LAKO YANI 29

Na Nodra Vakatabui na Bete

(Vsoro 8.1-36)

1“Oqo na ka mo cakava vei ira me ra vakatabui kina, me ra qaravi au kina ena cakacaka vakabete. Mo taura e dua na luve ni bulumakau tagane kei na rua na sipi tagane ka sega ni ca e dua na tiki ni yagona, 2kei na madrai e sega ni vakatubu, kei na keke e sega ni vakatubu sa waki vata kei na waiwai, kei na keke mamare e sega ni vakatubu boroi ena waiwai. Mo cakava na veika oqo ena valawa digitaki. 3Mo qai biuta na veika oqo ena basikete ka kauta mai, ka vakakina na bulumakau tagane kei na sipi tagane e rua.

4“Mo qai kauti Eroni mai kei iratou na luvena tagane ena katuba ni Vale ni Veitavaki ka savai iratou ena wai. 5Ia mo qai taura na i sulu ni bete ka vakaisulutaki Eroni, na wabale, na efoti sa ukutaki vakamatau kei na i sulu ni lomaserena, ka daramaka vua. 6Mo qai daramaka e uluna na i sala vakabete ka vesuka kina na i vakatakilakila tabu ni sa vakatabui, ka sa volai kina ‘Sa vakatabui me nei Jiova.’ 7Mo qai taura na waiwai ni veilumuti ka sova ki na uluna mo lumuti koya kina.

8“Mo qai kauti iratou talega na luvena tagane ka daramaka vei iratou na i sulu; 9mo vauca vakakina e tolodratou na i wabale, ka vesuka na i sala e uludratou. Sa nodratou kina na i tutu vakabete me i lesilesi tabu vei iratou. Oqo na sala me vakatabui kina o Eroni kei iratou na luvena.

10“Mo kauta mai na bulumakau tagane ena mata ni Vale ni Veitavaki ka me qai ratou tabaka na ulu ni bulumakau o Eroni kei iratou na luvena tagane. 11Mo vakamatea na bulumakau ena mata i Jiova, ena mata ni katuba ni Vale ni Veitavaki. 12Mo taura eso na dra ni bulumakau ka biuta ena ucuna momoto ni cabocabonisoro ena sovu ni nomu i qaqalo, ia na vo ni dra mo qai sova ena yavu ni cabocabonisoro. 13Mo taura taucoko na kena uro, na kena gacagaca, na tikina taleitaki ni yatena, na ivi ruarua kei na kena uro ka vakama ena i cabocabonisoro me i soro tabu vei au. 14Ia na lewe ni bulumakau, na kulina kei na kena benu mo qai vakama ena buka ena taudaku ni i tikotiko, oqori na i soro ni valavala ca.

15“Mo taura e dua vei rau na sipi tagane, o Eroni kei iratou na luvena tagane me ratou tabaka na ulu ni sipi ena ligadratou. 16Mo vakamatea na sipi tagane, ka kauta na kena dra ka kureitaka yani ki na tutu vava ni cabocabonisoro. 17Mo musumusuka na sipi; ka savata na kena gacagaca kei na sagana, ka biuta vata ena dela ni uluna kei na veitikina tale eso. 18Mo vakama na sipi taucoko ena i cabocabonisoro me i soro kama vei Jiova. Sa vinaka vei au na i boi ni vakacacabo oqo.#Efe 5.2; Fpai 4.18

19“Mo kauta na sipi tagane tale kadua, na kena sa vakayagataki ena cakacaka ni veivakatabui, ka tukuna vei Eroni kei iratou na luvena tagane me ratou tabaka na ulu ni sipi ena ligadratou. 20Mo qai vakamatea na sipi ka kauta eso na kena dra ka biuta ki na bele ni daligai Eroni i matau ka me caka vaka talega kina ki na daligadratou i matau na luvena, ki na i qaqalo ni ligadratou i matau, ena i dovidovi ni kakana, ka vaka talega kina ki na i qaqalo levu ni yavadratou i matau, ka sova yani na vo ni dra ena tutu vava ni cabocabonisoro. 21Mo qai kauta eso na dra ka tiko ena i cabocabonisoro, kei na waiwai ni veilumuti ka kaburaka vei Eroni kei na nona i sulu, ka vakakina vei iratou talega na luvena kei na nodratou i sulu; oqo ena tabu ka savasava kina o koya kei na nona i sulu, ka vaka talega kina na luvena kei na nodratou i sulu.

