VUNAU NI SORO 22

Na Bibi ni i Soro Tabu

1Sa vosa vei Mosese ko Jiova 2me tukuna vei Eroni kei iratou na luvena na veika oqo: “Dou doka na i madrali tabu kece era sa vakatabuya vei au na Isireli, mo dou kakua kina ni vakacacana na yacaqu tabu; Ni sai au ko Jiova. 3Kevaka e dua vei ira na nomu kawa, ni se sega mada ni savasava o koya ka sa toro volekata yani na i madrali tabu era sa vakatabuya vei au na Isireli, ena muduki tani mai mataqu na tamata o ya me kakua tale vakadua ni veiqaravi ena i cabocabonisoro: Ni sai au ko Jiova.

4Me kakua ni dua vei ira na luve i Eroni sa tauvi koya e dua na mate ni kuli se turi me na kana mai na i madrali tabu, me yacova ni sa vakasavasavataki. Ena vakadukadukalitaki na bete kevaka e tara e dua na ka sa vakadukadukalitaki mai na yago ni tamata mate se na tagane sa bura na nona wai-ni-vakaluveni. 5Ena vakadukadukalitaki koya talega kevaka e tara e dua na manumanu se tamata tawa savasava. 6O koya na bete sa vakadukadukalitaki ena sega ni savasava tikoga me yacova na yakavi, ka sega ni na kana mai na madrali tabu kevaka e se bera taumada ni sili ena wai. 7Ia ni sa dromu na matanisiga, ena qai savasava o koya ka me qai kania na kakana tabu sa vakacabori, ni sa kena i votavota oqo. 8Me kakua ni kania o koya na lewe ni manumanu e kau mai na manumanu sa mate ga vakataki koya se vakamatei mai vei ira na manumanu kila; oqo ena vakadukadukalitaki koya; Ni sai au ko Jiova.

9Me ra muria na noqu i vakaro o ira na bete kece sara, de ra na cudruvi ena vuku ni nodra caka cala ka mate kina, ni ra sa talaidredre ki na lawa bibi sa virikotori: Ni sai au ko Jiova, o koya sa vakasavasavataki ira.

10“O ira ga na lewe ni vuvale vakabete era rawa ni kania na i madrali vakatabui; ia me kakua tale ni dua tamata me kania: ke mani tiko e nona vale na bete se vakacakacakataki mai vua na bete. 11Ia kevaka sa volia na bete e dua na nona tamata bobula, se sa sucu ena loma ni nona vale na tamata bobula, sa vakatarai o koya oqo me kana. 12Na luvena yalewa talega na bete, o koya sa vakawati vua e dua sa sega ni bete, me kakua ni kania e dua na i votavota mai na i madrali tabu. 13Ia kevaka sa yaco me yada na luvena yalewa na bete se sa biuti koya o watina, ka sega na luvena, ka sa lesu tale vei tamana, ka tiko kina me vaka ni sa goneyalewa, sa rawa ni kana mai na i votavota kei tamana; ia me kakua ga ni kania e dua sa sega ni lewe ni vuvale vakabete.

14Ia kevaka sa kania na ka tabu e dua na tamata ni sa sega ni kila, me qai vakaisosomitaka na i madrali vua na bete, ka solia me kena i kuri e dua na i kalima ni kena i voli. 15O ira na bete me ra kakua ni vakacacana na i soro tabu era sa cabora na Isireli 16mai na nodra vakatara me kania e dua ka sega ni dodonu me kania; oqo ena vakavuna na nona cudruvi ena vuku ni nona caka cala na tamata oqo; Ni sai au ko Jiova, o koya sa vakasavasavataka na i madrali.

17A vosa talega vei Mosese ko Jiova 18me tukuna vei Eroni kei iratou na luvena na i vakaro oqo. Kevaka e dua vei ira na mataqali i Isireli, se na kai tani sa tiko vulagi kei ira na Isireli, sa vakacabora na nona i soro kama, ena vuku ni dua na nona bubului, se na nona i soro ena yalo vinaka, na manumanu me vakacabori vei Jiova e dodonu me savasava. 19Me vakacabora e dua na bulumakau tagane sa sega na ka e ca kina mai na nomu qele ni bulumakau, se na sipi, se na me, mo vakadonui kina. 20Ia mo ni kakua ni cabora kevaka sa vakaleqai tu, ka ni na sega ni vakadonuya se vinakata ko Jiova.#Vrua 17.1 21Ena gauna sa vakacabora kina vei Jiova na nona i madrali ni veivinakati e dua na tamata, ena vuku ni dua na bubului se i soro ena yalo e vinakata, na manumanu sa cabora e dodonu me sega na tikina e ca, me rawa kina ni ciqomi na i madrali oqo. 22Kakua ni cabora vei Jiova e dua na manumanu e mataboko tu, se ramusu na yavana, se mudu e dua na tikina, se mavoa vakabalavu, se tauvi bo, se tauvi mate ni kuli. Kakua ni vakama e dua na mataqali manumanu vakaoqo ena i cabocabonisoro me i madrali vei Jiova. 23E rawa ni o vakacabora e dua na manumanu e vakaleqai tu me vaka e nomu i solisoli vakailoloma ga, ia ena sega ni ciqomi kevaka e cabori ena vuku ni bubului. 24Kakua ni vakacabora vei Jiova e dua na manumanu sa vakaleqai na nona soresore, ni sa drakusi tu, se mavoa, se kavoro, se kadresu. Oqo e ka vakatabui e nomuni vanua.

25Kakua talega ni cabora me nomu i madrali e dua na manumanu sa tauri mai vei ira na kai tani. Na manumanu vakaoqo era sa okati me ra vakaleqai ka sega ni vakadonui.”

26Sa vosa talega vei Mosese ko Jiova, ka tukuna, 27“Ni sa sucu e dua na bulumakau, se na sipi, se na me, e dodonu me tiko voli mada kei tinana me siga vitu; ia mai na kena i kawalu ni siga ka lako yani sa rawa ni cabo ena bukawaqa me i soro vei Jiova. 28Na bulumakau yalewa, se sipi yalewa mo ni kakua ni vakamatea vata na tinana kei na luvena ena dua vata ga na siga. 29Ia ni o ni sa via vakacabora e dua na i soro ni vakavinavinaka vei Jiova, mo ni vakacabora ena i valavala mo ni vinakati ka vakadonui kina. 30Ia me laukana ena siga ga o ya, me kakua ni vo tiko me yacova na mataka ka tarava: Ni sai au ko Jiova.

31Mo ni vakabauta na noqu i vakaro, ka muria; Ni sai au ko Jiova. 32Dou kakua ni vakacacana na yacaqu tabu; ka me ra vakadinadinataka kece na Isireli na noqu yalosavasava ka vakarokorokotaki au. Ni sai au ko Jiova, o koya sa vakasavasavataki kemuni, 33ka kauti kemuni tani mai na vanua o Ijipita me'u nomuni Kalou. Ni sai au ko Jiova.

Currently Selected:

VUNAU NI SORO 22: FNV

Highlight

Copy