LAKO YANI 18
18
Sikovi Mosese o Jacoro
1A sa rogoca o Jacoro na bete mai Mitiani ka vugoi Mosese na ka kece sara sa cakava na Kalou ena vuku i Mosese kei na vukudra na Isireli na nona tamata, kei na nona a kauti ira tani mai Ijipita ko Jiova. 2Sa qai lako mai vei Mosese o Jacoro, ka kauta voli mai na wati Mosese o Sipora, ni a biu tu ga yani,#Lako 2.21-22 3kei rau na luvena tagane. Na yacana e dua vei rau o Kerisomi#18.3 Kerisomi: Na yaca oqo e balebale vaka na “tiko vulagi” ena vosa vakaiperiu. ni a kaya, “Au a tiko vulagi ena dua na vanua tani,”#Caka 7.29 4kei na yaca i koya ka dua o Iliesa#18.4 Iliesa (Eliezer) a kena i balebale Na noqu Kalou sa vukei au. ni a kaya, “Na Kalou i tamaqu sa vukei au, ka sa vakabulai au mai na i seleiwau i tui Ijipita.” 5A sa lako mai o Jacoro na vugoi Mosese kei na wati Mosese kei rau na luvena ki na vanua lala, na vanua a vakaitikotiko kina o Mosese ena ulunivanua ni Kalou. 6A sa tukutuku yani vei Mosese, “Oi au o Jacoro na vugomu, ka'u sa kauta mai na watimu kei rau na luvemu tagane ruarua.” 7A mai lako yani o Mosese me tavaka na vugona; a sa cuva sobu e matana ka reguci koya; e rau a veivakabulataki ka lako sara yani ki na loma ni valelaca. 8Sa qai tukuna vua na vugona o Mosese na ka kece sara sa vakayacora ko Jiova vua na tui kei ira na kai Ijipita ena vukudra na Isireli. A sa tukuna talega vua na ka dredre kece era a sotava e gaunisala kei na nona vakabulai ira ko Jiova. 9A sa marautaka sara o Jacoro na ka vinaka kecega sa cakava vei ira na Isireli ko Jiova ena nona vakabulai ira mai vei ira na kai Ijipita. 10Sa qai kaya o Jacoro, “Me vakacaucautaki ko Jiova, ni sa vakabulai kemuni mai vua na tui kei ira na kai Ijipita! 11Ia oqo, au sa qai kila, ni sa cecere duadua ga ko Jiova vei ira na kalou kecega, baleta ni sa kauti ira tani mai Ijipita na Isireli ni ra a vakabobulataki ira. 12A sa kauta mai o Jacoro na vugoi Mosese na i soro kama kei na so na i madrali vua na Kalou. Sa qai lako mai o Eroni kei ira kece sara na nodra qase na Isireli vata kei na vugoi Mosese me ra kania na kakana vakacabori ka tiki ni nodra sokalou vua na Kalou.
Nodra Lesi na Dauveilewai
(Vrua 1.9-18)
13Ena siga ka tarava, a dabe sobu o Mosese me lewai ira na tamata, era a mai tu e matana na tamata mai na mataka me yacova sara na bogi. 14Ni sa raica o Jacoro na ka kece sa cakava o Mosese, sa qai tarogi koya, “A cava na ka o sa cakava tiko oqo vei ira na tamata? A cava na vuna o dabe duadua tu ga kina eke, ka ra qai tucake wavoliti iko na tamata mai na mataka me yacova na yakavi?”
15A sa qai kaya vua na vugona o Mosese, “E dodonu me'u vakayacora oqo baleta ni ra lako mai vei au na tamata me ra kila na loma ni Kalou. 16Ni yaco e dua na veileti, e kau mai vei au na leqa oqo ka'u na qai vakatulewataka se o cei vei rau e dodonu, ka tukuna vei rau na i vakaro ni Kalou kei na nona i vunau.”
17Sa qai kaya vei Mosese na vugona, “E sega ni vinaka na ka o cakava tiko. 18O na vakaocai iko ga kina kei ira na tamata. Sa rui bibi na i tavi oqo vei iko; o na sega ni rawa ni cakava taudua. 19Ia mo rogoci au mada me'u solia vei iko eso na i vakasala vinaka, ka me tiko vata kei iko na Kalou! E dodonu mo matataki ira na tamata vua na Kalou ka kauta vua na nodra leqa: 20mo vakatavulici ira ena i vunau kei na lewa ni Kalou, ka vakamacalataka vei ira na i tovo ni bula me ra bula kina kei na ka me ra cakava. 21Ia mo digitaka talega eso na tamata yalodina mai vei ira na Isireli, o ira era rerevaka na Kalou, era tamata nuitaki, era cata na cakacaka vakaveidabui, ka qai lesi ira na tamata oqo me ra i liuliu ni matailawalawa tauya udolu, tauya drau, tauya limasagavulu, kei na i wasewase tauya tini. 22Solia vei ira na cakacaka ni dauveilewai ena vukudra na tamata ena veigauna kece sara; me ra qai kauta ga mai na veika dredre vei iko, ia na veika lalai sa na rawa me ra vakatulewa ga kina. Oqo ena vakamamadataka vei iko na i colacola, baleta ni ra na wasea vata na i tavi kei iko. 23Kevaka o cakava na ka oqo, me vaka na lewa i Jiova, o na sega ni vakaocai iko, ka ra na dui lesu na tamata ki na nodra vale ena yalo vakacegu ni sa sotavi na nodra leqa.”
24A sa vakarorogo vei Jacoro o Mosese ka muria na nona i vakasala. 25A sa digitaki ira na tamata nuitaki o Mosese mai vei ira kece sara na Isireli ka lesi ira me ra i liuliu vei ira na tamata: me ra i liuliu ni veiyaudolu, yadrau, yalimasagavulu kei na veiyatini. 26Era a turaga ni lewa vei ira na tamata ena veigauna taucoko; era a kauta mai vei Mosese na veikisi lelevu ka dredre, ia era a vakatulewa ga ena veileti lalai.
27Sa qai vakamoce vua o Mosese, ka qai lesu yani o Jacoro na vugona ki na nona vanua.
Currently Selected:
LAKO YANI 18: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
