VAKATEKIVU 37

O Josefa kei Iratou na Tuakana

1A sa bula voli ga o Jekope ena vanua ka tiko vulagi kina o tamana, na vanua o Kenani. 2Sai koya oqo na i tukutuku me baleta na kawa i Jekope.

A sa yabaki 17 na cauravou o Josefa, ka sa dau vakatawani ira voli na manumanu kei iratou na tuakana, o ya o iratou na luvena tagane o Pila kei Silipa, o rau na watina lalai o Jekope na tamana. Sa dau kauta mai o koya vei tamana na i tukutuku ca me baleti iratou na tuakana.

3A sa levu cake na nona dau lomani Josefa o Jekope mai vei iratou na vo ni luvena tagane, baleta ni a qai sucu ni sa qase sara o koya. A sa vakarautaka vua e dua na nona kote balavu ukutaki vinaka.#37.3; 37.23 kote balavu ukutaki vinaka: se kote balavu veivolavolai se kote balavu duidui roka. 4Ia ni ratou sa raica na tuakana ni sa lomani Josefa vakalevu cake o tamadra mai vei ira kecega, eratou sa qai cati koya ka sega ni vosa vinaka vua.

5A sa tadra o Josefa ena dua na bogi, ni sa talanoataka vei iratou na tuakana; e ratou sa qai cati koya ga kina vakalevu! 6A sa kaya, “Dou rogoca mada na noqu tadra: 7E datou a vesu sila kece tiko ena i teitei, sa qai tuva wavoki na nomudou i vesu sila ka cuva ki na noqu i vesu sila.”

8E ratou sa qai kaya vua na tuakana, “O nanuma beka mo na yaco mo tui ka liutaki keitou?” E ratou sa qai cati koya vakalevu cake sara ena vuku ni nona tadra kei na veika sa kaya me baleti iratou.

9A qai tadra tale o Josefa, ka kaya vei iratou na tuakana, “Dou rogoci au mada. Au a tadra tale, ka'u a raica na matanisiga, na vula, kei na tinikadua na kalokalo ni ra cuva tiko vei au.”

10A sa kaya talega na nona tadra vei tamana, a sa qai vosataki koya kina o tamana ka kaya vua, “Na mataqali tadra vakacava oqori? O sa nanuma beka me na cuva sobu ki na qele e matamu o tinamu, o iratou na tuakamu, vata kei au?” 11E ratou sa vuvutaki koya na tuakana, ia sa vakasamataka voli ga o tamana na veika oqo.#Caka 7.9

Sa Volitaki o Josefa ka Kau i Ijipita

12Ena dua na siga, ni ratou sa lako yani ki Sikemi na tuakai Josefa me la'ki qaravi na manumanu i tamadratou, 13sa qai kaya o Jekope vei Josefa, “Au vinaka mo lako mada i Sikemi, ki na vanua e ratou sa vakana manumanu tiko kina na tuakamu.”

A sauma o Josefa, “Au sa tu vakarau kina.”

14Sa qai kaya o tamana, “Mo lako mada ka la'ki raica se ratou tiko vinaka na tuakamu se segai, ka ra sa bulabula vinaka tiko na manumanu se segai; ka lesu tale mai vei au ka mai tukutuku.” Sa mani talai koya yani o tamana mai na Buca o Epironi.

Ni sa yacova yani o Josefa i Sikemi, 15sa raici koya sara mai e dua na tamata ni veilakoyaki voli ena buca ka mani tarogi koya, “E dua beka na ka o vakasaqara tiko?”

16A sa kaya o Josefa, “Au vakasaqarai iratou tiko na tuakaqu, ka ratou mai vakania tiko na nodratou manumanu. Mo ni yalovinaka ka kaya mada vei au na vanua e ratou vakana manumanu tiko kina?” 17Sa qai kaya na tamata o ya, “E ratou sa lako oti yani; au sa rogoca ni ratou kaya, me ratou lako i Tocani.” Sa mai muri iratou yani na tuakana o Josefa, ka la'ki kunei iratou mai Tocani.

