LAKO YANI 30

Na Cabocabonisoro ni Kau Boi me Vakamai

(Lako 37.25-28)

1“Mo cakava e dua na i cabocabonisoro mai na kau akasia, me vakamai kina na ka boi vinaka. 2Me na tautauvata na yasana vava, ka me 45 na senitimita na kena balavu ka 45 na senitimita na kena raba, ia na kena cere me 90 na senitimita. Na ucuna momoto ena tutuna vava me caka me vaka ga e dua na tiki ni sivisivi. 3Mo ubia ena koula dina sara na delana, kei na yasana e va, kei na ucuna momoto e va, kei na batibatina wavoki. 4Mo qai bulia e rua na i lilili mokimokiti koula ka vakabiri rau ena ruku ni batibatina, ena tutuna ruarua, ka mo cakava ena yasana ruarua me rawa ni curu kina na i vua me na dau colati kina. 5Mo cakava na i vua mai na kau akasia ka boroya ena koula. 6Mo vakatikora na i cabocabonisoro kama oqo e mata ni latilati ka lili toka ena mata ni Kato ni Veiyalayalati. Au na sotavi iko e kea. 7Ena veimataka ni mai vakarautaka o Eroni na cina, me na vakama na i soro kama boi vinaka ena i cabocabonisoro kama. 8Me na cakava talega vaka o ya ena nona mai vakawaqa cina ena yakavi. Na vakacabori ni madrali boi vinaka oqori me na vakayacori tikoga ena veigauna ka me kakua ni mudu. 9Mo kakua ni vakacabora ena i cabocabonisoro kama e dua na i madrali ka sega ni savasava, se dua na i madrali manumanu se dua na i madrali witi ka kakua ni sova kina na i madrali waini. 10Me vakadua ena veiyabaki me dau cakava o Eroni na veiqaravi vakabete me vakasavasavataki kina na i cabocabonisoro kama, ka qaravi oqo ena nona boroya na ucuna momoto e va ni cabocabonisoro ena dra ni manumanu sa vakacabori me i soro ni valavala ca. Me dau vakayacori oqo ena veiyabaki kecega sa tu ki liu. Na i cabocabonisoro kama oqo me ka savasava sa cabori vei au ko Jiova, na nomuni Kalou.

Na i Vakacavacava ni Vale ni Veitavaki

11E a kaya na Kalou ko Jiova vei Mosese, 12“Ni o sa taura na kedra i wiliwili na Isireli, e dodonu me na sauma yadua na tamata ki vei au na i sau ni nodra bula yadua, me kakua kina ni dua na ka e yacovi ira ena gauna ni wili lewenivanua. 13Na tamata kece e okati ena wili lewenivanua e dodonu me sauma na i lavo e lavaki, me vaka na kena i vakarau sa vakadonui vakalawa. E dodonu me ra sauma oqo na tamata kece me nodra ka ni vakacaboisoro kivei au.#Lako 38.25-26; Maciu 17.24 14O ira kece sa wiliki ena wili lewenivanua, o ya na tagane taucoko yabaki ruasagavulu se sivia, e dodonu me ra sauma ki vei au na i lavo oqo. 15Na tamata vutuniyau e sega ni dodonu me sauma e levu cake kei na tamata dravudravua me kakua ni sauma e lailai sobu mai na i lavo e lavaki ni ra dui kauta mai na i lavo oqo me i soro ni nodra dui bula. 16Vakasoqona na i lavo oqo mai vei ira na lewenivanua e Isireli ka vakayagataka ena kena qaravi tiko na Vale ni Veitavaki. Na i vakacavacava oqo e i sau ni nodra bula ka ra na vakananuma kina na Isireli na i soro ka a soli ena vukudra.”

