VAKATEKIVU 46

Toki ki Ijipita na Vuvale nei Josefa

1A mai vakarautaka yani o Jekope na veika kece sa taukena ka lako yani ki Perisepa, ka vakacabora kina eso na i soro vua na Kalou i Aisake na tamana. 2A sa vosa vua na Kalou ena dua na raivotu ena bogi ka kaya, “I Jekope, i Jekope!”

A sauma o Jekope, “Oi au saka oqo.”

3Sa qai kaya na Kalou, “Oi au na Kalou, na Kalou i tamamu. Kakua ni rere ni lako sobu ki Ijipita, au na la'ki vakatubura na nomu kawa mai kea mo yaco mo dua na matanitu levu. 4Au na lako vata kei iko i Ijipita, ka'u na kauti iko lesu tale mai ki ke. Ena tiko vata kei iko o Josefa me yacova na nomu mate.”

5A sa qai biuti Perisepa o Jekope. A sa vakavodoki koya o iratou na luvena ki na qiqi sa tala mai na tui Ijipita, kei ira na dui luvedra, vata kei ira na watidra. 6E ratou sa kauta na nodratou manumanu kei na ka kece sara sa rawati mai Kenani, ka lako ki Ijipita. A sa kauti ira kece na nona kawa o Jekope;#Caka 7.15 7o iratou na luvena tagane, na makubuna tagane, na luvena yalewa, kei na makubuna yalewa.

8Oqo na yacadra na kawa i Jekope era sa lako i Ijipita: o Jekope kei iratou na luvena tagane, o Rupeni na nona ulumatua, 9kei iratou na luve i Rupeni tagane: o Inoke, o Palu, o Esironi, kei Kamai. 10Sai iratou oqo na luve i Simione: o Jimueli, o Jamini, o Qati, o Jakini, kei Saula, o koya ka luvena e dua na yalewa ni Kenani. 11Sai iratou oqo na luve i Livai: o Kerisoni, o Koaca, kei Merari. 12Sai iratou oqo na luve i Juta: o Eri, o Onani, o Sela, o Peresi kei Sera. (O rau o Eri kei Onani, na luve i Juta, erau sa mate mai Kenani.) Oqo o rau na luve i Peresi: o Esironi kei Emuli. 13Sai iratou oqo na luve i Isakari: o Tola, o Puva, o Jope kei Simironi. 14Sai iratou oqo na luve i Sevuloni: o Sereti, o Eloni, kei Jalieli. 15Sai ira o ya na luve i Lia kei Jekope mai Mesopotemia, kei na luvena yalewa o Taina. Na kedra levu taucoko na nona kawa vei Lia era lewe 33.

16Sai iratou oqo na luve i Kata tagane: o Sifoni, o Aki, o Suni, o Esiponi, o Eri, o Aroti kei Areli. 17Sai iratou oqo na luve i Aseri tagane: o Imina, o Isiva, o Isivi, o Piria, kei Sera na ganedratou. Oqo oi rau na luve i Peria tagane: o Eperi kei Malekieli. 18Sai ira o ya na kawa i Silipa na vada sa solia o Lepani vei Lia na luvena yalewa.

19Sai rau oqo na luve i Raijeli tagane na wati Jekope: o Josefa kei Penijamini. 20Sai rau oqo na luve i Josefa: o Manasa kei Ifereimi erau sa sucu e Ijipita vei Asenaca na luve i Potifera na bete mai Oni.#46.20 O ya o, Eliopolisi #Vteki 41.50-52 21Sai ratou oqo na luve i Penijamini tagane: o Bela, o Pekeri, o Asipeli, o Kira, o Neamani, o Ei, o Rosi, o Mupimi, o Upimi kei Ariti. 22Sai ira o ya na lewe tinikava na kawa i Jekope vei Raijeli.

23Na luvei i Tani tagane: o Usimi. 24Sai ira oqo na luve Navitalai: o Jasieli, o Kuni, o Jeseri kei Silemi. 25Sai ratou o ya na lewe vitu na kawa i Jekope vei Pila na vada sa solia o Lepani vei Raijeli na luvena yalewa.

26Na kedra i wiliwili kece na kawa dina i Jekope era sa lako ki Ijipita era sa lewe 66, ka ra sega ni wiliki vata kei na watidra na dui luvena tagane. 27E rua na luve i Josefa tagane erau a sucu mai Ijipita, me ra sa qai lewe 70 taucoko kina na vuvale i Jekope era a lako ki Ijipita.#Caka 7.14

O Jekope kei na Nona Vuvale mai Ijipita

28A sa talai Juta yani o Jekope me liu, ka kerei Josefa me ratou la'ki sota ki Qoseni. Ni ra sa yaco yani ki na vanua o Qoseni, 29sa vakarautaka na nona kareti o Josefa, ka lako yani me tavaki Jekope na tamana. Ia ni sa raici Jekope sa mokoti koya, ka mai tagi yani ena dua na gauna balavu. 30Sa qai kaya o Jekope vei Josefa, “Kevaka au sa na mate oqo, au sa yalo vakacegu ga baleta ni'u sa raici iko ka kila ni o se bula tikoga.”

31Sa qai kaya o Josefa vei iratou na tuakana kei na vuvale i tamana, “Au sa lako mada me'u la'ki kaya vua na tui, ‘E ratou sa lako mai vei au na tuakaqu kei na vuvale i tamaqu ka ra sa tiko mai na vanua o Kenani. 32E ratou sai vakatawanisipi, ka dau vakana manumanu; e ratou sa kauta tale tikoga mai na nodratou sipi, na me, kei na ka kece sara e ratou taukena.’ 33Ni sa na kacivi kemudou na tui ka tarogi kemudou, ‘A cava na nomudou cakacaka?’ 34mo dou kaya, ‘Oi keitou saka na nomuni tamata keitou sai vakatawanisipi mai na gauna keitou a gone kina me vakataki ira ga na tama i keitou.’ Oqori ena vakavuna me solia kina na tui na vanua o Qoseni mo dou tiko kina.” A vosa vakaoqo o Josefa baleta ni ra dau vakasisilataki ira na i vakatawanisipi o ira na kai Ijipita.

Currently Selected:

VAKATEKIVU 46: FNV

Highlight

Copy