LAKO YANI 28

Nodra i Sulu na Bete

(Lako 39.1-7)

1“Mo kauti Eroni na tuakamu kei iratou na luvena o Netani, kei Epaiu, kei Iliesa, vata kei Icama ka vakatikitikitaki iratou tani mai vei ira na Isireli; me ratou qaravi au ena cakacaka vakabete. 2Mo cula eso na i sulu vakabete me nei Eroni na tuakamu, me rairai totoka ka rokovi kina o koya. 3Mo kacivi ira kece na kena dau ena veicakacaka eso ka'u a solia vei ira ka tukuna vei ira me ra cula na i sulu i Eroni, me vakacabori kina me noqu bete. 4Oqo na i sulu me ra cula, na i sulu ni lomaserena, na efoti, na kote balavu, na sote sa rokataki ena wa talitali, na i sala kei na wabale. Me ra cula na i sulu ni bete oqo me nona na tuakamu o Eroni kei iratou na luvena me ratou qaravi au ena cakacaka vakabete. 5O ira na matai me ra vakayagataka na wa ni culacula roka wai ni koula, karakarawa, lokaloka, damudamu, kei na i sulu lineni matailalai.

Na Efoti

6“Me caka na efoti ena wa ni culacula wai ni koula, karakarawa, lokaloka kei na damudamu, kei na i sulu lineni matailalai sa muloci ka caka vakamatau. 7Me rua na kena wabale me toka ena vatuvatu ni tabana ruarua, me rau mai sota, ka sema e muri. 8Me tali vakamatau ena wa ni talitali ena veiroka ga sa caka kina na efoti o ya na roka wai ni koula, karakarawa, lokaloka kei na damudamu ena i sulu lineni muloci. 9Mo kauta e rua na vatu onikisa me ceuti kina na yacadratou na tinikarua na luve i Jekope, 10me vaka na veitarataravi ni nodratou sucu, me ono na yaca ena dua na vatu ka ono ena kena i karua. 11Me qai dua na dauceuceu maqosa me ceuta na yacadra na luve i Jekope ena vatu ruarua ka vakatikora ena i dabedabe koula. 12Na vatu ruarua oqo mo biuta ena wabale ni efoti me dau vakatakilakilataki ira tiko na mataqali lewe tinikarua i Isireli. Ena sala oqo ena dau laveta cake kina ena tabana ruarua o Eroni na yacadra na Isireli me rawa kina vei au, ko Jiova, me'u dau nanumi ira kina. 13Mo cakava eso na i ukuuku talei ena koula 14kei na rua na sinucodo koula dina, ka me muloci me vaka na waqaliqali ka semati ki na i ukuuku talei sa caka rawa.

Na i Sulu ni Lomaserena

(Lako 39.8-21)

15“Mo cakava e dua na i sulu ni lomaserena me vakayagataka na bete levu ena nona via kila na loma ni Kalou. Me cula oqo mai na veika vata ga e vakayagataki ena kena caka na efoti, kei na kena i ukuuku talei. 16Oqo me vakatautauvata na tutuna vava ka lobi rua, me 22 na senitimita na kena balavu ka 22 na senitimita na kena raba. 17Me yatu va na veivatu talei me tuvai kina ena i matai ni yatu na rupi, na topasa kei na vatu drokadroka. 18Ena i karua ni yatu na emeralita, safaia kei na daimani; 19Na i katolu ni yatu na takoisi, na yaketi kei na amecisita; 20ena i kava ni yatu na berili, na onikisa kei na jasipa. Na veivatu talei oqo me ra vakadaberi ena koula. 21Me tinikarua na vatu talei ka veitaudonui kei na yacadra na luve i Isireli, me matataka na nodra yavusa na Isireli. 22Ia mo cakava ena i sulu ni lomaserena oqo na sinucodo sa caka ena koula dina me muloci me vaka na wa, 23ka cakava talega ena i sulu ni lomaserena oqo na kena mama koula e rua, ka biuta na mama koula e rua oqo ena yasa ni veleti ni serena me rau yadua. 24Ia mo biuta na sinucodo koula e rua oqo me rau yadua na mama ena mua ni veleti e rua. 25Ia na mua ni wa ruarua mo qai semati rau vata ki na vanua ruarua, ka vakabira oqo ki na wa ni drekedreke ni efoti mai na muana e liu. 26Mo qai cakava e rua na mama koula ka cula ki na tutu ni sulu ni lomaserena e ra, o ya mai na batibatina e loma ka volekata na efoti. 27Mo qai cakava tale e rua na mama koula, ka sema e liu me biuta sobu na efoti mai na vatuvatu ni taba ka semati. 28Me vesuki vata na mama ruarua ni sulu ni lomaserena kei na efoti ena dua na wa karakarawa, me rawa kina ni davo vakavinaka na i sulu ni lomaserena ena dela ni beleti ka sega ni taucu laivi.

