IPERIU 6

Me Da Toso Tikoga ki Liu

1O koya oqo me da toso tikoga ki liu, ki na i vakavuvuli matua ka vakanadakuya na i matai ni lesoni me baleta na vosa ni Kalou. Me da kua tale ni vakalesuva na vulici ni yavu vakalotu me vaka na veivutuni mai na veicakacaka tawayaga eso kei na vakabauta na Kalou; 2na i vakavuvuli me baleta na papitaiso kei na veitabaki ni liga; na nodra tucake tale na mate kei na cudruvi tawamudu. 3Me da toso ga ki liu! Ni sai koya oqo na ka eda na kitaka, kevaka sa vakakina na loma ni Kalou.

4Ni sa dredre sara me ra veivutuni tale o ira era a vakararamataki eliu, era a tovolea na i solisoli vakalomalagi, era a vakaivotavota ena Yalo Tabu, 5era sa kila na vinaka ni vosa ni Kalou, ka ra sa vakila rawa na kaukauwa ni bula ena muri mai. 6Ia era sa qai saumaki ka biuta vakatikitiki na nodra vakabauta! Sa dredre sara kina me ra veivutuni tale o ira oqo, baleta ni ra sa vakota tale tiko vakai ira na Luve ni Kalou ki na kauveilatai ka vakamaduataki koya ena matanavotu.

7Ni sa vakalougatataka na Kalou na qele sa dau gunuva na uca ka dau tau wasoma kina, ka vakatubura na veimataqali kau sa yaga vei ira sa tei ena vukudra. 8#Vteki 3.17,18Ia kevaka e vakatubura na veikau vakavotona kei na co ca sa sega na kena yaga, sa rawa ni cudruva na Kalou, ka sa kena i tinitini me vakamai.

9E dina ga ni vakaoqo na neitou vosa, ia sa dei na loma i keitou me baleti kemuni na weka i keitou. Keitou kila ni sa nomuni na veivakalougatataki e vinaka cake ena vuku ni bula sa tiko vei kemuni. 10Ni sa sega ni tawa dodonu na Kalou me sega ni okata na nomuni cakacaka kei na loloma o ni a vakaraitaka ena vukuna ena nomuni qaravi ira na vakabauta, me vaka o ni sa kitaka tikoga oqo. 11Keitou sa gadreva, ena vukumuni yadudua, mo ni dui gugumatua vakakina me yacova na i vakataotioti; me na yaco dina sara kina na veika o ni sa nuitaka tiko. 12Keitou sega ni vinakata mo ni yaco mo ni vucesa, ia mo ni vakataki ira ga era sa vakabauta ka dau vosota vakadede ka ra sa taukena na veika e sa yalataka na Kalou.

Na Yalayala Tudei ni Kalou

13Ena gauna sa vosa yalayala kina na Kalou vei Epara-ama, sa bubuluitaka ni na vakayacora na ka sa yalataka. Ia me vaka ni sega ni tiko e dua e cecere cake vua, sa vakayagataka ga na yacana vakai koya me bubului kina. 14#Vteki 22.16,17E a kaya, “Au na vakalougatataki iko dina, ka vakalevutaka sara na nomu kawa.” 15Ena vuku ni nona vosota vakadede o Epara-ama, a taukena kina na veika a yalataka vua na Kalou. 16Ni sa bubului na tamata sa dau vakayagataka na yaca ni dua e cecere cake vua, ka sa dau tinia na veileti kecega na bubului. 17O koya oqo ni gadreva na Kalou me vakatakila vakavinaka sara vei ira era na taukena na ka e yalataki na kena sega ni rawa ni veivukiyaki na nona i naki, a mani vakadeitaka kina na nona yalayala ena bubului. 18E rau sa qai tu kina oqo e rua na ka, sa sega ni vukici rawa, ka sa sega ni rawa ni vosa lasu kina na Kalou. O koya oqo eda sa qai vakacegui kina vakalevu oi keda eda sa dro me da vakarurugi vua ka me da taura dei tiko na i nuinui sa tu e matada. 19#Vsoro 16.2Sa tu vei keda na i nuinui oqo me i kelekele dina ka dei na lomada, a sa curuma na i lati ni valenisoro vakalomalagi ki na rumu tabu e loma sara, 20#Same 110.4ki na vanua sa liu kina ko Jisu ena vukuda, ni sa yaco o koya me bete levu tawamudu ena matabete i Melikiseteki.

Currently Selected:

IPERIU 6: FNV

Highlight

Copy