VAKATEKIVU 45

Sa Vakatakilai koya o Josefa

1A sega ni tarovi koya rawa o Josefa e matadra na nona tamata, ka vakaroti ira me ra lako kece i tautuba. A sa sega ni dua tale e tiko kei Josefa ena gauna ka vakatakilai koya kina vei iratou na tuakana.#Caka 7.13 2A sa tagi ena domoilevu ka ra sa rogoca na kai Ijipita, ka kau yani na kena i tukutuku ki na valenitui. 3E a kaya o Josefa vei iratou na tuakana, “Oi au o Josefa. E se bula tiko li o tamaqu?” Ia ni ratou sa rogoca oqo na tuakana, sa tuburi iratou na rere levu ka sega ni rawa kina ni sauma na nona taro. 4Sa qai kaya vei iratou o Josefa, “Dou toso voleka mai!” Ni ratou sa toso volekati koya yani, a sa mani kaya, “Oi au ga o Josefa na tacimudou, o koya dou a volitaka i Ijipita. 5Ia oqo mo dou kakua ni rarawa se veicudruvi kina ena kemudou maliwa, baleta ni o dou sa volitaki au mai kike. Na Kalou ga sa vakauti au mai liu ki na vanua oqo ka qai muri oi kemudou me ia na veivakabulai. 6Oqo e se qai karua ni yabaki ni dausiga ena vanua oqo, ka se vo tale tiko e lima na yabaki ni dausiga, ka na sega kina na siviyara se na tatamusuki. 7Na Kalou sa talai au taumada mai ki na vanua oqo me vueti kemudou ena sala oqo ka vakataudeitaka na vakabulai ni nomudou kawa. 8Sa sega kina ni oi kemudou sa talai au mai ki ke; na Kalou ga. Sa vakayacori au o koya me'u nona vakailesilesi cecere taudua na tui. Au sa liutaka na i tikotiko vakaturaga, ka'u sa lewa na vanua taucoko o Ijipita.

9“Ia oqo mo dou vakatotolo sara ka lesu vei tamaqu, ka la'ki kaya vua ni sa kaya vakaoqo na luvena o Josefa, ‘Na Kalou sa vakayacori au me'u liutaka na vanua o Ijipita; mo lako totolo sara mai oqo vei au, ka kua tale ni wawa. 10Ena rawa vei kemudou mo dou mai tiko ena vanua o Qoseni, mo dou voleka kina vei au: o iko, o ira na luvemu, o ira na makubumu, na nomu sipi, kei na me, kei na bulumakau, kei na ka kecega o taukena. 11Kevaka o sa mani tiko mai Qoseni, au na rawa ni qaravi iko e kea. E se vo tiko e lima tale na yabaki ni dausiga, ka'u sega ni vinakata mo qai mate ena viakana o iko, se o ira na lewe ni nomu vuvale, se na veika kece sara o taukena.’ ”

12A sa vakuria o Josefa na nona vosa, ka kaya, “Ia oqo dou sa raica kece e matamudou, ka vakakina na taciqu o Penijamini, ni sai au dina ga o Josefa ka sa vosa tiko oqo vei kemudou. 13Dou kaya vei tamaqu na lagilagi kece au sa mai donuya tu oqo e Ijipita, kei na ka kece sara dou sa raica. Dou vakatotolo yani ka la'ki kauti koya mai ki ke.”

14A sa mokoti Penijamini na tacina o Josefa, ka rau veitagicaki. 15A sa qai mokoti iratou yadudua na tuakana, ni se tagi tikoga, ka reguci iratou kece. Ni oti o ya, e ratou sa qai tekivu vosa vua na veitacini.

16Ni sa rogo yani ki na valenitui na nodratou sa lako mai na tuakai Josefa, a sa marautaka na tui kei ira na nona i vakalesilesi. 17A sa kaya na tui vei Josefa, “Tukuna vei iratou na tuakamu me ratou vakavodoka na nodratou manumanu ka lesu tale ki na vanua o Kenani, 18ka me ratou la'ki kauta mai na tamamudou kei na nodratou dui vuvale ka lesu mai ki ke. Au na solia vei iratou na vanua vinaka duadua e Ijipita, ka ratou na sega ni leqataka e dua na ka me baleta na nodratou bula. 19Tukuna talega vei iratou me ratou kauta eso na qiqi ni Ijipita me baleti ira na watidratou kei na gone, ka kauti tamamudou mai vata kei ira. 20Me ra kakua talega ni leqataka na veika era taukena kevaka era biu laivi tu yani, ka ni'u na solia vei ira me ra taukena na veika vinaka duadua ena vanua o Ijipita.”

21E ratou sa mai vakayacora vakakina na luve i Jekope. A sa solia vei iratou o Josefa eso na qiqi me vaka na lewa ni tui, kei na so na i vaqa ni nodratou i lakolako. 22A sa solia talega vei iratou e yadua na i sulu me ratou veisau kina, ia sa solia vei Penijamini e 300 na tiki ni siliva kei na lima na i sulu ni veisau. 23A sa vakauta vei tamana e tini na asa sa usana na veiyaya digitaki ni Ijipita, kei na tini na asa yalewa sa usana na madrai kei na so tale na kakana me baleta na i lakolako. 24Sa qai talaci iratou yani na tuakana, ka ratou sa lako yani; a sa kaya vei iratou, “Dou kakua ni veiba e gaunisala.”

25E ratou sa mai biuti Ijipita yani ka lako ki Kenani vei Jekope na tamadratou. 26E ratou sa kaya sara vua, “E se bula tiko o Josefa! Sa liutaka tu oqo o koya na vanua taucoko o Ijipita!” A sa kidacala ga o Jekope, ka sega ni vakadinata.

27Ia ni ratou sa qai talanoataka vua na veika kece sara sa kaya mai o Josefa, ka raica na qiqi sa tala yani o Josefa me mai kauti koya yani ki Ijipita, a sa qai kilai yalona tale mai. 28A sa qai kaya, “Sa bula tiko na luvequ o Josefa! Oqo ga na ka sa rawa vei au me'u kerea! Me'u sa lako mada ka raici koya ni bera ni'u mate.”

Currently Selected:

VAKATEKIVU 45: FNV

Highlight

Copy