VAKATEKIVU 38

O Juta kei Tema

1A sa yaco ena gauna o ya me biuti iratou kina na tuakana o Juta, ka sa la'ki tiko kei na dua na kai Etulama, o Ira na yacana. 2A sa sotava mai kea o Juta e dua na goneyalewa ni Kenani, na yaca i tamana o Sua. A sa vakawatitaki koya, 3ka sa vakasucuma e dua na gonetagane; a sa vakatoka me yacana o Eri. 4Sa qai bukete tale ka vakasucuma e dua tale na gonetagane; a sa vakayacani koya o Onani. 5A qai vakasucuma e dua tale na gonetagane; a sa vakayacani koya o Sela. E a tiko mai Kisipi o Juta ni sa sucu o Sela.

6A sa kauta mai o Juta e dua na wati Eri na nona ulumatua, na yacana o Tema. 7Sa rui ca vakalevu na i valavala i Eri ena mata i Jiova; a sa vakamatei koya kina ko Jiova. 8Sa qai kaya o Juta vei Onani, “Lako ka la'ki moceri koya na wati tuakamu. Mo vakayacora mada na nomu i tavi, me vaka ni o sa tacina na watina, me na rawa ni basika kina eso na kawa i tuakamu.” 9Ia sa kila o Onani ni ra na sega ni wili vua na gone, ena veigauna kece sara e mocevata kina kei na wati tuakana, a sa sovara tani ki na qele na nona wai-ni-vakaluveni, me kakua kina ni dua na kawa i tuakana. 10Ia sa sega ni taleitaka ko Jiova na ka oqo, ka sa vakamatei Onani kina. 11A sa kaya yani o Juta vei Tema na vugona, “Mo lesu mada ka la'ki tiko dawai voli ga ena vale i tamamu, me yacova ni sa levu o Sela na luvequ.” A sa kaya na ka oqo baleta ni sa rere de na qai vakamatei talega o Sela, me vakataki rau na tuakana. A sa lesu yani o Tema ki na vale i tamana.

12Ena dua na gauna e muri, a sa mani mate na wati Juta, na luve i Sua yalewa. Ni sa oti na gauna ni vakaloloku i Juta, a sa qai lako yani i Timina kei na nona i tokani o Ira na kai Etulama, ki na vanua e dau kotivi kina na nona sipi. 13A sa tukutuku e dua na tamata vei Tema ni sa lako cake ki Timina o na vugona me la'ki kotivi na nona sipi. 14Sa qai mai luvata tani yani na nona i sulu vakayada e daramaka voli, ka ubia na matana ena i ubi ni mata, ka la'ki dabe toka ena matamata ki Eneimi ena sala vaka ki Timina. A sa kila o koya ni sa cauravou levu sara o Sela, na luve i Juta ka gone duadua, ia a se sega ga ni soli yani o koya vei Sela me watina.

15Ia ni sa raici koya o Juta, sa nanuma ga ni dua na yalewa dauvolitaki koya, baleta ni sa ubia tiko na matana. 16Sa mani lako vua ki na bati ni sala, ka kaya vua. “Au vinakata me'u la'ki moce vata kei iko,” ia sa sega tiko ni kila ni o vugona ga o ya.

Sa qai kaya na yalewa vua, “A cava o na solia vei au me'u moce vata kina kei iko?”

17A sa sauma o koya ka kaya, “Au na solia vei iko e dua na luve ni me mai na noqu qele ni manumanu.”

Sa qai kaya na yalewa, “Sa vinaka, ia mo solia rawa mada mai e dua na i vesu ni nomu yalayala, me yacova ni sa kau mai na me.”

18A sa kaya o Juta, “A cava me'u solia vei iko me kena i vakadinadina?”

A sa sauma o koya, “Na nomu mama, na kena qato kei na i titoko e ligamu.” A sa solia yani vua. E rau a mani moce vata ka mani bukete kina. 19A sa tucake o Tema ka lako yani, sa qai la'ki luvata tani na i ubi, ka sa daramaka tale na nona i sulu vakayada.

20Sa qai tala mai o Juta na nona i tokani o Ira me kauta yani na luve ni me ka me vakasuka tale mai na kena i vakadinadina mai vua na yalewa, ia sa sega ni kunei koya rawa o Ira. 21A sa mani tarogi ira na tamata mai Eneimi, “E sa evei beka na yalewa dauvolitaki koya ka dau toka ena tolo ni sala oqo?”

Ia era sa kaya, “E sega vakadua ni bau dua na yalewa dauvolitaki koya e tu eke.”

22Sa mai lesu yani vei Juta ka la'ki kaya vua, “Au sega sara ga ni kunei koya rawa. Era kaya talega vei au na tamata e kea ni sega vakadua ni bau dua na yalewa dauvolitaki koya ena vanua o ya.”

23A sa kaya o Juta, “Laiva me maroroya na i vakadinadina me nona, de ra na qai dredrevaki kedaru. Au a sa vakauta vua na luve ni me oqo, ia o qai sega ni kunei koya.”

24Ni sa oti e tolu na vula, a sa tukutuku e dua vei Juta ka kaya, “Na vugomu o Tema sa vakadinadinataka na nona cala ni sa dauvolitaki koya voli, ka ni sa bukete.”

Sa qai kaya o Juta, “Dou kauti koya i tuba ka vakamai koya me mate.”

25Ia ni sa kau yani ki tautuba, a qai talatala yani vei na vugona ka kaya, “Au sa bukete vua na tagane e sa nona na veika oqo. Mo raica mada se ra nei cei oqo — na mama, na kena qato, kei na i titoko.”

26A sa kila o Juta, ka kaya, “A sa dodonu vei keirau o koya, baleta ni'u sa sega ni soli Sela na luvequ ki vua me rau veiwatini.” A sega vakadua tale ni qai moceri koya o Juta.

27Ia ni sa voleka sara na gauna me vakasucu kina, sa kunei ni rau drua na luvena. 28Ena gauna sa taratara tiko kina, a sa biuta mai ki tuba na ligana e dua vei rau. A sa vesuka sara o koya na dauvakasucugone, a sa taura e dua na wa damudamu ka vesuka kina na ligana, ka kaya, “O koya oqo sa sucu mai liu.” 29A mani dreta lesu tale na ligana o koya ka vakavuna oqo me sucu kina mai liu na tacina. A sa kaya na dauvakasucugone, “Oi sa vakaoqo na nomu suguraki i tuba!” A sa vakatoka me yacana o Peresi.#38.29 Peresi: Na yaca oqo e kena i balebale “suguraki i tuba” ena vosa vakaiperiu. 30Oti o ya, sa qai sucu mai o tuakana ka toka na wa damudamu e ligana, ka sa vakatokai me yacana o Sira.#38.30 Sira: Na yaca oqo e balebale vaka “na damu ramase ni kida ni mataka”.

Currently Selected:

VAKATEKIVU 38: FNV

Highlight

Copy