LAKO YANI 27

Na i Cabocabonisoro

(Lako 38.1-7)

1“Mo cakava na i cabocabonisoro ena kau akasia. Me tautauvata na yasana vava, me 2.2 na mita na kena balavu ka 2.2 na mita na kena raba, ka me 1.3 na mita na kena cere. 2Mo cakava na ucuna momoto ena tutuna vava e cake, ka me siviraki ga mai na dua na kau na i cabocabonisoro kei na ucuna momoto ena tutuna vava, ka me solegi ena parasa. 3Mo cakava na kuro me tawa kina na dravusa, na i sivi, na beseni, na i cula, kei na i tavuteke. Na i yaya kece oqo me caka ena parasa. 4Mo cakava na kena bai ena i tutu ni cabocabonisoro ena parasa, ka cakava na qara ni kena i tubetube ena tutuna yadua. 5Me caka na i lati parasa oqo ena bati ni boto ni cabocabonisoro me galala kina na kena lawalawa ni savu sobu ena veimama ni cabocabonisoro. 6Mo cakava na kena i vua ena kau akasia, ka solega ena parasa. 7Biuta ena kena veimama ena yasa ruarua ni cabocabonisoro ni sa colati. 8Mo cakava ena kau raraba ka me vakalomana, me vaka na kena i tuvatuva ka'u a vakaraitaka vei iko mai na ulunivanua.

Na Lomanibai ni Vale Tabu

(Lako 38.9-20)

9“Mo cakava e dua na rara sa vakabai ena i latilati lineni matailalai e loma ni vale tabu. Mai na yasana ki na ceva ni latilati, oqo me na 44 na mita na kena balavu. 10Me vakadeitaki ena 20 na duru parasa kei na kedra qara parasa yadua, ia na i ruberube ni duru kei na kedra i vau me caka ena siliva. 11Me tautauvata talega vakakina ena yasa ki na vualiku. 12Ena yasana vaka ki na ra me 22 na mita na kena balavu, tini na duru ka tini talega na i latu. 13Ena mata ni tokalau, ka donuya na katuba na kena i lati me 22 na mita na kena balavu. 14Me 6.6 talega na mita na i lilili ena yasana ka dua, tolu na kena duru ka tolu na i latu. 15Me 6.6 talega mita na i lilili ena yasana ka dua, tolu na kena duru, ka tolu na i latu. 16Ena ruku ni mata ni katuba me dua kina na kena i lati me ciwa na mita na kena balavu me caka ena lineni matailalai ka tali ena wa karakarawa, lokaloka kei na vuti ni sipi damudamu. 17Na veiduru taucoko ka wavokita na buturara ni Vale me ra ubi ena siliva, na kena i qaso ena siliva talega, na kena i latu me boro ena parasa. 18Na balavu ni buturara ni Vale me 44 na mita, me 22 na mita na kena raba, ka 2.2 na mita na kena cere. Na i lati me caka ena lineni matailalai muloci ka parasa na belena e ra. 19Na i yaya taucoko e vakayagataki ena loma ni vale tabu kei na i vakadei (se peki) ni vale tabu e dodonu me ra caka ena parasa.

Na Qaravi ni Cina

(Vsoro 24.1-4)

20“Mo vakaroti ira na Isireli me ra kauta mai vei iko na waiwai olive digitaki me baleta na cina, me rawa ni waqa tikoga kina na cina ena veiyakavi. 21O Eroni kei ira na luvena me ra tuva toka na cina ni Vale ni Veitavaki ena taudaku ni lati ka vakanamata ki na Kato ni Veiyalayalati. Me waqa tiko na cina ena kequ i serau mai na karobo ni yakavi ki na kida ni mataka. Na i vakaro oqo me ra vakayacora tikoga ka tawa mudu na Isireli kei ira na nodra kawa.

Currently Selected:

LAKO YANI 27: FNV

Highlight

Copy