1 KORINICA 9

Na Nodra Dodonu kei na Nodra i Tavi na i Apositolo

1Sa sega li ni'u tamata sereki oi au? E sega beka ni'u dua vei ira na i apositolo oi au? Au se sega li ni raici Jisu na noda Turaga? O ni sega beka ni okati oi kemuni mo ni vua ni noqu veiqaravi ena vuku ni Turaga? 2Kevaka mada ga au sa sega ni ciqomi me'u apositolo mai vei ira tale na kena vo, au sa nomuni apositolo vakaidina ga! Ena vuku ni kena sa semati tu na nomuni bula kei na Turaga, sai koya oqori na i vakatakilakila sa vakadeitaka ni'u sa nona i apositolo na Turaga oi au.

3Au dau kaya vakaoqo vei ira era sa vakalewai au: 4E sega li ni tu vei keitou na dodonu me keitou kana ka gunu? 5E sega li ni tu vei keitou na dodonu me keitou muria na we ni yavadratou na vo ni apositolo kei iratou na tacina na Turaga ka vakakina o Pita, o ya me keitou kauta voli na dui wati keitou lotu Vakarisito ena veivanua keitou lako kina? 6Se oi keirau beka ga kei Panapasa e dodonu me keirau buno ena cakacaka me rawati kina na neirau bula? 7O cei na sotia sa bau lako ki na i valu ka saumi koya vakai koya ga? O cei sa bau tea e dua na loganivaini ka sega ni bau vakayagataka eso na vuana? Se o cei sa bau vakania e dua na qele ni sipi ka sega ni vakayagataka eso na wai-ni-sucu?

8Au kaya li na veika oqo ena kaukauwa vakatamata? E sega li ni tukuni talega na veika oqo ena Lawa? 9Sa volai tu ena Lawa i Mosese, “Mo kakua ni vesuka na gusu ni bulumakau ni butu sila tiko.” Ia oqo, sa kauwaitaki ira beka ga na bulumakau na Kalou?#Vrua 25.4; 1Timo 5.18 10E sega beka li ni vosa sara tikoga ena vukuda na Kalou? Sa dina sara, ni sa volai ga oqo me baleti keda. O koya sa taura na i siviyara me cukita na qele kei koya sa ia na tatamusuki, ni rau sa cakacaka voli, e dodonu me rau nuidei tiko ni rau na vakaivotavota mai na vua ni qele. 11Keitou sa teivaka oti na veika vakayalo ena lomamuni. Ena sivia beka vei kemuni kevaka keitou sa vakasokumuni i yau mai vei kemuni?#Roma 15.27 12Kevaka sa tu vei ira eso na dodonu me ra namaka na ka oqo mai vei kemuni, e sega beka li ni levu cake sara na dodonu e tu vei keitou?

Ia keitou se sega ni vakayagataka na dodonu oqo. Keitou sa vosota voli ga na ka kecega me kakua kina ni keitou vakalatilati ki na i Tukutuku Vinaka me baleti Karisito. 13O ni sa kila deivaki ga ni o ira era dau qarava na cakacaka tabu ni Valenisoro era sa rawata na kedra kakana mai na Valenisoro, kei ira era dau qarava na vakacaboisoro era sa vakaivotavota ena i soro sa vakacabori.#Vrua 18.1 14Sa vakarota vakakina na Turaga ni o ira era sa dau vunautaka na i tukutuku vinaka me ra rawata na nodra bula mai na i tukutuku vinaka.#Maciu 10.10; Luke 10.7

15Ia au sa sega mada ni se vakayagataka e dua vei ira na noqu dodonu oqo. Au sa sega talega ni vola yani na ka oqo me rawa ni vakayacori kina vei au. Sa vinaka cake vei au me'u mate yani! Ena sega ni dua me na kauta tani vei au na ka au sa cibi kina! 16Kevaka au sa vunautaka na i tukutuku vinaka, oqori sa sega ni ka me'u boletaki au kina, ia ka'u sa vakacolati kina, ni sa noqu i tavi ga oqo. Au na kalouca kevaka au sa sega ni vunautaka na i tukutuku vinaka! 17Ia kevaka au sa cakava na ka oqo ena noqu lewa vakai au ga, au sa na qai rawa ni namaka me'u saumi kina; ia au sa vakayacora ga me vaka na i tavi sa vakacolati vei au, baleta ni sa nuitaki au na Kalou ena i tavi oqo. 18A cava sa qai kena i sau vei au? Sa i koya ga na rokovi kei na dokai ni noqu vunautaka na i Tukutuku Vinaka sa sega ni'u lavaka me saumi, kei na noqu sega ni vakayagataka na noqu dodonu ena noqu veiqaravi me baleta na kosipeli.

19Au sa tamata sereki oi au, ka sega ni bobula vua e dua; ia ka'u sa vakayacori au ga me'u nodra bobula na tamata kecega me'u rawai ira kina e lewe vuqa. 20Ni'u sa tiko kei ira na Jiu, au sa bula me vaka na Jiu me'u rawa ni rawai ira kina na Jiu. E dina ga ni'u sa sega ni vauci ena Lawa i Mosese oi au, au a bula voli me vaka e dua sa vauci tu ena lawa, me'u rawa ni rawai ira kina. 21Ni'u sa veiqaravi tiko kei ira na kai matanitu tani, au sa bula me vaka na kai matanitu tani, ena taudaku ni nodra Lawa na Jiu, me'u rawai ira kina na kai matanitu tani. E sega ni kena i balebale oqo ni'u sa sega ni muria na lawa ni Kalou; au sa tiko dina ga ena ruku ni lawa i Karisito. 22Ena kedra maliwa sa malumalumu ena vuku ni vakabauta, au sa malumalumu vakakina me vakataki ira, me'u rawa ni rawai ira kina. Au sa yaco kina me'u vaka na veika kece sara vei ira na tamata kecega, me rawa ni'u vakabulai ira kina eso ena sala kecega e rawa.

23Au sa cakava na ka kece oqo ena vuku ni tukutuku vinaka, me rawa kina ni'u bau vakaivotavota ena kena veivakalougatataki. 24O ni sa kila dina sara ni ra sa lewe levu na daucici era sa vakaitavi ena dua na veitaucici, ia sa dua ga vei ira sa taura na ulu ni i covi. Mo ni cici vakakina, ena kena i valavala me rawati kina na qaqa. 25O ira na daucici era sa dau rokova na bula vakaivakarau ni vakaukauwa yago, me rawa kina ni ra daramaka na i sala ni qaqa sa ca vakarawarawa; ia vei keda na kena sa sega ni ca rawa. 26Oqo na vuna ka'u sa cici vakadodonu sara kina ki na i cavacava ni veitaucici; ka'u sa vaka na dauveivacu sa sega ni vakamaumautaka na nona i vacu. 27Au sa vakaukauwataka na yagoqu mai na i vacu ka vakatulewataka vinaka, ka me'u kakua kina ni qai sega tale ni vakadonui ni oti na noqu kacivi ira ga mai na tamata ki na veisisivi.

Currently Selected:

1 KORINICA 9: FNV

Highlight

Copy