LAKO YANI 14
14
Na Takosovi ni Wasa Damudamu
1A sa qai kaya vei Mosese ko Jiova. 2“Tukuna vei ira na Isireli me ra lesu mai ka mai toka mada ena mata i Pi Eiroci ena maliwa i Mikitoli kei na Wasa Damudamu, ka volekati Peali Sifoni. Mo ni toka donuya toka, volekata na wasawasa. 3Ena qai vakananuma vakaoqo e lomana na tui, ‘Era sa lako sese voli na Isireli ena loma ni vanua, ka sa sogolati ira na vanua lala,’ 4Au na vakaukauwataka na lomana na tui, ka na qai vakasavi ira, ia au na vakarokorokotaki ena noqu qaqa vua na tui kei ira kece na nona mataivalu. Era na qai kila kina ni sai au ko Jiova.” Era a vakayacora na Isireli me vaka na ka a tukuni vei ira.
5Ni sa tukuni vua na tui Ijipita ni ra sa dro na Isireli, a sa veisautaka na lomana ka vakakina na lomadra na nona vakailesilesi, ka ra kaya, “A cava eda sa cakava? Eda sa laivi ira na Isireli me ra lako yani ka sa segai tale e dua me qaravi keda tiko!”
6A vakarautaka na tui na nona qiqinivalu ka lako vata yani kei ira na nona mataivalu. 7Sa kauta na kareti kecega, ka okati kina na 600 na kareti digitaki sa liutaki mai vei ira na kena i vakailesilesi vakaivalu.
8A vakaukauwataka na loma i tui Ijipita ko Jiova, ka sa sasaga yani o koya me vesuki ira na Isireli, o ira ka ra sa lako tiko yani ena qaqa.#14.8 qaqa; se ruku ni veitaqomaki i Jiova. 9Era a vakasavi ira na Isireli na kai Ijipita ena ose kece ni tui, na kareti kei na nona mataivalu, ka la'ki vesuki ira ena vanua era sa la'ki keba toka kina ena yasa ni Wasa Damudamu ka volekati Pi Eiroci kei Peali Sifoni.
10Ni sa voleka yani na tui, era a raici ira na kai Ijipita na Isireli ka ra raica ni ra cici muri ira tiko yani; a sa duatani na nodra rere, ka ra sa tagi vei Jiova. 11Era a kaya vei Mosese, “Sa sega li na i bulubulu mai Ijipita? A cava o sa kauti keimami tani mai kina me keimami mai mate ena vanua lala? Raica, na cava o sa cakava vei keimami ena nomu kauti keimami tani mai Ijipita! 12E sega li ni ka oqo keimami a kaya vei iko mai Ijipita? Keimami a kaya, ‘Laivi keimami me keimami qaravi ira na kai Ijipita. E vinaka cake vei keimami me keimami qaravi ira na kai Ijipita ka ca me keimami mai mate tu ena vanua lala oqo.”
13A qai kaya vei ira na Isireli o Mosese, “Ni kakua ni rere, ni yalo dei ga, ka raica na ka ena cakava ko Jiova me na vakabulai kemuni kina edaidai; ena sega tale ni o ni raici ira na kai Ijipita me vaka na nomuni raici ira tiko oqo edaidai. 14Ena vala ena vukumuni ko Jiova: ka na sega ni dua na ka o ni na cakava.”
15A sa qai kaya vei Mosese ko Jiova, “A cava o sa tagi mai kina vei au? Tukuna vei ira na Isireli me ra toso ki liu. 16Ia mo dulaka cake na nomu i titoko ka dodoka yani na ligamu vaka ki wasawasa me wasea rua, ka me ra lako na Isireli ena qele mamaca ena loma ni wasawasa. 17Au na vakaukauwataka na lomadra na kai Ijipita me ra lako muri ira yani; ia au na dokai mai na noqu rawata na qaqa vua na tui kei ira na nona mataivalu vodo ose. 18Era na kila kina na kai Ijipita ni sai au ga ko Jiova, ka'u sa qaqa vei ira.”
19Na agilosi ni Kalou ka dau liutaki ira na Isireli sa qai toso yani ki muri ka la'ki tu mai dakudra na lewenivanua. E toso talega na duru o mai matadra ki dakudra; 20ka mai tu ena veimama ni mataivalu ni Ijipita kei na mataivalu ni Isireli. Sa vakavuna na butobuto vei ira na Ijipita na o, ia sa solia na rarama vei ira na Isireli; era sega ni veitorovi rawa kina ena loma ni bogi taucoko.
21A dodoka yani o Mosese na ligana vaka ki wasawasa ka vakasuka na wasawasa ko Jiova ena dua na cagi tokalau kaukauwa ka liwa tiko ena loma ni bogi taucoko, ka vukica na wasawasa me vanua mamaca. A tawase rua na wai. 22Era a lako yani na Isireli ena vanua mamaca ena loma ni wasawasa ka sa tu na wai ena yasa ruarua me vaka na lalaga.#1Kori 10.1-2; Ipe 11.29 23Era a vakasavi ira na Isireli na kai Ijipita ka muri ira yani na ose kece ni tui, na nona kareti, kei ira na nona mataivalu vodo ose ki na loma ni wasawasa. 24Ni kida na mataka, a raici ira sobu mai na mataivalu ni Ijipita ko Jiova mai na duru bukawaqa kei na duru o ka vakataqayataki ira. 25A vakalobora na yava ni nodra kareti ka dredre ni ra toso, ka ra kaya na kai Ijipita, “Me da dro tani mai vei ira na Isireli, ni sa vala tiko kei keda ko Jiova ena vukudra.”
Luvu Kece na Sotia ni Ijipita
26A sa kaya vei Mosese ko Jiova, “Dodoka yani na ligamu vaka ki wasawasa, ka me suka lesu tale mai na wai vei ira na kai Ijipita, kei na nodra kareti kei na nodra mataivalu vodo ose.” 27E a qai dodoka yani kina na ligana o Mosese vaka ki wasawasa, ia sa qai suka tale na wai ki na kena i tutu e liu ena kida ni mataka. Ni ra tovolea me ra dro na kai Ijipita, a biuti ira ko Jiova ki na loma ni wasawasa; ka sega ni dua me vo. 28A sa suka lesu tale mai na wai ka ubia na kareti na mataivalu ose, kei ira kece na mataivalu ni tui, era a muri ira yani ki na loma ni wasawasa; ka sega sara ni bau vo e dua vei ira. 29Ia o ira na Isireli era a lakova na vanua mamaca ena loma ni wasawasa, ka sa kedra bai na wai mai na yasadra ruarua.
30A sa vakabulai ira na Isireli ko Jiova ena siga o ya, ka ra raici ira na kai Ijipita ni ra sa davo matemate tu e matasawa. 31Ni ra sa sarava na cakacaka mana e cakava na Kalou ena nodra ravuti na kai Ijipita, era sa duri tu ena yalo e vakarokoroko vua na Kalou; ka ra vakabauta na Kalou kei Mosese na nona tamata.
Currently Selected:
LAKO YANI 14: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
