VAKATEKIVU 40

Sa Tukuna o Josefa na i Balebale ni Tadra

1Ena dua na gauna e muri, erau a caka cala vua na nodrau turaga na tui Ijipita o koya na dautalowaini ni tui kei koya na nodra i liuliu na dauvavavi. 2A sa cudruvi rau na nona vakailesilesi oqo na tui Ijipita, 3ka sa biuti rau vakavesu ena vale i koya na turaganivalu ni matayadra, ena vanua vata ga e vesu tiko kina o Josefa. 4A sa dede sara na nodratou tiko vakavesu, ka sa lesi Josefa na turaganivalu ni matayadra me qaravi rau toka na lewe rua.

5Ena dua na bogi ena valeniveivesu, erau a tadra na dautalowaini kei na i liuliu ni dauvavavi nei tui Ijipita, ka duatani na i balebale ni nodrau tadra yadua. 6Ni yaco yani vei rau o Josefa ena mataka lailai, a sa raica ni rau sa rui lomaleqa sara vakalevu. 7A mani tarogi rau ka kaya, “A cava o drau sa rairai lomaleqa tiko kina ena siga edaidai?”

8E rau sa qai kaya, “O keirau a tadra ruarua, ka sa sega ni dua eke me vakamacalataka vei keirau na kena i balebale.”

Sa qai kaya o Josefa, “E sega beka li ni nona na Kalou na vakadewataki ni tadra? Drau yalovinaka mo drau kaya mai vei au.”

9Sa qai kaya na nona tadra na dautalowaini ni tui, “Ena noqu tadra, au a raica e dua na vunivaini ni tu e mataqu, 10ka tolu na tabana. Ena gauna ga sa vakadrauna mai kina, sa se sara, la'ki vua ka mai dreu yani. 11Au a taura tu na bilo ni tui; ia ka'u sa qai taura na i soso qerepi ka lobaka ki na bilo, ka solia sara vua na tui.”

12Sa qai kaya vua o Josefa, “Oqo na kena i balebale: na tabana e tolu sai koya na siga e tolu. 13Ena loma ni tolu na siga ena qai kauti iko cake na tui ka vakasukai iko tale ki na nomu cakacaka. O na qai solia tale vua na tui na nona bilo me vaka e liu, ni o a dautalowaini ni tui. 14Ia mo yalovinaka mo qai nanumi au mai ni sa vinaka na veika kece me baleti iko, ka yalololoma mo bau la'ki tukuni au vua na tui, ka vukei au me'u vagalalataki eke. 15Na ka dina oqo, ni'u a vesuki ka vakauti mai vakaukauwa mai na nodra vanua na Iperiu; ka sa sega talega ni dua na cala au cakava e Ijipita me vakavuna na noqu mai biu kina ki valeniveivesu.”

16Ni sa raica na i liuliu ni dauvavavi na vinaka ni balebale ni nona tadra na dautalowaini me vaka sa kaya o Josefa, sa qai kaya vua. “O au talega e dua na noqu tadra; au raica e tolu na sova madrai ni ratou toka e uluqu, 17na basikete e toka sara e cake sa sinai ena veimataqali kakana vavi me soli vua na tui, ka ra sa kania tiko na manumanu vuka mai na loma ni sova sa toka e uluqu.”

18Sa qai kaya o Josefa, “Oqo na kena i balebale: na tolu na sova sai koya e tolu na siga. 19Ena loma ni tolu na siga, ena qai kauti iko cake kina na tui ka musuka laivi na ulumu. Ena qai vakaliliga na yagona ena dua na vunikau ka ra na kania na lewemu na manumanu vuka.”

20Ni oti e tolu na siga, ena siganisucu ni tui, a sa qai vakarautaka e dua na magiti levu o koya vei ira na nona tamata; sa qai sereki koya na nona dautalowaini ka vakarota me kau yani vua na i liuliu ni dauvavavi. 21E a vakalesui koya tale na dautalowaini ki na nona cakacaka, 22ia sa kunati koya na nodra i liuliu na dauvavavi. Sa yaco na ka kecega oqo me vaka sara ga na i balebale ni nodrau tadra sa kaya o Josefa. 23Ia na turaga dautalowaini sa sega tale ni vakasamataki Josefa, ka sa guilecavi koya ga.

Currently Selected:

VAKATEKIVU 40: FNV

Highlight

Copy