IPERIU 5

1Sa dau digitaki na bete levu mai vei ira na tamata ka sa lesi o koya me qarava na Kalou ena vukudra. Sa nona i tavi me dau vakacabora na i madrali kei na i soro ni valavala ca. 2Sa rawarawa vua me tauri ira toka vakamalua na tamata viavialevu kei ira era caka cala, me vaka ni sa malumalumu talega o koya ena vuqa na ka. 3#Vsoro 9.7Me vaka ni sa tu talega vua na malumalumu, sa ganita kina me vakacabora na i soro ni nodra i valavala ca na tamata kei na nona i valavala ca vakai koya. 4#Lako 28.1Sa sega ni dua e digitaki koya ga vakai koya me qarava na i tavi dokai ni cakacaka vakabete levu, ia sa kacivi koya ka lesi koya duadua ga na Kalou — me vakataki Eroni.

5 # Same 2.7 Sa vaka talega kina ko Karisito, ni a sega ni vakacerecerei koya vakai koya me buli me bete levu, ia sa lesi koya ga na Kalou ka kaya vua:

“Sa i iko na Luvequ;

Sa yaco oqo edaidai me'u Tamamu.” 6#Same 110.4E a kaya talega ena dua na tikina:

“O na yaco o iko mo bete tawamudu,

Ena matabete i Melikiseteki.”

7 # Maciu 26.36-46; Mari 14.32-42; Luke 22.39-46 E na gauna ni bula vakatamata i Jisu, a sa dau vakacabora o koya na nona masu kei na kerekere ena vakamamasu ena domoilevu kei na tagi vua na Kalou, o koya sa rawata me vakabulai koya mai na mate. Ia ena vuku ni nona yalomalumalumu kei na nona yalodina, a sa rogoci koya na Kalou. 8E dina ga ni sa Luve ni Kalou o koya, a sa vulica ga na bula ni talairawarawa mai na veika rarawa e sota kaya. 9Ni sa vakayacori oti o koya me vinaka taucoko sara, a sa yaco me vu ni bula tawamudu vei ira kecega sa talairawarawa vua, 10ka sa lesi koya na Kalou me bete levu, io ena matabete i Melikiseteki.

Me Kakua na Suka ki Muri

11E vuqa na ka e tu me keitou vakaraitaka me baleta na ka oqo, ia sa dredre ga me vakamacalataki vei kemuni ni sa rui berabera na nomuni kila rawa. 12#1Kori 3.2Sa dodonu mo ni sa dauveivakatavulici tiko ena gauna oqo, ia o ni se gadreva voli ga e dua me mai vakavulici kemuni tale ena i matai ni lesoni me baleta na vosa ni Kalou. Sa yaga ga vei kemuni mo ni gunu sucu, ka segai na kakana dina. 13O koya yadua e se gunu sucu tikoga sa sega ni vakaduiduitaka rawa na vinaka mai na ca, ka ni se gone lailai ga. 14Ia na kakana dina sa ganiti ira sa qase cake, o ira era sa vakavulica na lomadra ka sa rawa me ra vakaduiduitaka na vinaka mai na ca.

Currently Selected:

IPERIU 5: FNV

Highlight

Copy