18Ia ni se yawa tiko yani o Josefa, e ratou sa raici koya mai na tuakana, ka ratou sa nakita me ratou vakamatei koya.

19E ratou a veivosakitaka vakai iratou, “Raica, sa lako mai oqo o koya na dautadra. 20Dou lako mai, me datou vakamatei koya ka viritaka na yagona ki na i keli, e datou na qai la'ki kaya ni a vakamatei koya na manumanu kila. Me qai laurai sara mada kina na i balebale ni nona tadra.”

21Ia ni sa rogoca o Rupeni, a mani tovolea me vakabulai Josefa, ka kaya vei iratou na tacina, “Tou kua ni vakamatei koya. 22Me kakua ni dave e dua na dra, ia me viritaki ga i loma ni keli oqo ena vanua lala, ia dou kakua ni vakamavoataki koya.” A sa kaya oqo o koya ena nona nakita me vakabulai koya mai vei iratou ka vakatalai koya lesu tale yani vei tamana. 23Ia ni sa yaco yani o Josefa vei iratou na tuakana, e ratou a basuraka tani mai vua na nona kote balavu ukutaki vinaka.#37.23; 37.3 kote balavu ukutaki vinaka: se kote balavu veivolavolai se kote balavu duidui roka. 24E ratou sa qai tauri koya ka viritaki koya ki na dua na i keli maca.

25Ni ratou sa kana tiko, e ratou sa raica eso na luve i Isimeli, ni ra sa lako mai Kiliati vaka ki Ijipita. Era usana tiko mai na nodra kameli na drega me vakamai, na i saluwaki, kei na mura ka ra kauta tiko ki Ijipita. 26Sa qai kaya o Juta vei iratou na vo ni veitacini, “A cava e datou na rawata mai kevaka tou vakamatea ga na tacidatou ka qai vunitaka voli na kena i tukutuku? 27Mai, tou volitaki koya vei ira na luve i Isimeli. Ena ka oqo tou na sega kina ni vakamavoataki koya; ni sa tacidatou ga o koya, ka tiki ni yagodatou dina.” E ratou a qai lomavata kina. 28Ni ra yaco yani e kea eso na dauveivoli ni Mitiani, eratou sa qai laveti Josefa cake mai na i keli na veitacini, ka volitaki koya ena ruasagavulu na tiki ni siliva vei ira na luve i Isimeli. Era a qai kauti koya yani ki Ijipita.#Caka 7.9

29Ia ni sa lesu mai o Rupeni, sa raica ni sa yali o Josefa mai na i keli; a sa dresulaka na nona i sulu ni sa rarawa. 30A lesuvi iratou tale na tacina ka kaya, “Sa yali mai kea na gone! Na cava me'u qai cakava qo?”

31E ratou sa qai vakamatea e dua na me, ka boroya na kote nei Josefa ena kena dra. 32E ratou sa kauta yani na kote vei tamadratou, ka kaya, “Keitou a kunea na kote oqo. E sega beka ni kote i luvemu?”

33A sa kila na kote o ya o koya, ka sa kaya, “Na kote dina i luvequ oqo! Eso na manumanu kila sa vakamatei koya. Isa, na luvequ o Josefa sa basuraki dina vakamatailalai.” 34Sa qai dresulaka na nona i sulu o Jekope, ka viviraka e dua na i sulu loaloa e tolona me vakaraitaka na nona rarawa, ka sa tagicaka voli na luvena ena dua na gauna balavu. 35Era sa lako kece mai na luvena yalewa kei na luvena tagane me ra vakacegui koya, ia sa bese ga ni vakacegui ka kaya, “Au na tagicaka tiko na luvequ me yacova na noqu mate.” A sa tomana tikoga o koya na nona vakaloloku.

36Ni yaco tiko oqo, era sa ia na veivoli mai Ijipita na kai Mitiani, ka ra sa volitaki Josefa vei Potifa, e dua na vakailesilesi ni tui, ka nodra turaganivalu na matayadra ni valenitui.

Currently Selected:

VAKATEKIVU 37: FNV

Highlight

Copy