IPERIU 8

Ko Jisu na Noda Bete Levu

1 # Same 110.1 Na i balebale ni veika sa tukuni tiko oqo sai koya ni sa tiko vakaidina e dua na noda Bete Levu, o koya sa dabe tiko ena liga i matau ni tikotiko vakaturaga i Koya sa Cecere Sara mai lomalagi. 2Sa veiqaravi tiko vakabete Levu o koya ena Tikina Tabu Sara, o ya ena valelaca dina sa vakaduria cake na Turaga, ka segai ena liga ni tamata.

3O ira kece na Bete Levu sa lesi me ra dau vakacabora na i madrali kei na manumanu eso me i soro vua na Kalou, ka sa dodonu kina vua na noda Bete Levu oqo me tiko talega na ka me vakacabora. 4Ni kevaka me a tiko ga e vuravura o koya, ke a sega sara ga ni yaco me bete, ka ni ra sa tiko na matabete me ra vakacabora na i madrali me vaka sa gadrevi ena Lawa vaka-Jiu. 5#Lako 25.40Na cakacaka era qarava na matabete oqo sai vakatakarakara ka i yaloyalo walega ni veika sa tiko mai lomalagi. Sa vakakina oqo na veika a yaco vei Mosese. Ni gauna sa vakarau tara kina o Mosese na Valelaca Tabu, sa qai vakaroti koya na Kalou, ka kaya, “Qarauna mo cakava na veika kece me vaka na kena i vakarau ka'u a vakatakila vei iko ena ulunivanua.” 6Ia oqo, sa soli kina vei Karisito na cakacaka vakabete e uasivi cake sara mai na cakacaka vakabete makawa, me vaka ga ni sa uasivi cake na veiyalayalati sa vakarautaka o koya ena kedrau maliwa na Kalou kei na nona tamata, baleta ni sa yavutaki ena veivosa sa yalataka na veika e vinaka cake sara.

7Kevaka sa sega ni dua na ka e cala me baleta na i matai ni veiyalayalati, ke a sega ni yaga me vakarautaki tale e dua. 8#Jere 31.31-34 (LXX)Ia sa kunea ga na Kalou na cala vei ira na nona tamata, ni sa kaya kina:

“Ena yaco mai na siga, sa kaya na Turaga,

Ni'u na cakava kina e dua na veiyalayalati vou kei ira na Isireli vata kei ira na Juta.

9Ena sega ni vaka na veiyalayalati ka'u a cakava kei ira na nodra qase

Ena siga ka'u a taura kina na ligadra me'u tuberi ira tani mai na vanua o Ijipita.

Era a sega ni yalodina ki na noqu veiyalayalati kei ira,

Ka'u a sega ni kauwaitaki ira kina.

10Ia sai koya oqo na veiyalayalati ka'u na cakava kei ira na Isireli

Ena veisiga eso na toro voleka mai, sa kaya na Turaga:

Au na biuta na noqu lawa ki na lomadra,

Ka vola ena vu-ni-yalodra.

Ka'u na yaco me'u nodra Kalou,

Era na yaco me noqu tamata.

11Ena sega ni dua vei ira me na vakavulica vei ira na nona kawa tamata

Se tukutuku vei ira na wekana,

‘Mo kila na Turaga.’

Ni ra na kilai au kecega,

Mai vua e lalai sara kivei koya e cecere cake sara.

12Ka'u na vosota na nodra i valavala ca

Ka guilecava vakadua na nodra caka cala.”

13Ena kena tukuni tiko oqo na veiyalayalati vou, sa vakayacora kina na Kalou me sa makawa na i matai ni veiyalayalati; ia na ka kecega sa makawa ka madra ena takali yani ni oti ga e dua na gauna lekaleka.

Currently Selected:

IPERIU 8: FNV

Highlight

Copy