Na Beseni Parasa

17Sa kaya na Kalou ko Jiova vei Mosese, 18“Bulia e dua na beseni parasa vata na kena i tutu parasa. Mo qai biuta ena maliwa ni Vale ni Veitavaki kei na i cabocabonisoro, ka vakatawana ena wai.#Lako 38.8 19Me ratou dau vakayagataka na wai o Eroni kei iratou na luvena, me ratou savata kina na ligadratou kei na yavadratou 20ni bera ni ratou curuma na Vale ni Veitavaki se ratou lako voleka yani ki na i cabocabonisoro me ratou qarava nodratou cakacaka vakabete, me ratou kakua kina ni mate. 21Me ratou savata na ligadratou kei na yavadratou, ka me ratou kakua kina ni mate. Oqo na lawa me ratou na muria, o iratou kei na nodratou kawa ka tawa mudu.”

Na Waiwai ni Veilumuti

22E a kaya na Kalou ko Jiova vei Mosese,#Lako 37.29 23“Mo kauta na i vakaboi vinaka duadua, o ya me 6 na kilokaramu na waiwai mura, 3 na kilokaramu na pouta ni sinamoni boi vinaka, 3 na kilokaramu na gasau boi vinaka, 24ka 6 na kilokaramu na kasia (ka me ra vakarautaki taucoko ena kena i vakarau sa vakadonui vakalawa) kei na 4 na lita na waiwai olive, 25ka cakava kina e dua na i lumu tabu, ni ra sa waki vata me vaka na i saluwaki boi vinaka; oqo me waiwai tabu ni veilumuti. 26Vakayagataka na waiwai oqo mo lumuta kina na Vale ni Veitavaki kei na Kato ni Veiyalayalati, 27na teveli kei na kena i yaya taucoko, na i tutu ni cina kei na kena i yaya, na i cabocabo ni vakama i soro, 28na i cabocabonisoro kama vata kei na kena i yaya taucoko, kei na beseni parasa vata kei na kena i tutu. 29Vakatabui ira na i yaya oqori ena kena i valavala oqori ka me ra tabu sara; ni kevaka e dua na tamata se na veika cava ga sa tarai ira, ena sauti ira na kaukauwa mana ni tabu.#30.29 sauti ira na kaukauwa mana ni tabu: Raica na 29.37. 30Mo qai lumuti Eroni kei iratou na luvena, ka vakatabui iratou ki na i tavi vakabete ena vukuqu. 31Mo qai kaya vei ira na lewenivanua e Isireli, ‘Na waiwai ni veilumuti ka sa vakatabui oqo me na dau vakayagataki me i lumu ni cakacaka i Jiova na Kalou ena veitabatamata ka se bera mai. 32Me kakua ni vakayagataki me i lumu ni veisiga vei ira na tamata, ka mo kakua ni cakava e dua tale na i saluwaki me rau tautauvata kaya. Sa i lumu tabu oqo, ka dodonu me rokovi vakakina. 33O koya ena cakava na i lumu vakaoqo se vakayagataka na i lumu vua e dua tale ka sega ni bete ena sega ni wiliki tale me noqu tamata.’ ”

Na ka Boi Vinaka me Vakacabori

34Sa kaya na Kalou ko Jiova vei Mosese, “Mo kauta e tautauvata na i vakarau ni kau boi vinaka oqo na sitakite, na onika, na kalipeno, kei na ferekiniseni dina. 35Vakayagataki ratou me caka kina na i saluwaki, me vaka na i lumu boi vinaka. Vakamasimataka me maroroya ka vakasavasavataka. 36Mo tukia eso me vaka na pouta, kauta ki na Vale ni Veitavaki ka biuta ena mata ni Kato ni Veiyalayalati. Me sa ka savasava tabu sara vei iko. 37Kakua ni vakamurimuria mo cakava na i saluwaki vata ga oqo me nomuni. Mo rokova ni ka savasava tabu ka sa vakacabori vei au. 38Kevaka e dua e cakava e dua tale na i lumu me tautauvata me nona i lumu ni vakaboi vinaka ena sega ni wili tale me noqu tamata.”

Currently Selected:

LAKO YANI 30: FNV

Highlight

Copy