IPERIU 7

O Melikiseteki na Bete

1 # Vteki 14.17-20 O Melikiseteki oqo na tui Salemi ka bete talega ni Kalou Cecere Sara. E a tavaki Epara-ama ni lesu tiko mai na i valu ka a vakadrukai ira kina na tui, ka vakalougatataki koya. 2E a solia vua o Epara-ama e dua na i katini ni veika kecega ka rawata mai ena i valu. Na i matai ni balebale ni yaca i Melikiseteki na “Tui ni Dodonu.” Ia me vaka ni sa tui talega kei Salemi, sai balebale talega ni yacana na “Tui ni Vakacegu.” 3E sega ni tukuni na tamana, se na tinana se na nona kawa se na i tekivu ni nona bula se na kena i tinitini. Ia sa vaka ga na Luve ni Kalou o koya, sa bete tiko ga ka sega ni mudu.

4Ia mo ni vakasamataka mada na cecere ni tamata oqo. Ni o Epara-ama mada ga, o koya na noda qase, sa dau solia vua e dua na i katini ni yau kecega sa rawata mai na i valu. 5#Tiko 18.21Sa vakakina na veivakaroti ni Lawa vei ira na kawa i Livai era bete me ra kumuna vata mai na nodra i katini na Isireli, oqori mai vei ira ga na wekadra, ka dina ga ni ra kawa talega mai vei Epara-ama o ira oqo. 6E sega ni kawa mai vei ira na Livai o Melikiseteki, ia sa kumuna ga o koya na i katini nei Epara-ama ka vosa vakalougatataki koya sa cavuti vua na vosa ni yalayala ni Kalou. 7Sa sega tale ni qai vakatitiqataki ni sa levu cake o koya sa solia na veivakalougatataki mai vua sa ciqoma na veivakalougatataki. 8Me baleti ira na bete, sa kumuni na i katini mai vua na tamata sa vakaiyalayala ga na nona bula; ia me baleti Melikiseteki, sa kumuni na i katini mai vua sa vakadinadinataki ni se bula tikoga, me vaka sa kaya na i Vola Tabu. 9Sa rawa kina me da kaya beka vakaoqo, ni gauna e sauma kina na nona i katini o Epara-ama, a sa sauma talega vakakina o Livai (na nona kawa era dau kumuna na i katini). 10Ni a se bera ni sucu o Livai, ia sa vaka ga ni sa sucu, ke da kaya rawa beka vakaoqo, o ya ni sa tiko o koya ena yago i nona qase o Epara-ama ena gauna e sotavi koya kina o Melikiseteki.

11Ia kevaka e rawata vakavinaka sara na matabete i Livai me vakayacora na ka e nakiti me cakava, (ka ni a soli na lawa ena vuku ni matabete oqo) a cava na kena yaga me tubu mai e dua tale na bete me vakataki Melikiseteki ka sega ni vakataki Eroni? 12Ia ni sa veisau na matabete, sa dodonu me veisau talega vakakina na Lawa. 13Na noda Turaga, o koya sa kainaki tiko e vukuna na veika oqo, sa lewe ni duatani tale na yavusa o koya, ka se sega vakadua ni dua na lewe ni nona yavusa me bau veiqaravi vakabete. 14Sa matata vinaka tu ni lewe ni yavusa o Juta na noda Turaga, ka a sega ni bau kaya e dua na ka o Mosese me baleta na yavusa o ya ni tukuna tiko na ka e baleti ira na bete.

E Dua Tale na Bete Vakataki Melikiseteki

15Sa qai matata vinaka cake sara na ka oqo, ni sa basika mai e duatani tale na bete, sa vakataki Melikiseteki. 16A sega ni vakayacori me bete o koya ena vuku ni lewa vakalawa se vakatamata, ia ena kaukauwa ga ni bula sa sega na kena i tinitini. 17#Same 110.4Ni sa kaya na i Vola Tabu,

“O iko na bete tawamudu,

Me vaka na i tuvatuva vakabete i Melikiseteki!”

18Sa qai biu vakatikitiki tani kina na lawa makawa, baleta ni sa malumalumu ka tawayaga. 19Ni sa sega ni rawa ni vakataucokotaka na Lawa i Mosese e dua na ka me vinaka sara. Ia oqo sa qai soli mai vei keda e dua na i nuinui e uasivi cake sara me da toro voleka kina vua na Kalou.

20Me kena i kuri, sa tiko talega na bubului ni Kalou. A sega ni tiko e dua na bubului vakaoqo ena gauna era a vakatikori kina na vo ni bete. 21#Same 110.4Ia sa yaco ko Jisu me bete ena vuku ni bubului, ni sa kaya vua na Kalou:

“Sa kitaka e dua na bubului na Turaga

Ka na sega ni veisautaka tale na lomana:

‘O na yaco o iko mo bete tawamudu.’ ”

22Ena vuku ni duidui oqo, sa qai yaco kina ko Jisu me i vakadei ni dua tale na veiyalayalati e uasivi cake sara.

23Sa tiko talega e dua tale na kena duidui: era sa lewe vuqa sara na vo ni bete ka sa tarovi koso ga na nodra via tomana tiko na nodra cakacaka vakabete ni ra sa mate. 24Ia ko Jisu sa bula tiko ga ka tawamudu, ka sa sega ni vakaisosomitaki ena nona cakacaka vakabete. 25O koya oqo sa rawa kina vua, ena gauna oqo kei na veigauna kece sara, me vakabulai ira era gadreva me ra lesu vua na Kalou ena vukuna, baleta ni sa bula tikoga o koya me dau masulaki ira.

26Sa i Jisu ga na Bete Levu sa sotava na veika eda sa gadreva. Sa yalosavasava o koya, sa sega ni beitaki ena dua na ka se tiko vua na i valavala ca; sa tawasei tani mai vei ira na i valavala ca o koya ka sa vakacerecerei me uasiviti lomalagi. 27#Vsoro 9.7Sa sega ni vakataki ira na vo ni bete levu o koya; sa sega ni yaga vua me vakacabora taumada na i soro ni nona i valavala ca ka qai muri na nodra na tamata. A sa vakacabora o koya e duabulu ga na i soro ni valavala ca, na i soro sa cabori ga vakadua me baleta na tamata kecega, ka yaco oqori ena gauna sa solia kina na nona bula me vakamatei. 28Na Lawa i Mosese sa lesi ira na tamata sa sega ni vinaka sara na nodra bula me ra bete levu; ia na yalayala ni Kalou ka sa vakayacori vata kei na nona vosa bubului, ka sa qai basika mai ni sa yaco oti mai eliu na Lawa, sa lesia na Luvena, o koya sa vakayacori me vinaka sara ka sega ni mudu.

Currently Selected:

IPERIU 7: FNV

Highlight

Copy