LAKO YANI 19

Yaco ki na Ulunivanua o Saineai

1Ena i matai ni siga ni i katolu ni vula ena nodra biuti Ijipita mai na Isireli, ena siga o ya era a yaco yani kina ki na vanua lala o Saineai. 2Era a biuti Refitimi, ka lako curuma yani ki na vanua lala mai Saineai, ka ra la'ki biri keba ena ruku ni Ulunivanua o Saineai. 3A sa qai lako cake o Mosese ki na ulunivanua me rau la'ki sota kei na Kalou. A kacivi Mosese na Kalou mai na ulunivanua, ka kaya, “Oqo na ka mo la'ki tukuna vei ira na kawa i Jekope, na Isireli: 4O ni sa raica na veika ka'u a cakava vei ira na kai Ijipita, kei na i tovo ni noqu kauti kemuni mai me vaka e dua na ikeli sa vukataki ira mai na luvena, ka'u sa kauti kemuni mai kina kivei au. 5Ia oqo, kevaka o ni na vakarorogo vei au ka muria na noqu veiyalayalati, o ni na yaco mo ni noqu i yau talei mai vei ira kecega na tamata. E dina ga ni sa noqu o vuravura taucoko, ia o ni na noqu tamata digitaki,#Vrua 4.20; 7.6; 14.2; 28.18; Taito 2.14 #1Pita 2.9 6ka yavusa bete sa qaravi au duadua ga, ka matanitu tabu.#Vtaki 1.6; 5.10 Mo tukuna na vosa oqo vei ira na Isireli.”

7A sa lako mai o Mosese ka kacivi ira vata mai na nodra i liuliu na Isireli ka kaya vei ira na ka kecega sa vakarota ko Jiova. 8Era a kaya vata kece mai na tamata, “Keimami na cakava na veika kecega sa kaya ko Jiova.” A qai la'ki tukuna vei Jiova o Mosese na ka era sa kaya na tamata.

9A sa kaya vei Mosese ko Jiova, “Au na lako mai vei iko ena dua na o loaloa vavaku, ka me ra na rogoci au kina na tamata ni'u veivosaki kei iko, ka me ra na vakabauti iko talega kina ena veigauna mai muri.” A sa la'ki tukuna vei Jiova o Mosese na ka era a kaya na tamata.

Era sa Vakatabui na Tamata

10A sa kaya vei Mosese ko Jiova, “Lako vei ira na tamata ka vakasavasavataki ira edaidai, ka vakakina ni mataka. Me ra savata na nodra i sulu, 11ka vakavakarau ki na i katolu ni siga. Ena siga o ya, ena lako sobu mai kina ko Jiova ena Ulunivanua o Saineai e matadra kecega na tamata. 12Mo makataka e dua na i yalayala me wavokita na ulunivanua me ra kakua ni lako sivita na tamata, ka kaya, ‘Ni qarauna mo ni kakua ni lako cake ki na ulunivanua se tara na yasa ni ulunivanua. Kevaka e dua sa tara na ulunivanua, ena vakamatei:#Ipe 12.18-20 13me kakua sara ni dua e tarai ira, ia me ra vakaviriki ena vatu se lauvana ena dakaititi; se manumanu se tamata me ra vakamatei.’ Ena gauna sa na tagi kina vakabalavu na davui, me ra qai lako cake ki na ulunivanua.”

14A sa qai lako sobu mai na ulunivanua o Mosese vei ira na tamata: ka vakarautaki ira. Era a savata na nodra i sulu. 15Ia a qai kaya vei ira na tamata o Mosese, “Mo ni vakavakarau ena i katolu ni siga ka kakua sara ni torova e dua na yalewa.

16Ena mataka ni katolu ni siga, a sa lutu na kurukuru ka tibi na liva, a sa basika talega na o loaloa vavaku ena ulunivanua, ka rogo vakadomoilevu na davui. Era sa sautaninini kecega ena rere na tamata era tiko ena nodra i tikotiko.#Vtaki 4.5 #Vrua 4.11-12 17Sa qai kauti ira na tamata o Mosese mai na nodra i tikotiko me ra la'ki veitavaki kei na Kalou; ka ra mai duri tu ena ruku ni ulunivanua. 18Ena gauna o ya sa solega taucoko tu na Ulunivanua o Saineai na kubou, baleta ni a lako sobu mai ko Jiova ena bukawaqa. A kuvu cake na kubou me vaka na kubou ni lovo, ka ra sautaninini vakalevu na lewenivanua. 19A sa toro cake tikoga na rogo levu ni davui, ia a vosa o Mosese ka sa sauma mai na Kalou ena kurukuru. 20Sa qai lako sobu mai ko Jiova ki na dela ni Ulunivanua o Saineai; a sa kacivi Mosese cake ki na dela ni ulunivanua, ka sa lako cake yani o Mosese. 21A sa kaya vei Mosese ko Jiova, “Mo lako sobu ka vakaroti ira na tamata me ra kakua ni lako sivita mai na i yalayala me ra raici au, de qai levu vei ira e mate. 22O ira talega na bete sa toro volekati au mai me ra vakasavasavataki ira, de ra na qai mate talega.”

23A sa kaya vei Jiova o Mosese, “Sa tabu vei ira na tamata me ra lako cake yani ki na Ulunivanua o Saineai; ka ni o ni a sa vakaroti keimami oti, ka kaya, ‘Makataka na i yalayala me wavolita na ulunivanua ka vakatabuya.’ ”

24A sa kaya ko Jiova, “Lako sobu ka la'ki kauti Eroni cake mai; Ia mo kakua ni vakatarai ira na bete se o ira na tamata me ra lako sivita na i yalayala ka lako cake mai vei au; de'u na qai vakarusai ira.” 25A sa qai lako sobu o Mosese ka tukuna na veivosa oqo i Jiova vei ira na tamata.

Currently Selected:

LAKO YANI 19: FNV

Highlight

Copy