VAKATEKIVU 47

1A sa lako yani o Josefa, ka kaya vua na tui, “Sa lako mai o tamaqu kei iratou na tuakaqu mai na vanua o Kenani vata kei na nodratou sipi, na me kei na ka kecega e ratou taukena. Era sa tiko oqo ena vanua o Qoseni.” 2A sa kauti iratou e lewe lima na tuakana ka vakaraitaki iratou sara vua na tui. 3Sa qai tarogi iratou na tui ka vaka, “A cava na nomudou cakacaka?”

E ratou sa kaya, “Oi keitou saka na nomuni tamata, keitou sai vakatawanisipi, me vakataki iratou ga na tama i keitou. 4“Keitou sa lako saka mai me mai tiko ena vanua oqo, baleta ni sa rui levu sara na dausiga ena vanua o Kenani ka sa sega na co me kedra na neitou manumanu. Keitou kerei kemuni mo ni solia vei keitou na nomuni tamata me keitou tiko ena vanua o Qoseni.” 5Sa qai kaya na tui vei Josefa, “Sa lako mai vei iko o tamamu kei iratou na tuakamu. 6Sa tu e matamu na vanua taucoko o Ijipita. La'ki vakatikori tamamu kei iratou na tuakamu ena dua na vanua vinaka e Ijipita; solia vei iratou me ratou la'ki tiko i Qoseni, ia kevaka o kila eso na tamata gugumatua vei iratou, lesi iratou me ratou qarava na noqu manumanu.”

7A sa qai kauti Jekope na tamana o Josefa ka vakaraitaki koya vua na tui. A sa qai vosa vakalougatataka na tui o Jekope. 8A sa tarogi koya na tui, “Sa vica na yabaki na dede ni nomu bula?”

9A qai kaya o Jekope, “Sa 130 na yabaki ni noqu veilakoyaki. Sa lekaleka ga ka rui dredre na veiyabaki oqori, ka sa sega ni tautauvata kei na yabaki ni nodra veilakoyaki na noqu qase.” 10A sa qai solia o Jekope vua na tui na nona veivakalougatataki ni veitalatala, ka sa gole yani. 11A sa la'ki vakatikori tamana kei iratou na tuakana o Josefa ena vanua o Ijipita, ka solia vei iratou na tiki ni qele vinaka duadua ena vanua o Ramisese, me vaka sa vakarota na tui. 12A sa solia o Josefa na kakana me baleti tamana, kei iratou na tuakana, kei na vuvale nei tamana me yaco sara vei koya ka gone.

Na Dausiga e Ijipita

13A sa levu sara na dausiga ka sega na kakana ena vanua taucoko, ka ra sa malumalumu mai ena viakana na tamata e Ijipita kei Kenani. 14A sa kumuna vata kece o Josefa na i lavo era sa vakayagataka na tamata e Ijipita kei Kenani ena sila ka kauta ki na valenitui. 15Ia ni oti kece na i lavo e Ijipita kei Kenani, era a lako kece mai na kai Ijipita vei Josefa ka kaya, “Solia mai na kakana vei keimami, de keimami mate e matamuni! Sa oti na neimami i lavo.”

16Sa qai kaya o Josefa, “Ni kauta mai na nomuni manumanu; au na solia me kena i sau na kakana, kevaka sa oti na nomuni lavo.” 17Era sa qai kauta mai na nodra manumanu vei Josefa, ka solia vei ira na kakana me veisau kei na nodra ose, sipi, me, bulumakau, kei na asa. Ena yabaki o ya sa solia vei ira na kakana me veisau kei na nodra manumanu kece sara.

18Sa oti na yabaki o ya; ena yabaki ka tarava era sa lako tale mai vua ka kaya, “Keimami na sega ni vunitaka na ka dina vei kemuni, o ya ni sa oti kece na neimami lavo, ka sa nomuni na neimami manumanu. Sa sega ni dua na ka e vo me nomuni, ia sa vo ga na yago i keimami kei na neimami vanua. 19A cava me keimami mate kina e matamuni, oi keimami kei na neimami vanua? Ni voli keimami kei na neimami vanua ena kakana. Keimami sa na qai bobula ni tui, ka me nona na neimami vanua. Ni solia vei keimami na sila me keimami bula tikoga kina, ka vakakina na i tei me keimami teivaka ki na qele.”

20A sa volia o Josefa na vanua taucoko o Ijipita me nona na tui. Era a volitaka na kai Ijipita kece na nodra dui vanua, baleta ni sa rui levu sara ga na dausiga. A sa yaco me nona na tui na vanua taucoko. 21A sa cakava o Josefa me ra bobula na tamata mai na dua na yasa i Ijipita me yaco ki na yasana kadua. 22Na vanua duaduaga ka sega ni volia o koya o ya na nodra vanua na bete. E sega ni dodonu me ra volitaka na nodra qele baleta ni oqo e nodra i votavota ga mai vua na tui, ka me ra bula tiko kina. 23Sa qai kaya o Josefa vei ira na tamata, “Raica, au sa voli kemuni kei na nomuni vanua edaidai me nona na tui. Oqo na nomuni itei mo ni teivaka ki na qele o ni tiko kina. 24Ena gauna sa matua kina, mo ni solia lesu vua na tui e dua na i kalima ni veika o ni tamusuka. Na kena vo mo ni qai lewa, me nomuni itei se me na kemuni kakana vakavuvale.”

25Era sa qai kaya, “O ni sa vakabulai keimami; o ni sa dau yalololoma ga vei keimami, ka keimami na qai nona bobula na tui.” 26A sa vakatulewataka o Josefa me sa yaco me lawa ni vanua o Ijipita na kena dau soli e dua na i kalima ni veika era tamusuka na tamata me i votavota ni tui. Sa rokovi tiko na lawa oqo me yacova na siga edaidai. Ia na nodra vanua duadua ga na bete sa sega ni okati me nona na tui.

Na i Otioti ni Kerekere i Jekope

27Era sa tiko na Isireli mai Qoseni ena vanua o Ijipita, ka sa yaco me ra vutuniyau ka levu na luvedra. 28A bula voli mai Ijipita o Jekope me yabaki tinikavitu, me yacova ni sa 147 na nona yabaki ni bula. 29Ia ni sa voleka mai na gauna ni nona mate, sa qai kacivi Josefa mai na luvena ka kaya vua, “Kevaka o sa lomani au, mo biuta na ligamu ena ruku ni sagaqu,#47.29 Raica na 24.2. ka cavuta na nomu vosa ni bubului ni o na sega ni buluti au e Ijipita.#Vteki 49.29-32; 50.6 30Au vinakata me'u la'ki bulu vata ga kei ira na noqu qase; ia mo kauti au tani mai Ijipita ka la'ki buluti au ena nodra i bulubulu.”

Sa qai sauma o Josefa ka kaya, “Au na vakayacora me vaka na ka o vinakata.”

31Sa qai kaya o Jekope, “Mo bubului mada vei au ni o na vakayacora vakakina.” A sa vosa bubului o Josefa, ka sa ia na vakavinavinaka o Jekope ena nona i davodavo.

Currently Selected:

VAKATEKIVU 47: FNV

Highlight

Copy