LAKO YANI 16

Na Madrai mai Lomalagi

1Era a biuti Elimi mai na lewenivanua taucoko ni Isireli, ka ra yaco yani ki na vanua lala o Sini ena kedrau veimama o Elimi kei Saineai ena i katinikalima ni siga ena i karua ni vula ni oti na nodra biuti Ijipita mai. 2Era a vosa kudrukudru kece sara vei Mosese kei Eroni ena vanua lala o ya 3ka kaya vei rau, “E vinaka cake me a se vakamatei keimami ga mai Ijipita na liga i Jiova. Mai kea, keimami a bau dabe vinaka toka ka kania na levu ga ni lewe ni manumanu kei na levu ni kakana tale eso keimami sa via kania. Ia drau sa kauti keimami ga mai ki na vanua lala oqo me keimami mai kolaiciba kina ena viakana.”

4A sa qai kaya vei Mosese ko Jiova, “Ia oqo ka'u na vakatauca mai vei kemuni na madrai mai lomalagi; me ra qai lako na tamata ena veisiga yadua ka la'ki kauta mai na ka me rauta ga na siga o ya. Ena vuku ni ka oqo au na vakatovolei ira mada se ra na muria na noqu i vakaro se sega.#Joni 6.31 5Ena i kaono ni siga, me ra qai kauta mai na i vakarau ni rua na siga ka vakarautaka.”

6E rau sa qai kaya vei ira kecega na Isireli o Mosese kei Eroni, “Ena yakavi edaidai o ni na qai kila kina ni sai Jiova ga ka kauti kemuni tani mai na vanua o Ijipita. 7Ena mataka lailai, o ni na raica kina na lagilagi i Jiova, baleta ni a sa rogoca na nomuni vosa kudrukudru vua. A cava o keirau, mo ni vosa kudrukudru kina vei keirau?” 8Sa qai kaya o Mosese, “Ko Jiova duadua ga ena solia vei kemuni na lewe ni manumanu mo ni kania ena yakavi kei na levu ga ni madrai o ni vinakata ena mataka lailai, baleta ni sa rogoca o koya na nomuni vosakudrukudru vua. Na nomuni vosakudrukudru sa sega ni tau vei keirau, ia sa tau ga vei Jiova.”

9A sa qai kaya vei Eroni o Mosese, “La'ki tukuna vei ira taucoko sara na Isireli, ‘Ni lako mai ka mai tu ena mata i Jiova, ka ni sa rogoca na nomuni vosa kudrukudru o koya.” 10Ni se vosa tikoga vei ira kece na lewenivanua ni Isireli o Eroni, era a qai rai vuki yani ki na vanua lala, ka ra raica na i ukuuku i Jiova ni sa basika mai ena o. 11A sa kaya vei Mosese ko Jiova, 12“Au sa rogoca na nodra vosa kudrukudru na Isireli. Mo tukuna vei ira ni ra na kana lewe ni manumanu ena yakavi, ka vakarautaki ena mataka na madrai ena kena levu ga era vinakata. Era na qai kila kina ni sai au ko Jiova na nodra Kalou.”

13Ena yakavi era a vuka mai e dua na i binibini kueli ka robota na i tikotiko; ia sa volita na i tikotiko na tegu ena kida ni mataka. 14Ni sa mamaca yani na tegu, a sa toka mai ena dela ni vanua lala eso na tikitiki ni ka mamare lalai, ka ra vaka na tegu cevata.

15Ia ni ra sa raica oqo na Isireli, era sa sega ni kila se na cava o ya, ka ra veitarogitaka vakai ira, “Na cava oqo?”#1Kori 10.3

Sa qai kaya vei ira o Mosese, “Oqo na madrai sa solia vei kemuni ko Jiova mo ni kania.” 16Sai koya oqo na ka sa vakarota ko Jiova: mo ni tomika yadua me vaka na levu ni ka o ni dui vinakata, ka me tau ya 2 na lita na tamata yadua e nomuni matavuvale. 17Era sa vakayacora na Isireli na ka oqo, eso era kumuna e levu, ka so e lailai sobu. 18Ia ni ra sa vakarautaka, sa sega ni sivia vua e kumuna e levu, ka sega ni takiveiyaga vua e kumuna vakalailai. Era a kumuna na ka e dui rauti ira yadua vakavinaka.#2Kori 8.15 19A sa kaya vei ira o Mosese, “Me kakua sara ni dua e maroroya na ka oqo me yacova na mataka.” 20Ia era a sega ni vakarorogo vei Mosese; eso vei ira era a maroroya eso me yacova na mataka, ia ena mataka a sa boi ca ka sinai ena ulo, ka sa cudruvi ira kina o Mosese.

