua ena dela ni teveli koula. 7Ia mo qai biuta na drega me vakamai na ferekiniseni ena maliwa ni yatu yadua me cabo vata kei na i madrali sa cabori ena bukawaqa vei Jiova. 8Na madrai oqo me na daucabo tikoga ena mata i Jiova ena Siga ni Vakacecegu kecega, ena vukudra na Isireli, me ka ni veiyalayalati tawa mudu. 9Na madrai oqo e kena i votavota o Eroni kei ira na luvena, ka me ra kania ena dua na vanua sa vakatabui, baleta ni oqo e tiki ni kakana tabu sara sa cabo vei Jiova me kedra na bete.#Maciu 12.4; Mari 2.26; Luke 6.4

Totogi ni Vosavakacacataki ko Jiova

10E dua na tagane sa kai Ijipita o tamana ka yalewa ni Isireli o tinana, o Silomeci na yacana, ka luve i Tipiri ena mataqali o Tani. A sa lako yani ki na kedra maliwa na Isireli, ka veivala kei na dua na Isireli ena loma ni tikotiko. 11A sa vosavakacacataka na yaca i Jiova na tagane oqo. Era sa qai kauti koya yani vei Mosese, 12ka tauri koya vakavesu, ka waraka na loma i Jiova ena vuku ni ka me qai caka vua.

13Sa qai vosa vei Mosese ko Jiova ka kaya, 14“Dou kauti koya na tagane oqori ki na taudaku ni i tikotiko. O ira kece sara era rogoci koya ni vosavakacaca me ra tabaka na uluna ena ligadra me vakadinadinataka na nona cala, ka me ra qai vakavirika ena vatu o ira na lewenivanua kecega. 15Ia mo vosa vei ira na Isireli, ka kaya, o koya yadua sa vosavakacacataka na nona Kalou ena cudruvi ena vuku ni nona i valavala ca. 16O koya sa vosavakacacataka na yaca i Jiova ena vakamatei vakaidina; era na vakaviriki koya ena vatu o ira na lewenivanua taucoko. Kevaka e dua na Isireli se vulagi sa vosavakacacataka na yaca tabu i Jiova, ena vakamatei vakakina.

17“O koya sa vakamatea e dua na tamata ena vakamatei talega o koya.#Lako 21.12 18O koya sa vakamatea e dua na manumanu yavaiva ka nona e dua tale, e dodonu me na vakaisosomitaka lesu tale vua na kena i taukei, na bula me i sosomi ni bula.

19Kevaka e dua na tamata sa vakamavoataka tale e dua na tamata, e dodonu me na caka lesu tale vua na ka ga sa vakayacora; 20Kevaka e vakaramusutaka e dua na sui, ia me na vakaramusutaki e dua na nona sui; me i sau ni mata na mata, ka me i sau ni bati na bati. Na mavoa cava ga e vakayacora me na vakasosomitaki tale vua.#Lako 21.23-25; Vrua 19.21; Maciu 5.38 21O koya e vakamatea e dua na manumanu yavaiva e dodonu me vakaisosomitaka tale; ia o koya sa vakamatea e dua na tamata ena vakamatei talega vakakina. 22Na lawa oqo e sa okati kemuni kece, o kemuni na Isireli kei ira na vulagi ena kemuni maliwa; Ni sai au ko Jiova na nomuni Kalou.”#Tiko 15.16

23Ni sa tukuna oti o Mosese vei ira na Isireli na veika oqo, era sa qai kauti koya na tamata ka vosavakacaca ki na taudaku ni nodra i tikotiko ka vakaviriki koya ena vatu me yacova na nona mate. Era sa vakayacora na Isireli na ka sa vakarota vei Mosese ko Jiova.

Currently Selected:

VUNAU NI SORO 24: FNV

Highlight

Copy