VAKATEKIVU 48

Sa Vakalougatataki Ifereimi kei Manasa o Jekope

1Ni sa oti o ya, sa qai tukuni vei Josefa ni sa tauvi mate tiko o tamana. A sa qai kauti rau yani kina na luvena o Josefa, o Manasa kei Ifereimi, me ratou la'ki raici Jekope. 2Ni sa tukuni vei Jekope na nona sa yaco yani o Josefa na luvena me mai raici koya, a sa vakaukauwataki koya ka duri cake ena i davodavo. 3A sa kaya o Jekope vei Josefa, “Sa rairai vei au na Kalou Kaukauwa mai Lusa ka vosa vakalougatataki au.”#Vteki 28.13-14 4Sa kaya vei au, “Au na vakalevutaka ka vakalewevuqataka na nomu kawa, ka ra na yaco me vuqa na matanitu. Au na solia vei ira na nomu kawa na vanua oqo me nodra ka tawa mudu.”

5Oi rau na luvemu tagane erau a sucu e Ijipita ni bera ni'u lako mai ki ke vei iko, erau sa wili vei au. E rau sa noqu o Ifereimi kei Manasa me vakataki Rupeni kei Simione. 6Ia o ira na gone era qai sucu e muri vei iko, era sa na nomu; era sa na wiliki vata kei rau na tuakadra ena nodrau i votavota. 7Au sa cakava na ka oqo baleta ena gauna au sa qai lesu mai kina mai Mesopotemia, sa dua tani na noqu rarawa ni a sa mate o Raijeli na tinamu mai na vanua o Kenani ni keimami sa yawa sara mai Efiraca. Au sa buluti koya mai kea ena sala ki Efiraca, (o ya o Peceliema).#Vteki 35.16-19

8Ia ni sa raici rau na luve i Josefa tagane o Isireli, sa kaya,

“O cei oi rau na gonetagane oqo?”

9A sa kaya o Josefa, “Oqori oi rau na gonetagane sa soli rau na Kalou vei au eke.”

Sa qai kaya o Jekope, “Au kerea mo kauti rau mai vei au, ka me'u vosa vakalougatataki rau.” 10A sa buwawa sara na mata i Jekope baleta ni sa qase sara, A sa qai kauti rau mai vakavoleka na gonetagane vua o Josefa; sa qai mokoti rau o Jekope ka reguci rau, 11ka kaya o Jekope vei Josefa, “Au a sega ni nuitaka ni'u na raica tale na matamu, ia oqo sa solia vei au na Kalou me'u raici rau talega na luvemu.” 12A sa qai kauti rau tani na gone o Josefa mai na duru i Jekope, ka mai cuva sobu yani ki na qele.

13A sa tauri rau ruarua o Josefa; o Ifereimi ena ligana i matau me donuya na liga i Jekope i mawi, ka tauri Manasa ena ligana i mawi me donuya na liga i Jekope i matau, sa qai kauti rau vakavoleka vua. 14Ia sa qai veilataitaka na ligana o Jekope ka biuta na ligana i mawi ena ulu i Manasa o koya ka qase. 15A sa qai vosa vakalougatataki Josefa:#48.15 Josefa: A sa vakalougatataki o Josefa, ka dina ga ni rau a vosavakalougatataki o Ifereimi kei Manasa.

“Me vakalougatataki rau na cauravou oqo na Kalou sa qarava o rau na tamaqu o Epara-ama kei Aisake!

Me vakalougatataki rau na Kalou ka sa tuberi au mai me yacova na siga oqo.

16Me vakalougatataki rau na agilosi sa dau vakabulai au mai na leqa kecega;

Me bula vei rau oqo na yacaqu kei na yacadrau na tamaqu o Epara-ama kei Aisake!

Me levu na nodrau kawa ka tubu me lewe vuqa e vuravura!”

17A sega ni vinakata o Josefa, ni raici tamana ni biuta na ligana i matau ena ulu i Ifereimi. A sa taura na liga i tamana i matau ka kauta tani mai na ulu i Ifereimi ka vagolea ki na ulu i Manasa. 18A sa kaya vei tamana, “Me kakua ni vaka oqori tamaqu. O koya oqo e qase; mo biuta na ligamu i matau ena uluna.”

19Ia sa kaya o tamana, “Au sa kila na luvequ, au sa kila. Ena yaco talega o Manasa me matanitu levu ka lewe vuqa. Ia ena levu cake o tacina mai vua ka na yaco na nona kawa me vuqa na matanitu.”

20A sa vakalougatataki rau ena siga o ya ka kaya, “Era na masuta na Kalou na Isireli me vakalougatataki ira me vakataki kemudrau.” Era na kaya, “Me vakalougatataki iko na Kalou me vakataki Ifereimi kei Manasa.”

A vakaoqo, na nona biuti Ifereimi e liu mai vei Manasa.#Ipe 11.21

21A qai kaya o Jekope vei Josefa, “Raica, au sa vakarau mate, ia ena tiko kei iko na Kalou, ka kauti iko lesu ki na nodra vanua na nomu qase. 22Au na solia na vanua digitaki o Sikemi ena yasa ni ulunivanua vei iko, ka sega vei ira na tuakamu, na vanua ka'u a rawata mai vei ira na Amoraiti ena noqu i seleiwau kei na dakaititi.”

Currently Selected:

VAKATEKIVU 48: FNV

Highlight

Copy