LAKO YANI 32
32
Na Luve ni Bulumakau Tagane Koula
(Vrua 9.6-29)
1Ni ra sa raica na tamata ni sa rui berabera na nona lako sobu mai na ulunivanua o Mosese, era a soqoni vata yani vei Eroni ka kaya vua, “Eda sa sega ni kila na ka sa yaco vei Mosese, o koya ka kauti keda tani mai Ijipita; mo bulia mada kina vei keda e dua na kalou me liutaki keda.”#Caka 7.40
2A sa kaya vei ira o Eroni, “Ni luvata mai na sau koula era daramaka tiko na watimuni, kei ira na luvemuni tagane kei na luvemuni yalewa, ka kauta mai vei au.” 3Era a mani luvata yani na nodra sau koula na tamata kecega ka kauta yani vei Eroni.
4A sa taura o Eroni na nodra sau koula ka vakawaicalataka, ka bulia kina e dua na luve ni bulumakau koula.#1Tui 12.28; Caka 7.41
Era a qai kaya na tamata, “Kemudou na Isireli, oqo na noda kalou, o koya ka a kauti keda tani mai Ijipita!”
5Ni sa raica na ka oqo o Eroni, sa qai cakava e dua na i cabocabonisoro ena mata ni luve ni bulumakau koula. A sa qai kacivaka yani, “Ena vakayacori ni mataka e dua na solevu me vakarokorokotaki kina ko Jiova.” 6Ena kida ni mataka ka tarava, era sa kauta mai eso na manumanu me vakacabori me i soro kama kei na i soro ni veivinakati. Era sa qai dabe sobu na tamata me ra kana ka gunu, ka la'ki tini sara ena mateni kei na ka vakasisila ni veidauci.#1Kori 10.7
7Sa qai kaya vei Mosese ko Jiova, “Mo vakatotolo ka lesu sobu tale, baleta ni ra sa cakava na i tovo vakasisila ka vakanadakui au o ira na nomu tamata, o ira o sa liutaki ira tani mai Ijipita.
8Era sa gole tani vakasauri mai na sala au a vakarota vei ira me ra muria: era sa bulia e dua na luve ni bulumakau ka caka ena koula sa vakawaicalataki ka cuva kina, ka vakacaboisoro talega kina. Era sa tukuna tiko ni sai koya oqo na nodra kalou ka kauti ira tani mai Ijipita.
9Au sa kilai ira na tamata oqo, era sa tamata domoqa. 10Ia oqo, mo kakua ni via tarovi au. Sa ka levu na noqu cudruvi ira ka'u na vakarusai ira. Au na qai vakayacori iko kei ira na nomu kawa me dua na matanitu levu.”
11Ia sa vakamamasu vei Jiova na nona Kalou o Mosese, ka kaya, “A cava na vuna mo ni cudruvi ira kina vakalevu na nomuni tamata, o ira ka o ni sereki ira tani mai Ijipita ena ligamuni qaqa levu kei na kaukauwa?#Tiko 14.13-19 12A cava na vuna me ra qai kaya kina o ira na kai Ijipita ni o ni kauti ira tani na Isireli mai Ijipita ena dua na i naki ca me ra mai vakamatei ena veiulunivanua ka vakarusai vakadua? Ni kakua ni cudru, ia mo ni veisautaka ga na nomuni vakasama ka kakua ni vakayacora na veika ca ka rerevaki oqo vei ira na nomuni tamata. 13Ni nanumi iratou na nomuni tamata o Eparama, Aisake kei Isireli. Mo ni qai nanuma na nomuni vosa ni yalayala vei iratou ena nomuni bubului ki na yacamuni ka tukuna vei iratou ni o ni na vakalewevuqataka na nodratou kawa me vaka na kalokalo ni lomalagi. O ni na solia vei ira na nodratou kawa na vanua taucoko sara oqo o ni yalataka; me na nodra i votavota ka tawa mudu.”#Vteki 22.16-17; 17.8
14Ia ko Jiova e sa qai veisautaka na lomana ka sega ni vakayacora vei ira na nona tamata na veika ca ka rerevaki e sa kaya oti me cakava.
15A sa qai vuki o Mosese ka sirova sobu na ulunivanua, ka taura tiko e ligana na vatu raraba ni vunau e rua ka sa volai na yasadrau ruarua. 16Na Kalou vakataki koya sa cakava na vatu raraba ka ceuta talega na veivosa ni vunau e volai koto kina.