22“Mo qai kauta tani talega na uro ni sipi tagane, na buina uro, kei na uro taucoko ni gacagaca, na tikina taleitaki ni yatena, na ivi ruarua kei na kena uro, kei na sagana i matau; oqo na sipi tagane ni veibuli: 23ka me dua na i buli madrai, dua na keke sa caka vata na waiwai, kei na dua na bisikete sa kau mai ena basikete ni madrai sa sega ni vakatubutaki ka tu ena mata i Jiova. 24Mo qai biuta kece talega oqo ena qeteqete ni liga i Eroni kei iratou na luvena, ka me laveti cake me i soro yalovaki vei Jiova. 25Ia o iko mo qai taura tani mai vei iratou ka biuta me kubou ena i cabocabonisoro, ena dela ni soro kama ni ka boi vinaka ena mata i Jiova, oqo na i soro sa cabori ena bukawaqa vei Jiova.

26“Mo qai kauta na sarisari ni sipi ni veilumuti vei Eroni ka laveta cake me i soro yalovaki vei Jiova: oqo sa nomu i wasewase.

27“Ni sa buli oti e dua na bete, mo qai cabora vei au na lomasere ni sipi kei na sagana me i soro yalovaki, ka biuta vakatikitiki vei iratou na kawa vakabete. 28Na veika oqo me sai lesilesi tawa mudu me baleti Eroni kei iratou na luvena tagane mai vei ira na Isireli; ni oqo na i soro vakacabori, ni sa nodra i soro na Isireli mai na nodra i soro vakacabori ni tiko vinaka. Oqo e nodra i solisoli vei Jiova.

29“Ni sa mate o Eroni, na nona i sulu vakatabui me qai soli sobu yani vei iratou na luvena, ia me ra na lumuti ka tabaki talega kina. 30Na luvena tagane me veisosomitaki ki na i tutu vakabete me dara tiko na i sulu vakatabui me siga vitu ni sa lako mai ena Vale ni Veitavaki me cakava kina na cakacaka vakabete ena Tikina Tabu.

31“Mo qai kauta na sipi ni veitabaki ka vakasaqara na lewena ena vanua tabu. 32Me qai kania na lewena kei na madrai e tiko ena basikete o Eroni kei iratou na luvena, ni ratou sa tiko ena katuba ni Vale ni Veitavaki. 33Me ratou kania ga na kakana sa vakacabori me ia kina na veivosoti, ka me ratou lumuti ka vakatabui kina; ia, me kakua tale ni dua me kana kina baleta ni sa kakana tabu. 34Kevaka e dua na lewe ni manumanu e cabo se madrai e vo me yacova na mataka, ia me qai vakamai ena bukawaqa, me kakua ni laukana tale baleta ni sa kakana tabu.

35“Mo qai vakayacora vei Eroni kei iratou na luvena tagane na veika kece oqo, au sa vakarota vei iko, mo vakatabui iratou kina ena loma ni vitu ni siga. 36Mo dau vakacabora talega e dua na bulumakau tagane ena veisiga me i soro ni valavala ca. Oqo sa na vakasavasavataki kina na i cabocabonisoro. Mo qai lumuta ena waiwai olive me vakatabui kina. 37Me vitu na siga mo cakava kina na cakacaka ni veivinakati oqo. Ena yaco me ka tabu sara na i cabocabonisoro, kei na ka kecega sa tara na i cabocabonisoro ena sauti ira na kaukauwa mana ni tabu.#29.37 ena sauti ira na kaukauwa mana ni tabu: A vakabauti ni rawa ni basika na leqa kevaka e veitaratara na tamata se na i yaya kei na veika sa vakatabui se tabu.

Na i Soro ni Veisiga

(Tiko 28.1-8)

38“Raica oqo na veika mo cabora ena i cabocabonisoro me rua na lami yabaki yadua me vakacabori ena veisiga. 39Me dua na lami me vakacabori ena mataka, kei na dua me vakacabori ena yakavi. 40Ia na i matai ni lami, me dua na kilokaramu na valawa digitaki me veiwaki vata kei na dua na lita na waiwai olive. Mo qai livia yani e dua na lita na waini me i madrali liviraki. 41Ia na i karua ni lami me vakacabori ena yakavi; ka me cabori vata kei na madrali laukana kei na madrali liviraki, me vaka na kena ena mataka. Na i soro vakamai oqo ena bukawaqa me na ka boi vinaka vei Jiova. 42Me vakayacori ena veisiga na i soro kama oqo ena veitabatamata ena mata ni katuba ni Vale ni Veitavaki ni Kalou, au na sota vata kei iko ka vosa kina vei iko 43Au na sota vata kei ira na Isireli mai kea ka vakatabui ira ena noqu i ukuuku. 44Au na vakatabuya na Vale ni Veitavaki kei na i cabocabonisoro. Au na vakatabui Eroni kei iratou na luvena me ratou qaravi au ena i tutu vakabete. 45Au na tiko voli kei ira na Isireli, ka'u na nodra Kalou. 46Era na kila ni sai au na nodra Kalou ko Jiova ka vueti ira mai Ijipita, me'u sa mai tiko ena kedra maliwa; sai au ko Jiova na nodra Kalou.”

Currently Selected:

LAKO YANI 29: FNV

Highlight

Copy