VAKATEKIVU 39

O Josefa kei na Marama Wati Potifa

1Era a kauti Josefa sobu ki Ijipita na luve i Isimeli, ka volitaki koya vei Potifa, e dua na vakailesilesi ni tui, ka nodra turaganivalu na matayadra ena valenitui. 2Ia sa tiko vata kei Josefa ko Jiova ka vakavuna me rawata vakavinaka na ka kecega sa cakava. A sa tiko o koya ena vale ni kai Ijipita na nona turaga,#Caka 7.9 3ka sa raica na nona turaga ni sa tiko vata kei koya ko Jiova, ka sa vakavuna me rawata vinaka na ka kecega sa cakava. 4A sa taleitaki Josefa vakalevu o Potifa ka sa lesi koya kina me liutaki ira na dauveiqaravi e nona vale, ka me lewa na veika kecega sa taukena. 5Me vakatekivu mai na gauna o ya, a sa vakalougatataka na nona vale na kai Ijipita ko Jiova ena vuku i Josefa, ka vakalougatataka talega na veika kece sa taukena kei na nona i teitei. 6A sa solia o Potifa na vakatulewa kecega vei Josefa ka sega tale ni qai leqataka e dua na ka, e qai vakavo ga na kakana sa kania.

A sa cauravou bulicaki matau ka rairai vinaka o Josefa.

7E sega ni dede, sa tekivu me vinakati Josefa na wati nona turaga, ka mani kaya vua, “Daru mai moce vata mada!” 8Ia sa bese ga o koya, ka kaya vua na wati nona turaga, “Raica, o noqu turaga sa sega tale ni qai leqataka e dua na ka ena nona vale, baleta ni'u sa tiko oqo oi au. Sa solia vei au o koya na kaukauwa me'u lewa na ka kecega sa tu vua. 9Keirau sa lewa vakatautauvata ena vale oqo, ka sa sega ni bureitaka vei au o koya e dua na ka, ia e vakavo duadua ga o iko na watina. E rawa vakacava me'u vakayacora na i tovo levu oqo, ka i valavala ca vua na Kalou?” 10E dina ga ni sa vosaki Josefa tikoga ena veisiga o koya, a sa sega vakadua ni vakadonuya me rau moce vata.

11Ia ena dua na siga ni curu yani i vale o Josefa me qarava na nona cakacaka, a sa sega tale ni dua na tamata cakacaka e tu e kea. 12A sa qai vesuka o wati Potifa na nona kote ka kaya, “Lako mai eke me daru moce vata.” Ia sa laiva tu ga yani na nona kote ki ligana, a sa dro ka cici yani i tuba. 13Ia ni sa raica na wati Potifa ni sa laiva tu mai na nona kote ka dro yani, 14sa qai kacivi ira na nona tamata cakacaka ka kaya, “Ni raica mada oqo! Na Iperiu oqo ka kauta mai na watiqu sa vakacacani keda. A curuma mai na noqu rumu ka via kucuvi au, ia ka'u a qai kaila ena domoilevu. 15Ni sa rogoca na noqu kaila, sa qai dro i tuba ka biuta tu mai vei au na nona kote.”

16A sa taura tikoga na nona kote me yacova ni sa lesu mai i vale na nona turaga. 17Sa qai kaya vua na i talanoa vata o ya: “Na Iperiu bobula o kauta mai kivei keda, e curuma mai na noqu rumu me vakacacani au. 18Ia ena gauna au kaila kina, a sa qai dro i tuba ka biuta tu mai vei au na nona kote.”

19Ni sa rogoca na turaga i Josefa na vosa i watina, ni sa kaya, “Oqo na i tovo sa cakava vei au na nomu bobula,” a sa tubu vakalevu na nona cudru. 20A sa vesuki Josefa na nona turaga ka biuti koya ki valeniveivesu, ena vanua era dau biu kina na kaivesu ni tui; ka sa la'ki tiko e kea o koya. 21Ia sa tiko ga kei Josefa ko Jiova ka vakalougatataki koya; a veika oqo sa taleitaki koya kina na i vakatawa ni valeniveivesu.#Caka 7.9 22A sa lesi Josefa o koya me lewai ira na kaivesu kece, ka me lewa talega na veika kece era cakava. 23Sa sega tale ni qai leqataka na i vakatawa ni valeniveivesu na veika sa vakacolati vei Josefa, baleta ni sa tiko vata kei koya ko Jiova, ka sa vakavuna me rawata vinaka o koya na ka kecega sa cakava.

Currently Selected:

VAKATEKIVU 39: FNV

Highlight

Copy