LAKO YANI 33

Na i Vakaro me Ra Biuti Saineai

1A sa kaya vei Mosese ko Jiova, “Biuta na vanua oqo, o iko vata kei ira na tamata o a kauti ira tani mai Ijipita, ka lako ki na vanua au sa yalataka me'u solia vei Epara-ama, kei Aisake, kei Jekope, vata kei ira na nodra kawa.#Vteki 12.7; 26.3; 28.13 2Au na tala e dua na agilosi me liutaki iko; au na vakasavi ira tani na kai Kenani, na Amoraiti, na Itaiti, na Perisaiti na Aivaiti kei na Jepusaiti. 3Ni lako cake ki na vanua sa dave kina na sucu kei na oni; ia ka'u na sega ni lako vata kei kemuni, de'u na qai vakarusai kemuni ena gaunisala baleta ni o ni sa rui tamata yalo kaukauwa.”

4Ni ra rogoca na tamata na i tukutuku ca oqo, era a tabalaka na tagi ka sega ni daramaka e dua na i ukuuku talei.

5Sa qai kaya vei Mosese ko Jiova, “Tukuna vei ira na Isireli ni ra sa tamata yalo kaukauwa. Kevaka au na lako vata kei kemuni me dua mada ga na gauna lekaleka, au na vakarusai kemuni vakadua. Ia oqo, mo ni luvata tani mada na nomuni ukuuku talei, au na qai vakatulewataka se na cava me'u cakava vei kemuni.”

6Ena vuku ni ka oqo, era sa sega ni daramaka tale kina na nodra i ukuuku na Isireli me vakatekivu mai na nodra sa lako tani mai na Ulunivanua o Saineai.

Na Vale ni Veitavaki

7Sa dau kauta voli o Mosese na vale tabu ka birika ena dua na vanua yawa e taudaku ni keba; ka sa vakatoka oqo me Vale ni Veitavaki. Kevaka e dua e vinakata me kila e dua na ka mai vei Jiova, ia me na lako ki na Vale ni Veitavaki oqo e taudaku ni nodra i tikotiko.

8Ena veigauna ni dau lako kina o Mosese ki na Vale ni Veitavaki, era dau tucake kece sara na tamata ena katuba ni nodra dui valelaca ka saravi Mosese me yacova sara ni sa la'ki curu ki na Vale ni Veitavaki.

9Ni sa curu ki loma o Mosese, sa qai daulako sobu mai na duru o ka mai tu e katuba ni vale tabu, ka sa dauvosa mai vei Mosese ko Jiova ena o.

10Ni ra sa raica na duru o na tamata ena katuba ni vale tabu, era na cuva sobu ka sokalou ena nodra dui mata ni valelaca.

11A sa dauvosa vei Mosese ko Jiova ni rau veirai mata, me vaka sara ga e vosa tiko e dua na tamata vua e dua na nona i tokani voleka. Ni oti o ya sa na qai lesu mai o Mosese ki na keba. Ia na cauravou o Josua na luve i Nuni, o koya na nona i vukevuke, sa dau tikotiko ga ena Vale ni Veitavaki.

Na Yalataka ko Jiova ni na Tiko kei Ira na Nona Tamata

12Sa qai kaya vei Jiova o Mosese, “O ni a kaya vei au me'u liutaki ira mai na tamata oqo, ia o ni a sega ni kaya vei au se o cei me keirau salavata. Ia o ni a kaya ga, “Au sa kilai iko vinaka, ka'u sa vinakati iko.’ 13Ia kevaka o ni sa vinakati au, au kerei kemuni mo ni tukuna vei au na lomamuni, ka me'u kilai kemuni kina ka kune me'u vakalomavinakataki kemuni tikoga. Mo ni nanuma talega ni o ni sa digitaka na matanitu oqo me nomuni.”

14A sa qai kaya ko Jiova, “Au na lako vata kei iko, ka'u na solia vei iko na vakacegu.”

15Sa qai kaya o Mosese, “Kevaka o ni na sega ni lako vata kei keimami, ia mo ni kakua ni vakatalai keimami tani mai na vanua oqo. 16Ena kilai vakacava ni ra sa kune loloma vei kemuni o ira na nomuni tamata kei au kevaka o ni sa sega ni lako vata kei keimami? Na nomuni salavata voli kei keimami ena vakatakila ni keimami kawa tamata e duatani mai vei ira na veimatatamata kecega e vuravura.”

17A sa kaya vei Mosese ko Jiova, “Au na cakava na ka o kerea baleta ni'u sa kilai iko vinaka ka taleitaki iko.”

18Sa qai kerea o Mosese, “Ni yalo vinaka, au kerea me'u raica na nomuni i serau.”

19A qai sauma ko Jiova ka kaya, “Au na laiva na noqu i serau me lako sivia na matamu ka'u na kacivaka yani e matamu na yacaqu. Ni sai au ko Jiova, io au na lomani koya au sa via lomana, ka'u na yalovinaka ka yalololoma vua ka'u sa digitaka.#Roma 9.15 20Ia, o na sega ni rawa ga ni raica na mataqu baleta ni sega ni rawa me dua na tamata e raica na mataqu ka bula tikoga, 21ia sa tiko oqo e dua na vanua e volekati au ka na rawa mo tucake tu kina ena dela ni vatu. 22Ni sa lako siviti iko na noqu i serau, au na biuti iko ena dua na tadrua ni vatu. Au na ubi iko ena ligaqu me yacova ni'u sa lako siviti iko. 23Au na qai kauta tani na ligaqu, ka o na raica na dakuqu; ia na mataqu ena sega ni laurai.”

Currently Selected:

LAKO YANI 33: FNV

Highlight

Copy