LAKO YANI 15

Na Sere i Mosese

1A sa qai lagata o Mosese kei ira na Isireli na sere oqo vei Jiova:#Vtaki 15.3

“Au na sere vei Jiova ni sa qaqa ena lagilagi;

sa kolotaki ira na ose kei ira na vodoka ki na wasawasa.

2Sa noqu kaukauwa kei na qaqa ko Jiova;#Same 118.14; Aisea 12.2

sai koya ga ka sa vakabulai au.

Sai koya na noqu Kalou, ka'u na vakacaucautaki koya,

Sa Kalou nei tamaqu o koya, ka'u na seretaka na nona lagilagi.

3A sotia qaqa ena i valu ko Jiova;

ko Jiova na yacana.

4Sa kolotaka na kareti ni tui kei na nona mataivalu ki wasawasa;

ka ra sa luvu na nona turaganivalu ena Wasa Damudamu.

5Sa ubi ira na wasawasa titobu;

ka ra sa lutu dromu ki na boto ni sauloa me vaka na vatu.

6Na ligamuni i matau Jiova sa rui kaukauwa;

sa musulaki ira vakamatailalai na meca.

7Ena nomuni kaukauwa levu o ni sa vakamalumalumutaki ira sobu na meca.

Sa waqa mai na nomuni cudru ka vakamai ira me vaka na co madu.

8O ni a uvuca na wasawasa ka bini cake kina na wai;

ka la'ki tucake tu vakadodonu me vaka na lalaga;

ka sa mamaca sara na boto ni wasa titobu.

9Sa kaya na meca, au na vakasavi ira ka vesuki ira;

au na wasea na nodra i yau, ka'u na taura mai vei ira na ka au vinakata;

au na ucuna mai na noqu i seleiwau ka'u na vakarusai ira ena ligaqu.

10O ni sa buraka na nomuni cegu, sa ubi ira na wasawasa;

ka ra sa dromu sobu me vaka na uma ena wasa titobu.

11“I Jiova, o cei vei ira na kalou sa tautauvata kei kemuni?

O cei sa vakataki kemuni, me vakaiukuuku ena savasava?

O cei ena rawa ni vakayacora na veika lelevu ka veivakurabuitaki me vakataki kemuni?

12O ni sa dodoka na ligamuni matau ka sa tilomi ira na meca o vuravura.

13Ena nomuni yalodina ki na nomuni vosa ni yalayala, o ni a liutaki ira kina na tamata o ni sa vakabula;

ena nomuni kaukauwa o ni sa kauti ira yani ki na nomuni vanua tabu.

14Era a rogoca na veimatanitu, ka ra sautaninini ena rere;

era sa domobula na kai Filisitia.

15Era sa rere vakalevu na nodra dauveiliutaki na kai Itomi,

era sa sautaninini na dauveiliutaki ni Moapi;

sa takali yani na nodra yalodoudou na kai Kenani.

16A yacovi ira na rere kei na domobula.

Era sarava na nomuni kaukauwa levu, i Jiova,

ka ra duri tu ena ririko kei na taqaya

me yacova ni ra sa lako yani kina na nomuni tamata,

o ira o ni sa vakagalalataka mai na tiko bobula.

17O ni a kauti ira mai ka vakatikori ira ena nomuni tikotiko cecere,

ena vanua o ni a digitaka Jiova me nomuni tikotiko tabu;

na Valenisoro o ni a tara ga vaka i kemuni.

18O kemuni, Jiova, o ni na vakataulewa vakatui tikoga ka tawa mudu.”

Na Sere i Miriama

19Era sa lako na Isireli ena vanua mamaca ena loma ni wasawasa. Ia ena gauna era sa lako kina ki wasawasa na ose ni tui vata kei na nona kareti kei ira era sa kauta voli, a sa vakasuka tale mai na wai ko Jiova ka luvuci ira.

20A sa qai taura o Miriama na parofita yalewa na ganei Eroni e dua na tibereli ka ra muri koya na yalewa taucoko era a tauri tibereli ka meke. 21A qai sere vei ira o Miriama:

“Ni sere vei Jiova, baleta ni sa rawata oti e dua na qaqa sa lagilagi;

ni sa kolotaki ira na ose kei ira era sa vodoka ki loma ni wasawasa.”

Na Wai Gaga

22A qai vakaroti ira na Isireli o Mosese me ra vakarau ka biuta na Wasa Damudamu, ka ra lako yani ki na vanua lala mai Suri. E a siga tolu na nodra lako tiko ena vanua lala ia era a sega sara ni bau kunea e dua na wai. 23Ni ra yaco yani ki Mara, era a sega ni gunuva rawa na kena wai baleta ni sa rui gaga. O ya na vuna sa vakatokai kina me o Mara.#15.23 Mara: Na yaca oqo e kena i balebale na “gaga” ena vosa vakaiperiu.

24Era a vosavosa na tamata vei Mosese ka kaya, “A cava eda na gunuva?”

25A sa qai masu vua na Kalou o Mosese, ka sa qai vakaraitaka na Kalou ki vua e dua na i musumusu ni kau ka kolotaka yani ki wai; a sa vinaka kina na wai me laugunu.

A sa solia vei ira ko Jiova eso na i vakaro ka vakatovolei ira talega mai kea. 26A sa kaya, “Kevaka o ni na vakarorogo vakavinaka vei Jiova na nomuni Kalou, ka cakava na ka e dodonu e matana, ka vakayacora na nona i vunau ka muria na nona i vakaro, au na sega ni totogitaki kemuni ena mate ca au a vakatauva vei ira na kai Ijipita; Ni sai au ko Jiova rafa.”#15.26 Jiova Rafa: A kena i balebale Na TURAGA, o koya sa veivakabulai tiko (Jehovah Rapha - the Lord our Healer).

27Era a qai yaco ki Elimi, a tiko kina e tinikarua na mata ni wai kei na vitusagavulu na vuniniu; era a la'ki vakeba toka volekata na wai.

Currently Selected:

LAKO YANI 15: FNV

Highlight

Copy