1 KORINICA 10

Na Veivakasalataki Me Ra Vakanadakuya na Veimatakau

1Au vinakata mo ni kila na veiwekani, ni ra a vakarurugi kece na noda qase ena o ka ra lako kosova kece na Wasawasa Damudamu.#Lako 13.21,22; Lako 14.22-29 2Era a papitaisotaki kece vei Mosese ena o kei na wasawasa; 3era sa kania vata kecega na kakana vakayalo,#Lako 16.35 4ka ra gunuva vata kece talega na wai ni gunu vakayalo. Era sa gunu mai na vatu vakayalo sa muri ira voli; ia na vatu o ya na Karisito.#Lako 17.6; Tiko 20.11 5Ia e lewe vuqa vei ira sa sega ni vinakati ira na Kalou; ka ra sa mate laivi tu yani ena vanua lala.#Tiko 14.29,30 6Na veika oqo era sai dusidusi vei keda, me da kakua kina ni dau garova na veika ca, me vakataki ira.#Tiko 11.4 7Ni kakua talega ni qaravi matakau me vakataki ira; ni sa volai ena i Vola Tabu, “Era sa dabe sobu na Isireli me ra kana ka gunu, ka tini sara ena mateni kei na cakacaka vakasisila ni veidauci.”#Lako 32.6 8Me da kakua ni ia na dauyalewa kei na dautagane me vakataka eso vei ira, ka ra sa mate kina e lewe 23,000 ena dua ga na siga.#Tiko 25.1-18 9Me da kakua ni vakataki ira eso vei ira ena nodra vakatovolea na Turaga ka mani vakarusai ira kina na gata.#Tiko 21.5,6 10Ni kakua talega ni daudidi me vakataka eso vei ira, ka mani vakarusai ira kina na Agilosi ni Mate.#Tiko 16.41-49

11Era sai dusidusi kece na veika sa yacovi ira, ka ra sa volai tu me ra i vakasala vei keda. Ni sa bula tiko ena dela ni gauna sa voleka mai kina na i vakataotioti.

12Kevaka o ni sa nanuma ni o ni sa tudei, mo ni qarauna vinaka mo ni kakua ni bale. 13Sa sega ni dua na veivakatovolei ka sa yacovi kemuni me dua tani mai na kena e dau yaco ki na tamata. Sa yalodina na Kalou, ka na sega ni laiva me sivia na nomuni kaukauwa na ka o ni vakatovolei kina; ena solia o koya ena gauna ni veivakatovolei na sala mo ni dro bula rawa kina kei na kaukauwa mo ni vosota kina. 14O koya oqo kemuni na wekaqu lomani, ni tarovi kemuni kina mai na qaravi kalou matakau. 15Au vosa oqo vei kemuni me vaka o ni sa tamata yalomatua; ka mo ni lewa vakataki kemuni ga na veika au sa kaya. 16Na bilo eda vakayagataka ena i Vakayakavi ni Turaga ka da vakavinavinakataka kina na Kalou: ena gauna eda gunu kina, eda sa veitokani vata kaya na dra i Karisito. Sa vakakina na madrai eda sa dovia: ena gauna eda kania kina, eda sa veitokani vata kaya na yago i Karisito.#Maciu 26.26-28; Mari 14.22-24; Luke 22.19,20 17Ni sa duabau ga na i buli madrai, oi keda kece, ka dina ga ni da sa lewe vuqa, eda sa duabau ga na yago, ni da sa vota vata na i buli madrai oqo.

18Mo ni vakasamataki ira mada na Isireli; o ira era dau kania na veika sa vakacabori me i soro era sa vota vata na i tavi me qaravi vua na Kalou ena i cabocabonisoro.#Vsoro 7.6 19A cava na i balebale ni ka au kaya tiko oqo? Ni sa dua li na ka na kakana sa cabori ki na matakau, se sa dua li na ka dina na matakau? 20E sega! Au sa kaya ga ni kakana sa vakacabori ki na i cabocabonisoro ni matakau sa vakacabori vei ira na tevoro, ka sega ni vakacabori vua na Kalou. Au sa sega ni vinakata mo ni veitokani kaya na tevoro.#Vrua 32.17 (LXX) 21E sega ni rawa mo ni gunu mai na nona bilo na Turaga ka gunu talega mai na nona bilo na tevoro; e sega ni rawa mo ni kana mai na teveli ni Turaga ka kana talega mai na teveli ni tevoro. 22Se, eda sa via vakavuna li me vuvu na Turaga? Eda sa nanuma beka ni da sa kakauwa cake mai vua?#Vrua 32.21

23Eso era sa kaya, “Sa tara vei keda na ka kecega.” Sa dina sara oqori, ia sa sega ni yaga vei keda na ka kecega. Sa vakalawa na ka kecega, ia sa sega ni vukei keda na ka kecega.#1Kori 6.12 24Me kakua ni dua vei kemuni me vakasaqara na ka me baleti koya ga, ia me baleta ga na nodra vinaka na tani.

25Sa tara mo ni kania na ka kecega sa volitaki ena vale ni volitaki lewe ni manumanu ka kakua tale ni via vaqaqa ena nomuni lewa-e-loma. 26Ni sa kaya na i Vola Tabu, “Ni sa nona na Turaga na vuravura kei na ka kecega sa tu kina.”#Same 24.1 27Kevaka o ni sa vakadonuya na nona sureti kemuni e dua na tamata tawa-lotu, ni kania na kakana kecega sa vakarautaka vei kemuni ka kakua tale ni via vaqaqa ena nomuni lewa-e-loma. 28Ia ke mani dua e kaya vei kemuni “Na kakana oqo sa vakacabori oti ki na matakau,” ni kakua ni kania ena vuku i koya sa tukuna vei kemuni kei na vuku talega ni lewa-e-loma, 29e sega ni nomuni lewa-e-loma o koya au tukuna oqo, ia na nona lewa-e-loma ga na tamata o ya.

Sa taroga e dua, “A cava na vuna me mai yalani kina na noqu galala ena vuku ni nona lewa-e-loma e dua tani tale na tamata? 30Kevaka au sa vakavinavinakataka vua na Kalou na kequ kakana, a cava me'u vosa vakacacataki kina ena vuku ni kakana ka'u sa vakavinavinakataka oti?”

31O koya oqo, se o ni kana se o ni gunu, se cava ga o ni cakava, mo ni cakava kece sara me vakarokorokotaki kina na Kalou. 32Mo ni bula ena i valavala se sega ni vakacalai kina o ira na Jiu, se kai matanitu tani, se vei ira na i soqosoqo lotu ni Kalou. 33Ni cakava na ka au sa dau cakava; au sa dau tovolea me'u vakalomavinakataki ira na tamata ena veika kece au cakava, ka'u sa sega ni nanumi au ga, ia ena veika ga me yaga raraba vei ira na lewe vuqa, me rawa kina ni ra vakabulai.

Currently Selected:

1 KORINICA 10: FNV

Highlight

Copy