29“Ena gauna e curu kina ki na loma ni Tikina Tabu o Eroni, ena daramaka tiko na i sulu ni lomaserena oqo ka tiko kina na yaca ni veimataqali e Isireli, me'u na daunanumi ira tiko kina na noqu tamata oi au, ko Jiova. 30Me tokara talega na Urimi kei na Cumimi#28.30 Urimi kei na Cumimi: E rua na i yaya era dau vakayagataka na bete me ra kila kina na lewa ni Kalou; ia e sega sara ni se kilai vinaka na kena i vakavakayagataki. ena lomaserena o Eroni, me donuya na utona ena gauna e kauta voli kina e mataqu. Ena gauna vakaoqori, e dodonu me daramaka tikoga na i sulu ni lomaserena, baleta me rawa kina ni vakatulewataka na noqu lewa ena vukudra na Isireli.#Tiko 27.21; Vrua 33.8; Esera 2.63; Nie 7.65

Na i Sulu Vakabete Tale Eso

(Lako 39.22-31)

31“Mo cula na i sulu ni efoti taucoko ena roka karakarawa. 32Ia me dola na i curucuru ni ulu ena lomadonu ni kote, ka me caka ena wa talitali wavoki ena domona, me vaka na i sulu ni valu, ka me kakua ni kadresu. 33Ena belena e ra, mo qai cula kina eso na pomekaraneti ena roka karakarawa, lokaloka kei na damudamu o ya me sa tali ena wa, me cula wavoki sara ena bele ni sulu e ra; eso na lali ena wa roka koula. 34Na lali roka wai ni koula kei na pomekaraneti me cula wavoki ena bele se ruku ni kote sara e ra. 35Me dau daramaka o Eroni ni sa vakayacora na nona cakacaka vakabete. Ena gauna sa lako mai kina ki mataqu, ni sa curu mai ki na Tikina Tabu se curu lesu yani ki tuba, ena rorogo na kena tataqiriqiri, ka na sega ni mate kina o koya.

36“Mo cakava e dua na i ukuuku mokimokiti ena koula dina, me qai ceuti kina na vosa oqo ‘Sa Tabu Me Nei Jiova.’ 37Mo qai vauca oqo ena wa karakarawa ki na mua e liu ni i sulu e ologi ki uluna. 38Me vakatikora e yadrena o Eroni, me rawa kina vei au, ko Jiova, me'u ciqoma na vakacaboisoro kece sara era cakava vei au na Isireli, ka okati kina na nodra cala na tamata kevaka e sega ni taucoko na nodra vakacacabo.

39“Mo qai cula e dua na kote balavu, na kena i wabale kei na i sala, me caka kece oqo ena i sulu lineni matailalai. Mo talia ena wa talitali me i wabale.

40“Mo cula vei iratou na luve i Eroni na nodratou kote, na i wabale, nodratou i sala, mo cula na i sulu oqo me ratou rairai rakorako ka dokai kina. 41Me vakayagataka na i sulu oqo o Eroni na tuakamu kei iratou na luvena. Ia mo cabori iratou ka lumuti iratou ena waiwai olive, ka me ratou na qaravi au ena cakacaka vakabete. 42Mo cula talega eso na nodratou tarausese lekaleka ena lineni ka daramaki ena tolodratou me yaco ki na sagadratou, me ratou ubi iratou kina. 43Me dau daramaka o Eroni kei iratou na luvena ena veigauna kecega e ratou curu kina ki na Vale ni Veitavaki me rairai kina vei au se rairai kina ki na i cabocabonisoro me qarava na cakacaka vakabete ena Tikina Tabu, ka me ratou kakua kina ni mate, ni laurai na yagodratou. Oqo na i vakaro tawa mudu vei Eroni kei ira na nona kawa.

Currently Selected:

LAKO YANI 28: FNV

Highlight

Copy