LAKO YANI 17
17
Dave na Wai mai na Vatu
(Tiko 20.1-13)
1Era a biuta na vanua lala mai Sini na yavusa taucoko sara ni Isireli ka ra lako voli yani ena veivanua ena nodra i lakolako ena lewa i Jiova. Era a mani la'ki vakaitikotiko vakalekaleka mai Rifitimi, ia sa sega kina na wai me ra gunuva. 2Era a veileti kei Mosese ka kaya. “Solia mai vei keimami na wai me keimami gunu kina.” Sa qai kaya vei ira o Mosese, “A cava o ni sa mai veileti kina kei au? A cava o ni sa vakatovolei Jiova kina?”
3Ia era a viagunu tikoga mai kea na tamata ka vosa vakacudrucudru vei Mosese, ka kaya, “A cava o sa kauti keimami tani kina mai Ijipita, mo mai vakamatei keimami, na luve i keimami kei na neimami manumanu ena viagunu?”
4O koya oqo a sa qai masu kina o Mosese vei Jiova ka kaya, “A cava me'u cakava vei ira na tamata oqo? Era sa voleka ni vakaviriki au ena vatu.”
5A sa kaya vei Mosese ko Jiova, “Mo kauta eso na qase ni Isireli ka lako yani ki liu; kauta na nomu i titoko o a samuta kina na uciwai na Naile ka lako. 6Au sa na la'ki tu e matamu mai kea ena dela ni vatu mai Ului Saineai. Mo mokuta na vatu ka na dave mai na wai me ra gunu kina na tamata. A sa vakayacora o Mosese e matadra na nodra qase na Isireli.
7A sa vakatokai na vanua o ya me o Masa#17.7 A kena i balebale Vakatovolei kei Meripa,#17.7 A kena i balebale Veileti baleta ni ra a veileti na Isireli ka vakatovolei Jiova ka kaya, “Sa tiko li kei keda ko Jiova, se segai?”
Na i Valu kei Ira na Amalekaiti
8Era a lako mai na Amalekaiti ka vala kei ira na Isireli mai Rifitimi. 9Sa qai kaya vei Josua o Mosese, “Mo digitaka eso vei keda me ra lako yani ka vala kei ira na Amalekaiti. Au na la'ki tu ena dela ni ulunivanua ni mataka ka taura tu na i titoko ni Kalou e ligaqu.” 10A sa vakayacora o Josua na ka sa vakarota vua o Mosese ka vala vata kei ira na Amalekaiti, ka ratou sa lako cake kina ki na dela ni ulunivanua o Mosese, kei Eroni vata kei Uri ena gauna vata o ya. 11Ena gauna ga sa laveta cake kina na ligana o Mosese, era sa qaqa sara tiko na Isireli, ia ni lako sobu ga na liga i Mosese, a sa tekivu me ra qaqa o ira na Amalekaiti. 12Ia ni sa oca na liga i Mosese, e rau sa qai taura e dua na vatu o Eroni kei Uri, ka biuta e rukuna me dabe kina. E rau a mai yadua tu na yasana o Eroni kei Uri ka tabea cake tu na ligana. E rau a taura tu vakadua na ligana me yacova ni sa dromu na siga. 13Ena sala oqo, a sa vakadrukai ira kece sara kina na Amalekaiti o Josua.
14Sa qai kaya vei Mosese ko Jiova, “Mo vola na ka oqo ena dua na i vola me na dau nanumi kina. Tukuna vei Josua ni'u sa na vakawabokotaki ira vakadua na Amalekaiti.”#Vrua 25.17-19; 1Samu 15.2-9 15A sa tara o Mosese e dua na i cabocabonisoro ka vakatoka me yacana ko Jiova nisi.#17.15 Jiova nisi: A kena i balebale Ko Jiova, na noqu drotini (Jehovah Nissi - the Lord, my banner). 16A sa kaya, “Laveta cake na drotini i Jiova! Ena vala tikoga ko Jiova kei ira na Amalekaiti ka tawa mudu!”
Currently Selected:
LAKO YANI 17: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
