LAKO YANI 31

O Ira me Ra Tara na Vale ni Veitavaki

(Lako 35.30—36.1)

1A sa kaya vei Mosese ko Jiova: 2“Au sa digitaki Bisaleli na luve i Urei tagane ka makubui Uri, mai na mataqali i Juta, 3ka'u sa vakasinaiti koya ena noqu kaukauwa.#31.3 kaukauwa; se Yalo Vakalou (tabu). Au sa solia talega vua na vuku, na yalomatua, kei na kila-ka ena cakacaka vakamatai kecega, 4ena vakasamataki ni kena buli na i vakatakarakara se droini eso vata kei na kena vakarautaki mai na koula, siliva, kei na parasa; 5na musuki ni vatu talei me vakarautaki; na ceuti ni kau; kei na veimataqali cakacaka maqosa kecega vakamatai. 6Au sa lesi Aoliapi talega na luve i Eisimaki mai na mataqali i Tani me rau cakacaka vata. Au sa solia vakakina vei ira na matai tani eso na vuku titobu me na rawa kina ni ra cakava na veika au sa vakarota vei iko: 7na Vale ni Veitavaki, na Kato ni Veiyalayalati kei na kena i sogo, kei na i yaya kece ni vale tabu; 8na teveli kei na kena i yaya, na i tutu ni cina savasava vinaka kei na kena i yaya kece sara, kei na i cabocabonisoro ni ka boi vinaka, 9na i cabocabonisoro kama kei na kena i yaya kece sara, na beseni kei na kena i tutu, 10na efoti caka vakavinaka nei Eroni na bete kei iratou na luvena tagane me baleta na nodratou cakacaka vakabete, 11na waiwai ni veilumuti, kei na i saluwaki boi vinaka me baleta na Tikina Tabu. Me ra cakava na ka kece oqo me vaka sara ga na ka au a vakarota vei iko.”

Lawa ni Siga ni Vakacecegu

12A sa kaya vei Mosese ko Jiova, 13“O iko sara ga mo vosa vei ira na Isireli, “Mo ni maroroya na noqu Siga ni Vakacecegu ni sai koya oqo e dua na i vakatakilakila me baleti kemuni kei au, kei ira na nomuni kawa, mo ni kila kina ni sai au ko Jiova sa vakatabui kemudou.#31.13 Mai na kena vakaiperiu Jehovah Maccaddeshoem - the Lord, our Sanctifier. 14Mo ni vakatabuya na Siga ni Vakacecegu baleta ni sa vakatabui me baleti kemuni; kevaka e dua na tamata ena vakacacana me na vakamatei; ia kevaka e dua e cakava kina e dua na cakacaka ena tawasei tani mai vei ira na wekana. 15E ono na siga mo dou cakava kina na nomudou cakacaka, ia na i kavitu ni siga e sa siga vakatabui me nei Jiova. O koya yadua sa cakava e dua na cakacaka ena siga o ya me na vakamatei.#Lako 20.8-11; 23.12; 34.21; 35.2; Vsoro 23.3; Vrua 5.12-14 16O koya oqo me ra vakatabuya kina na Isireli na Siga ni Vakacecegu, ka rokova ena nodra veitabatamata kecega, me veiyalayalati tawa mudu. 17Oqo e dua na i vakatakilakila tawa mudu ena kedra maliwa na Isireli vata kei au, baleta ni o au, ko Jiova, au sa bulia na lomalagi kei na vuravura ena ono na siga, ia ka'u sa vakacegu ga ena i kavitu ni siga.”#Lako 20.11

Na Vatu ni Veiyalayalati e Rua

18Ni sa vosa oti vei Mosese ko Jiova mai na Ulunivanua o Saineai, a sa qai solia vua na vatu raraba ni vunau e rua, ka sa vola na i vunau na Kalou vakataki koya.

Currently Selected:

LAKO YANI 31: FNV

Highlight

Copy