17Ena gauna sa rogoca kina o Josua na domo ni nodra qolou na tamata, sa kaya vei Mosese, “Au sa rogoca na domo ni kaila ni valu ena keba.”
18Ia, e kaya o Mosese, “E sega ni domo ni kaila ni qaqa o ya, ka sega talega ni domo ni qolou ni druka; ia e domo ga ni lagalaga sere vakasausa.”
19Ni toro voleka mai o Mosese ki na keba, a raica na luve ni bulumakau kei na nodra meke na tamata, a sa tubu vakalevu na nona cudru. E a qai viritaka sobu na vatu raraba ni vunau e kauta voli mai ka kavoro ena ruku ni ulunivanua.
20Sa qai taura na luve ni bulumakau era sa bulia, ka vakama ena bukawaqa me waicala, ka qaqia me vaka na pauta, ka wakia vata na wai, ka vakaroti ira na Isireli me ra gunuva.
21A sa kaya vei Eroni o Mosese, “A cava era sa cakava vei iko na tamata oqo ka vakavuna me ra cakava kina na i valavala ca rerevaki oqori?”
22Sa qai kaya o Eroni, “Mo ni kakua ni cudruvi au, o ni sa kila vinaka na nodra dau malele na tamata oqo me ra cakava na ca. 23Era a kaya vei au, ‘Mo cakava e dua na kalou me liutaki keda, baleta ni da sa sega ni kila na ka sa yaco vua na tamata o ya o Mosese; o koya a kauti keda tani mai Ijipita.’ 24Au a qai tarogi ira, ‘O cei e bau tiko vua na i ukuuku koula me luvata ka kauta mai vei au.’ Au a biuti ira ki na bukawaqa, ka sa buli mai kina na luve ni bulumakau oqo.”
25Ni raica o Mosese ni ra sa sega ni tarovi rawa na tamata, baleta ni sa sereki ira o Eroni me ra qarava na matakau, ka vakalialiai ira e matadra na kedra meca, 26sa qai tucake o Mosese ena matamata ni keba ka kailavaka, “O cei soti sa totaki Jiova, mo ni lako mai eke vei au.” Era sa soqoni wavokiti koya kece na Livai.
27A sa qai kaya vei ira, “Oqo na lewa sa tau mai vei Jiova na Kalou i Isireli, ‘Mo ni dui vauca kece na nomuni i seleiwau e yasamuni ka curuma yani na loma ni keba, me tekivu ena matamata oqo ka yaco sara ki na yasana kadua, ka vakamatei ira na tacimuni, o ira na nomuni i tokani voleka, kei ira na wekamuni.”
28Era a vakayacora na Livai na i vakaro i Mosese, ka vakamatea kina e rauta ni 3,000 na tamata ena siga o ya.
29A qai kaya vei ira na Livai o Mosese, “E daidai o ni sa vakatabui kemuni kina mo ni sa bete i Jiova, ena vuku ni nomuni vakamatei ira na luvemuni kei ira na tacimuni, ka sa sovaraki kina vei kemuni na kalougata edaidai.”
30Ena siga ka tarava, a qai kaya vei ira na tamata o Mosese, “O ni sa vakayacora e dua na i valavala ca levu. Ia au sa na cabe cake tale vei Jiova; de dua au na rawa ni kerea na veivosoti ena vuku ni nomuni valavala ca.
31A mai lesu yani vei Jiova o Mosese, ka la'ki kaya vua, “Era sa cakava na tamata oqo e dua na i valavala ca levu; era sa cakava vakai ira e dua na kalou koula ka sokalou vua. 32Kemuni Jiova, au sa kerea mo ni vosota mada na nodra caka cala; ia kevaka e sega, mo ni qai bokoca laivi na yacaqu mai na i vola o ni sa vola kina na yacadra na nomuni tamata.”#Same 69.28; Vtaki 3.5
33A sauma ko Jiova, “O ira yadua ga sai valavala ca vei au, au na bokoca tani na yacadra mai na noqu i vola. 34Ia oqo, mo lako ka liutaki ira na tamata ki na vanua ka'u a kaya vei iko; raica na noqu agilosi ena liutaki iko, ia ena yaco ga mai na siga ka'u na totogitaki ira kina na tamata oqo ena vuku ni nodra i valavala ca.
35A sa vakavuna ko Jiova e dua na mate rerevaki ena kedra maliwa na tamata baleta ni ra a vakavuna me bulia o Eroni na luve ni bulumakau koula.
Currently Selected:
LAKO YANI 32: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