21Era a tomika ena veimataka na tamata yadua me rauta na ka e vinakata; ia ni sa cila katakata mai na siga, sa waicala sara yani. 22Ena i kaono ni siga, a vakaruataki na levu ni kakana era kumuna, ka me ra tau ya 4 na lita na tamata yadua. Era sa lako kece mai na nodra i liuliu ni yavusa na Isireli ka tukuna vei Mosese na ka oqo. 23A sa kaya vei ira o koya “Sai o koya oqo na ka sa vakarota ko Jiova; ‘Ni mataka sa siga me vakatabui vei Jiova. Mo ni vavia rawa edaidai na ka o ni vinakata me vavi, ka vakasaqara na ka o ni vinakata me saqa. Na ka kece sara e vo me na maroroi me yacova na mataka.”#Lako 20.8-11 24Era a mani maroroya kina na ka kece sara sa vo me yacova na mataka me vaka a vakarota o Mosese; ka sa sega ni boi ca se kune kina na ulo. 25A sa kaya o Mosese, “Ni kania oqori edaidai, ka ni sa siga ni vakacegu sa vakatabui vei Jiova; o ni na sega talega ni kunea e dua na kakana ena taudaku ni i tikotiko. 26E ono na siga mo ni kumuna kina; ia ena i ka vitu ni siga sa siga ni vakacegu, ena sega ni kunei kina.” 27Ena i kavitu ni siga era a lako eso na tamata me ra la'ki kumuni kakana, ia era a mani sega ni kunea e dua na ka.

28Sa qai kaya vei Mosese ko Jiova, “A cava soti na dede ni gauna o ni sega tiko kina ni muria na noqu i vakaro kei na noqu i vunau? 29Raica! Sa solia vei kemuni na siga ni vakacecegu ko Jiova, o koya oqo sa solia kina ena i kaono ni siga na kakana me veirauti ena rua na siga. Mo ni tiko ga ena vanua o ni dui tiko kina ena i kavitu ni siga, ka me kakua ni dua e biuta na nona i tikotiko.” 30O koya oqo era a vakacegu kina na tamata ena i kavitu ni siga. 31Era a vakatoka na Isireli me yaca ni kakana na mana.#16.31 mana: Na vosa oqo e balebale vaka na taro “Na cava o ya?” (raica na tikina 15) ena vosa vakaiperiu. Na mana oqo sa vaka na sore ni kau vulavula matailalai, ka kena i kanakana sa vaka na bisikete sa caka vata na oni.#Tiko 11.7-8 32A sa kaya o Mosese, “Sa vakaroti keda ko Jiova me da maroroya e dua na i wase ni mana, ka me maroroi oqo me baleti ira na noda kawa ena veigauna mai muri, me rawa kina ni ra raica na kakana sa solia vei keda ko Jiova me da kania ena vanua lala, ena nona kauti keda tani mai na vanua o Ijipita.” 33A sa kaya vei Eroni o Mosese, “Taura e dua na saqa ka tawana kina e 2 na lita na mana, ka biuta ena mata i Jiova me maroroi me baleti ira na nomuni kawa mai muri.”#Ipe 9.4 34A sa la'ki biuta o Eroni ena mata ni Kato ni Veiyalayalati me maroroi tu kina me vaka sa vakarota vei Mosese ko Jiova. 35Era a kana mana tiko na Isireli ena loma ni 40 na yabaki me yacova na gauna era yacova kina na vanua o Kenani, ka ra sa vakaitikotiko kina.#Josua 5.12 36(Na i vakavakarau taumada ka vakayagataki e tautauvata kei na 20 na lita.)

Currently Selected:

LAKO YANI 16: FNV

Highlight

Copy